Ladaw Shata Ni Mying Lu Wa Ai Lam

https://youtu.be/b3_btdui4vg?si=Mn4urMEya6mdjghN

–

Lai wa sai bat na Jinghpaw lamang hta e Du Hkra Ladaw hte Shata mying ni a lam hpe tang madun mat wa sai re. Ndai bat hta gaw Shata mying masat ai lam ni hpe Kachinland College Press ni shapraw da ai “Jinghpaw Laika Lakchyoi” laika buk hta mahta nna tang madun mat wa na nngai.

1. Shawng nnan, Maji Ta hpe gaw, maji pu ni pu magra ai shata re majaw Maji Ta ngu shamying ai hpe chye lu ai. Maji Ta (6) ya (December 23) ya shani hpe shaning ningnan ngu masat ma ai lam mung ka da nga ai.
2. Maga pu pu majawm wa ai ten hpe gaw, Maga Ta ngu shamying ai re lam chye lu ai.
3. Bai Hkru Ta gaw hkun hkraw ai kahtet ta re majaw, Hkru Ta ngu shamying ai lam chye lu ai. Hkru Ta hpe nkau buga ni hta gaw Hkru Dumlawng Ta ngu mung shamying ma ai lam ka da nga ai.
4. Ra Ta ngu ai March shata hpe gaw Ningsin, Ninghtoi rap-ra ai aten re majaw, Ra Ta ngu masat ai lam laika buk hta lawm nga ai. Bai nna magam bungli ni yawng ngut ra sai. Yi hkyen ngut ra sai. Bai nna moi na Jiwoi ni gaw, numhpyi numla hkung-ran lamang ni mung ndai shata kaw yawng ngut; rau ra ang ai majaw, Ra Ta ngu shaming ai lam hpe mung chye lu ai.
5. Wut Ta hpe gaw, “wut ningwu kanu” ni pyen ai hte, dingdung maga na nbung htingnut mat nna, sinna dingda maga na nbung gawut hpang ai shata re majaw, Wut Ta ngu masat ai lam chye lu ai.
6. Shala Ta gaw, ginhtawng ladaw lai, lanam ladaw shang hpang ai ten, namsi ni myin hpang wa ai ten hpe gaw, Shala Ta ngu ai re.
7. Bai nna Jahtum Ta hpe gaw, hkun hkraw ai a ten htum ai hte hkai shatut ai magam bungli hpe jahtum tawn ra ai shata re majaw, Jahtum Ta ngu mying ma ai lam ka da ai hpe mu lu ai.
8. Jan ja dat, marang htu dat re ai Sangan Ta ngu ai gaw lanam ta hpe lai di lu sai ngu lachyum hte Sangan Ta ngu shamying ai lam chye lu ai.
9. Shimari Ta gaw sumtsan ga jut shara shagu na jinghku jing-yu ni a shiga hpe marit hkamsha ai hte maren, kaga masha wa hpe kumhpa jaw nna shiga shalai garum hpyi ra ai majaw, maga mi hku yu yang dai shiga ni hpe mari la ai hte bung ai majaw, Shimari Ta shing nrai Shi Marit Ta ngu byin wa ai lam laika buk hta ka da ai hpe mu lu ai.
10. Gupshi Ta shing nrai Matung Ta nkau mi gaw Nmut Ta ngu tsun ai; dai shata hpe gaw sumtsaw, sumra ni, jinghku jing-yu ni a shiga hpe shagup chye, na lu ai majaw Gupshi Ta ngu shamying ma ai lam re.
11. Nsi nai si, ja mam nai mam ni hpe shu la ai atung zingya aten ladaw re ai majaw, dai shata hpe Guptung Ta shing nrai Muttung Ta ngu masat ai.
12. Kinla Ta gaw dun-ye galaw ai baw kinla pu pu ai ten re majaw Kinla Ta ngu mying ai lam chye lu ai.

Jinghpaw shata ni hta laklai ai gaw masum ning hta galang shata kahtap ai shata hpe Ladi Ta ngu shamying ai hpe mung laika buk hta mu hti lu nga ai re. Ndai shata gaw Kinla Ta hte Maji Ta lapran kaw rai nga ai.

Bai du na bat hta gaw, Bat mi na ninghtoi shani ni hpe Jinghpaw ga hte shamying da ai lam ni hpe matut tang madun mat wa na nngai.

Chyeju kaba sai.