Ja Hte Mari, Galai La N Lu Ai Num Sari

Bat Shagu Lamang. Ningka: Matsi. 21 December 2024 – Kachinwaves

Wunpawng myusha Rawang ga malai rai nga ai, “Samare Dakung, Ja I Wan Malunshi” ngu ai gaw, “Ja hte Mari, Galai La N Lu Ai Num Sari” ngu ai lachyum re lam chye lu ai. Ndai ga malai gaw num langai a sari kade manu dan ai, kade hpu reng nga ai hpe htawng madun dan nga ai re. Wunpawng ga malai law law hta num ni hpe tsun shagrit, ahkyak n shatai ai manaw ni lawm nga ai raitimung, ndai ga malai gaw “Num Sari” grai manu dan ai lam hpe tsun da nga ai.

Tsun ga nga yang, sari ngu ai gaw num la n ginhka ai sha yawng kaw rawng nga ai lam rai nga ai. Mungkan Shinggyim Ahkaw Ahkang Lam Ndau Shabra Laika (UDHR) Daw (1) hta shinggyim masha shagu gaw, shangai ai kaw na sari sadang ngu ai maren rap ra lu shajang nga ai lam hpe tsun tawn da nga ai. Shinggyim ahkaw ahkang tawt lai hkrum ai lam gaw, shinggyim sari sadang shagrit kau hkrum, hkrat sum shangun ai lam rai nga ai. Bai nna mungkan a labau hpe yu yang, num hte la ni a lapran sari sadang ahkaw ahkang masat masa tawn ai lam ni hta num ni hpe hpang kaw tawn da ai mabyin ni hpe mu lu nga ai. Dai zawn re ai byin da masa ni hta amyushayi num ni a sari hpe manu shadan ai Wunpawng ga malai hpe mu lu ai lam gaw, kaja ai kumla langai rai nga ai.

Ndai ga malai gaw, num langai a sari sadang ngu ai gaw manu masat n lu ai lam, kunrai, arung arai ni hpe zawn manu dawdan n mai ai lam htawng madun dan nga ai. Num kasha ni hpe dut, mari, hpaga rai langai hpe zawn manu dawdan, masat ai lam n mai galaw nga ai. “Num Sari” ngu tsun ai shaloi num ni nan mung manu shadan ra ai zawn, num ni hte rauhpawng, raude, raulu, rausha nna nga pra nga ai num/la, kaji/kaba yawng gaw, shada hkungga masat masa galaw hkat ra nga ga ai.

Ndai ga malai a lachyum namnak hpe yu yang, num ni hpe dinghku kanu madujan, lanu lahku ai kanu num ni, ngu ai hku sha mu mada ai ningmu hpe lai di nna manu dawdan n lu ai, sari sadang rawng ai amyushayi num ni re ai lam hpe, sakse madun na matu mung n-gun jaw ya nga ai. Amyushayi kanu num ni nan mung, tinang a shinggyim sari sadang hpe makawp la, manu shadan chye ra nga ai zawn, makau grup-yin ni mung amyushayi num langai a prat, shinggyim sari sadang ahkaw ahkang hpe jahten sharun na matu gunglau hkalem ai ni n re sha, makawp maga rawt jat shangun ai makau grup-yin ni rai ra nga ga ai.

Ja gaw aten, shara, masa n lata ai sha manu dan nga ai. Dai ja zawn sha shingyim numsha amyushayi ni mung gara ten hta rai timung, gara shara hta rai timung, kaning re ai masa ni hta rai timung, shanhte a sari sadang hpe shayawm shagrit kau ya mai ai n rai nga ai. Ndai Wunpawng myusha Rawang ga malai kaw tsun da ai hte maren, manu shadan hkungga ai myit masa ni anhte amyu ni hta rawng nga sai hpe, byin da masa hta shachyaw nna, grau tsawm htap ai, tara rapra ai, sari sadang hte hpring ai, ngwi pyaw simsa ai shinggyim wuhpung wuhpawng hpe gawgap nga ga law. Chyeju kaba sai.

Lai sai bat na: Num Chyau Chyau Hka, La Chyau Chyau Sha