Num Chyau Chyau Hka, La Chyau Chyau Sha

:

–

Ga malai hpe yu yang, “La” ni hpe shagrau, shatsaw, shakawn la ai ningmu, myit jasat sha rawng nga ai rai nna, maga mi de “Num” ni hpe shagrit shanem kau mayu ai, loi nchyun shanang ai lachyum rawng nga ai. La ni galaw yang she dinghku kata lu sha ai. La ni tsun shaga hkawm yang she lachyum pru akyu rawng ai. Num ni hpe shawa hpawng hta nau n shang, n zet hkawm shangun mayu ai. La ni hpe sha shamyet shanat shingbyi nna nga shangun mayu ai, manaw nsen ni mung rawng nga ai re. Ndai gaw dinghku kata hta kanu num ni a sakjaw ai lam, shakut shaja ai lam ni hpe, nau wa mi manu n shadan ya ai manaw lachyum hpe shale ai ga malai rai nga ai re.

” , ” ngu ai ga malai a lachyum hpe ading tawk lachyum shaleng ga nga yang: Num ni nden marai rawng, tsun gwi shaga gwi rai wa ai hpe n kaja ai ningmu hku mu mada la ai lam re. Dai zawn num ni zet wa yang tsun shut galaw shut nna “hka wa” ra chye ai. La ni tsun shaga hkawm yang gaw kaja ai, “lu lu lu sha wa ai” ngu ai lachyum re. Ndai ga malai gaw dinghku bungli lam hta mung, mare buga shawa bungli ni hta mung, num ni hpe dawdan hparan lawm na ahkaw ahkang n jaw, pat shingdang tawn da ai myit jasat hpe shadan shadawng mu lu shangun ai sakse ga malai langai rai nga ai.

Num ni hpe gaw la ni woi ai hku azim sha hkan nang yang kaja dik re ngu ai, manaw nsen ni mung rawng nga ai re. Woi awn ai lam, dawdan ai lam, manghkang hparan ai lam ni hta la ni madung galaw ging ai hte, num ni gaw madi shadaw lawm yang kaja ai ngu ai lachyum mung rai nga ai. Rap shara myit yu yang, num rai rai, la rai rai kachyau n jaw, zet n jaw yang gaw hka byin wa chye ai sha re.

Ta tut hta mung, num chyau chyau nna kanu a lit, kawa a lit lahkawng yan hpe woi awn nga ai: hka n byin ai sha n ga, ja tai nga ai kanu num ni hpe anhte a wuhpung wuhpawng ni hta law law mu lu nga sai re. Maga mi de, la chyau chyau shut nna hten, zang ayai mat ai dinghku, wuhpung wuhpawng ni mung nga nga ai sha re.

Hpungdim ga nga yang, dinghku kata mi rairai, mare kahtawng buga kata mi rairai, wuhpung wuhpawng mungdan kata mi rairai, woi awn ai, dawdan ai lam ni gaw: nang gaw num, ngai gaw la ngu ai hku n re sha, langai hte langai a n bung hkat ai atsam marai, mahkrum madup, machye machyang, hpaji hparat ni hte hpraw san ai myit jasat jasa ni hta hkan nna she “hka byin wa na kun?, lu sha wa na kun?” ngu ai hpe mu lu na re. Chyeju kaba sai.