Du Hkra Ladaw Hte Shata Mying Ni

–

Ndai bat hta gaw du hkra ladaw hte Shata mying ni a Jinghpaw gasi ni hpe tang madun mat wa na nngai.

Myen ga hku (နွေ၊ မိုး၊ ဆောင်း ဥတုသုံးပါး) ngu ai “du hkra ladaw” masum hpe Jinghpaw ga hku gaw, နွေ – Ninglum Ta, ဆောင်း – Ningshung Ta, မိုး – Lanam Ta ngu nna wa bung pre nga ai hpe mu lu ai. Ningshung Ta hte Ninglum Ta yan gaw; “Ginhtawng Ta Ladaw” rai nna Lanam Ta gaw “Lanam Ta Ladaw” rai nga ai.

Rai yang, Jinghpaw ga hku Shata mying ni hpe gara hku shamying da a ta ngu ai hpe chye na loi na matu, anhte ni chye tawn da chyalu rai nga ai; Mungkan lang Shata mying ni hte gapyawn nna tsun dan mat wa na nngai.

1. Maji Ta ninghtoi (30) ya rawng ai, December hte January shata yan hta ang ai.
2. Maga Ta ninghtoi (29) ya rawng ai, January hte February shata yan hta ang ai.
3. Hkru Ta ninghtoi (30) ya rawng ai, February hte March shata yan hta ang ai.
4. Ra Ta ninghtoi (29) ya rawng ai, March hte April shata yan hta ang ai.
5. Wut Ta ninghtoi (30) ya rawng ai, April hte May shata yan hta ang ai.
6. Shala Ta ninghtoi (29) ya rawng ai, May hte June shata yan hta ang ai.
7. Jahtum Ta ninghtoi (30) ya rawng ai, June hte July shata yan hta ang ai.
8. Shangan Ta ninghtoi (29) ya rawng ai, July hte August shata yan hta ang ai.
9. Shimari Ta ninghtoi (30) ya rawng ai, August hte September shata yan hta ang ai.
10. Gupshi Ta ninghtoi (29) ya rawng ai, September hte October shata yan hta ang ai.
11. Guptung Ta ninghtoi (30) ya rawng ai, October hte November shata yan hta ang ai.
12. Kinla Ta ninghtoi (29) ya rawng ai, November hte December shata yan hta ang ai.

Wunpawng sha ni hti lang ai Shata ni hta masum ning hta galang Shata kahtap ai lam nga ai majaw, dai Shata kahtap ai shaning hta gaw, Shata (13) rawng ang ai lam chye lu ai. Ndai masum ning hta galang kahtap rawng ai Shata hpe “Ladi Ta” ngu ai re.

Ndai Shata mying masat shamying ai lam hpe Kachinland College Press kaw nna dip shapraw da ai “Jinghpaw Laika Lakchyoi” laika buk hpe mahta nna tang madun dan ai re.

Du na bat hta gaw Shata mying ni hpe gara hku shamying tsun lang wa a ta ngu ai hpe matut tang madun mat wa na nngai.

Chyeju kaba sai.