Simsa Ai Htunghking Hpe Gar Hkai Ga

https://youtu.be/xlO8ZzwGO5w?si=98B3LbSarag3FYrB

.

–

English hku “Peace” ngu ai ngwi pyaw simsa lam a namchyim hpe nang, ngai, anhte yawng ra sharawng ai lam langai rai nga ai. Simsa Lam (Peace) ngu ai gaw, Mungkan Wunpawng Hpung (United Nation) a madung bungli yaw shada lam langai rai nga ai. Dai majaw 1981 ning kaw galaw ai Mungkan Wunpawng Hpung a Ninggawn Zuphawng hta e, September shata 21 ya shani hpe International Day of Peace (Mungkan Simsa Lam Masat N’htoi) ngu masat shagrin da sai re.

International Day of Peace, Mungkan Simsa Lam Masat N’htoi a yaw shada lam gaw, majan gasat ai lam n nga ai, sat nat mazut ai lam ni hte manghkang hparan ai lam n galaw ai sha, Simsa Ai Mungkan byin tai lu na matu rai nga ai.

Rai yang dai ni gaw, Mungkan Simsa Lam Masat N’htoi hpe masat shagrin da ai (43) ning ladu hkrum sai re. 2001 ning hta gaw ndai Simsa Lam Masat N’htoi shani hpe gasat gala ai lam jahkring ai shani hku nna masat da sai re. Ndai shani hpe mungdan asuya ni, wuhpung wuhpawng ni hku nna woi awn let, simsa lam hte seng ai lamang ni, shamu shamawt lam ni hpe shaning shagu September 21 ya shani hta laksan aten jaw manu shadan galaw nga ai re.

Ndai zawn lamang galaw sa wa ai lam hta shaning shagu gabaw langai ngai hpe mahta nna hkrang shapraw sa wa ai hpe mung mu lu ai.

Dai ning 2024 ning a gabaw gaw, “Cultivating a culture of Peace – Simsa Ai Htunghking Hpe Gat Hkai Ga” ngu ai gabaw hte n-gun dat hkrang shapraw sa wa na ngu, Mungkan Wunpawng Hpung a UNESCO kaw nna masat ndau da ai re.

Ndai Simsa Lam Masat N’htoi hta mungdan shagu hta hkyinghkum (24) gap hkat jahkring na matu Mungkan Wunpawng Hpung (UN) gaw masat tawn da sai rai nna Simsa Lam hpe manu shadan ai myit masa hpe hkungga ai hte mungdan shagu na laknak lang gasat gala nga ai wuhpung ni hkyinghkum (24) gasat gala gan jahkring ai lam galaw lai wa sai hpe chye lu ai.

Anhte a mungdan hta gasat gala byin nga ai hte simsa lam n nga ai majaw, mungdan masha ni ruyak jamjau hkrum sha nga ai gaw, shaning (70) ning jan mat wa sai re. Grau nna gaw, 2021 ning, gumshem hpyen dap laba ka-up nna mungdan daru magam zing kau ai a majaw, lani hte lani grau grau ruyak jamjau wa ai gaw, masum ning jan mat wa sai. Ndai zawn gumshem hpyen dap a n tara ai hku sat nat hkrum ai mungmasha yawng marai (5,675) rai nna, rim sharen da hkrum ai masha marai (27,416) rai nga ai lam (AAPP) wuhpung a sumtang hta mu lu nga ai re.