K hte E Marawp Nna Pyaw Lam Tam Ai Gaw Shakawng Hpa N Re

.

.

–

Dai ni na prat hta ramma shayi, shadang sha ni a lapran hta sha n-ga, salang, hpawpmi nkau mi a lapran hta mung na yu, mu yu ai sha n rai, damdam papa jai lang wa nga ai; K, E ngu ai gaw kaning re ai arai rai nga a ta? Kanu Kawa ni hte ramma myit-su ni mung n-yit n shai na matu chye da ra nga saga ai.

“K, E ngu ai maw gumhpraw lu ai ni sha mai lang ai gaw! Dai na ngai ‘K’ kade line (yan) pyi marawp kau sai. K ngu ai maw relax (bansa ai) le.” nga nna shara n tam malawng mala shakawng hpa langai zawn, tsun shaga hkawm ai ramma shayi shadang ni hpe tinang nan myi chyaw mu yu ni ai. Nkau shayi sha ni gaw K hte E marawp ai lam hpe KTV hkan e bungli langai hku pyi shang galaw nga ma ai. Dai ni hpe “Hai Shayi (ဟိုင်းမေ)” ngu nna mung tsun ai re.

K ngu ai (Ketamine) hte E ngu ai (Ecstasy) hpe KTV, Bar, Club ni hta malawng jai lang ai hte zuphpawng pyaw chyai ai Party nkau mi hta mung, “party drugs” shing n rai “Items” ngu nna tsun lang nga ma ai.

K hpan gaw ahpraw nsam rawng ai shadung powder rai nna, dai hpe pipe hte ladi hku marawp ai. Dai zawn marawp bang ai majaw, myit madung mat nna myit hte hkum shan kaga ga wamwam sumwi zawn pyen pyau mat ai hpe “လွင့်” ai pyen pyaw ai ngu nna tsun let, pyaw hpa lusha shatai nga ma ai.

Dai K ngu ai Ketamine hpe 1964 ning hta shawng nnan chyam shapraw lang yu nhtawm, hkum hkrang ga tsi lajang ai, myit hte seng ai machyi masha ni hte dusat ni hpe tsi lajang ai lam ni hta jai lang ai re hpe sawk sagawn hkaja chye lu ai. Raitim, hpang daw de gaw, n kaja ai akyu ni grau law wa ai majaw tsi tsi lajang ai shaloi malap tsi (မေ့ဆေး) hku nna, jai lang ai lam n-galaw sai hpe chye lu ai. Raitim, dai tsi ntsin ni hpe salu shamawng kau ai ladat hte shadung powder hte tsi hkyep shabyin kau ai; tara n shang galaw shapraw dut sha hpang wa ai hpe chye lu ai.

E ngu ai Ecstasy hkyep hpe gaw wan hte nat nna marawp ai. Dai nanghpam tsi hkyep ni hpe marawp ai hpang, hkum shan ngang gayut ai lam hpe n-gun jaw ya ai hormone hpe shalaw dat ya ai majaw, hkum shan kanawn mayu ai myit ni hpe grau jasu sharawt ya ai baw hpan re lam, hkamja lam hte seng ai summroi ni hta mu hti lu nga ai.

K hte E hpe jai lang ai majaw tinang a hkum sai shan kata byin wa na hpang hkan tsin-yam ni gaw;

• Salum gumhtawn lawan wa ai.
• Sai lung sai rawt wa ai.
• Hkum kahtet wa ai.
• Hka dat yawm wa ai
• Sinde hpe hkra machyi shangun ai.
• Malap mali byin ai hte myi mam mam wa ai.
• Myit hkamja lam n nga wa ai.

Ndai lam ni hta sha n-ga yin ya kap mat nna bawnu bum wa chye ai hte hpang jahtum asak si sum ai du hkra byin chye nga ai. Dai majaw K, E ngu ai gaw hkrit tsang ra ai nanghpam lusha hpan mi re lam tsi du sara ni tsun shadum da nga ai.

Ga shadawn hku tsun ga nga yang, lai wa sai 2023 ning hta Mung Myit Sinli Ga, Sam mung, Muse muklum hta amyu shayi ramma langai gaw, ‘K’ marawp lai mat nna n dum n dam malap kadang si mat wa sai hpe chye lu ai.

Dai sha n rai, dai zawn nanghpam lu sha K, E ni hpe lusha nna myit madung mat nga ai ten, Num, La hkum shan roi rip hkrum ai lam, masu hkalem katut ai lam ni, law law mung byin nga ai re.

Ya ten hta nanghpam hpan K (1g) hta lap mun kru hte mun sanit lapran nga nna, “E” gaw tsi hkyep langai mi hta mun mali daram nga ai hpe chye lu ai.

Ndai zawn re ai nanghpam ni gaw Myen mungdan hta gumshem hpyendap daru magam ana zing ai hpang daw, tara n lang ai KTV, Bar, Club ni grau law wa nna, nanghpam lusha hpan amyu myu ni hpe mung, aloi ali jai lang wa ai masa re lam shiga ni hta mu lu nga ai.

Dai majaw, shinggyim masha ngu ai nang, ngai anhte ni gaw myit pyaw myit-sa lam ni hpe lam amyu myu hku tam shakut nga ga ai re. Raitim, tinang a manu dan ai hkum shan asai shing-yan, myit nyan hpaji, asak ni hpe n jahten kau ai sha, tara upadi hpe mung tawt lai ai lam n nga ai; mai kaja ai lam hku shalan shabran lam tam myit pyaw myit-sa chye na gaw ahkyak madung rai nga ai law.

===

Loi Je Muklum Kaw Shawng Nnan Lang Share Shagan Masat N’htoi Hte Mungkan Ramma Masat N’htoi Galaw Lai Wa Sai Shiga

–

Shalawt gaiwang nnan, Loi Je muklum kata na ramma ni hpe Wunpawng Mungdan Shanglawt Asuya muklum upahkang du salang kaba ni woi awn nna, Share Shagan Masat n’htoi hte Mungkan Ramma Masat n’htoi hpe gapyawn galaw lai wa sai lam Loi Je ramma langai tsun ai re.

August 10 ya shani na Share Shagan Masat n’htoi hte August shata 12 ya shani ang ai Mungkan Ramma Masat n’htoi hpe lai wa sai Batkru ya shani gapyawn galaw lai wa sai hpe chye lu ai.

Loi Je muklum gaw, lai sai ten hta Myen mung asuya a uphkang gaiwang kata hta rai nna, Miwa mung hte mungdan asuya madang jarit hpaga lam shagyit hpaw tawn da ai muklum kaji rai nga ai.

Ndai Loi Je muklum hta Mungkan Ramma Masat n’htoi hpe uphkang dap ni ahkyak shatai woi galaw ai gaw, ndai galang nambat langai lang hkrum ga ai re nga nna, Kachin Waves hpe lamang hta shang lawm ai ramma langai tsun ai re.

Loi Je muklum gaw ramma ni galu kaba wa na matu ahkaw ahkang mahkrun taw la ai raitim, nanghpam malu masha gaw n taw ai shara rai nna, gumshem hpyen asuya ni mung gumhpraw gayat shale la ai shara shatai lai wa sai nga nna, shi a ningmu hpe matut tsun dan ai re.

Loi Je muklum hta Wunpawng Myusha ni, hpunau Sam Myusha ni, kaga hpunau Myusha ni hte Miwa amyu ni shanu nga pra ai rai nna, dai ning na April shata praw 9 ya shani kawn Wunpawng Mungdan Shanglawt Hpung – KIO a uphkang ginra majing rai mat sai re.