Malap N Mai Manu Shadan Ra Ai Share Shagan Ninghtoi

.

. –

Mungdan langai, Amyusha langai shagu hta shanhte kam hpa hkungga ai ningbaw ningla ni nga nga ai hte maren. Dai ningbaw ni gaw mungkan ga ntsa na hkumhkrang asak wai mat wa sai raitim, shanhte a arawng sadang ni gaw galoi mung manam pyaw ai sama zawn mawng nga ai re. Tinang a akyu n tam ai sha amyu hte mungdan shanglawt lu na lam hta asak apnawng, shakut shaja woi awn mat wa ai ni hpe share shagan ngu myit dum shakawn shagrau nga ai re.

Dai ni August 10 ya shani hta chyawm gaw, Wunpawng Mungdan Shanglawt Hpung KIO hku nna woi awn nga ai Wunpawng Mungdan Shanglawt Asuya kaw na masat da ai “Share Shagan Masat Ninghtoi” rai nga ai.

Share Shagan n’htoi hpe August 10 ya hta hpa majaw masat da ai hte seng nna, KIO a Shiga Magam Dap lithkam Du up Jum Nhpang Naw Bu Kachin Waves hpe ya na zawn tsun ai re.

“Moi anhte na No. (1) Ningbaw Kaba le GOC ni asak apnawng mat wa ai gaw, August shata 10 ya kaw rai nga. Dai majaw dai hpe la nna, August shata 10 ya shani hpe share shagan masat n’htoi ngu ai re nga.”

Shawng ningnan Wunpawng Mungdan Shanglawt Hpung (KIO) hte Wunpawng Mungdan Shanglawt Hpyen Dap (KIA) hpe woi awn hpaw hpang lai wa sai, share shagan kahpu kanau marai masum rai nga ai; Ningbaw Kaba Du Daju Lahtaw Zau seng, Kanau VCS Du Up Daju Lahtaw Zau Tu, Du Up Jum Lahtaw Zau Dan hte Salang Kaba Pungshwi Zau seng ni amyu hte mungdan a matu share shagan hkrat sum mat ai shaning, shani hpe lakap nna share shagan ninghtoi hpe masat hpang dat ai re lam chye lu ai.

Tau Dap Awn Daju (VCS) Du Up Daju Lahtaw Zau Tu gaw, 1975 ning August shata (6) ya shani hta gyam sat kau hkrum nna, masum ya din ai hpang kahpu Ningbaw Kaba Du Daju GOC Lahtaw Zau seng hte Salang Kaba Pungshwi Zau Seng yan gaw 1975 ning August shata 10 ya shani gyam sat kau hkrum sai re. Ndai ningbaw ningla marai masum hpe, sadi run ai Du Tu Seng (Tu Bung) gaw, Thai mungdan Htam Ngawp Bum sa wa ai lam hta gyam sat kau ai re lam labau hta mu lu ai.

Lahta na ningbaw ninglaw ni hkrat sum mat wa sai shaning shata hpe lakap nna me e amyu hte mungdan a matu asak panawng mat wa sai; myu tsaw share shagan ni yawng hpe hkung ga jaw shagrau sha a ai masat ninghtoi hku nna, Wunpawng Mungdan Shanglawt Asuya gaw August shata 10 ya shani hpe tara shang Share Shagan Ninghtoi ngu masat da sai re lam chye lu ai.