Hpakant Hta Gasat Poi Ni Grau Sawng Wa Mai Ai Gaw Hpa Majaw Ta?

1 March 2024 – Kachinwaves

မြန်မာလိုဖတ်ရန် link ဆောင်းပါးအဆုံးမှာ ပါရှိပါတယ်။

Mungkan hta gum hkawng ai manu dan lung seng pru ai Hpakant gaw; Sagaing hte Jinghpaw mung lamu ga matut ai ginra rai nna, gumshem hpyen dap a matu mai gan shang gumhpraw tam ya ai ginra rai nga ai zawn, rawtmalan hpyen dap rai nga ai Wunpawng Mungdan Shanglawt Hpyen Dap (KIA) a matu mung, hpyen masa, sutmasa a matu ahkyak ai ginra rai nga ai. Dai hta sha n-ga Hpakant ginwang daw, Sezin mare gaw gumshem ana zing ai hpang gasat poi shawng nnan byin hpang wa ai shara rai nga ai.

Hpakant gaw gumshem hpyen dap ana zing ai hpang kawn gasat poi law malawng byin ai Jinghpaw mung na ginwang daw (မြို့နယ်) langai rai nna, 2022 ning August kaw byin lai wa sai Sezin gasat poi hta lai nna, gasat poi kaba byin lai wa ai hpe gaw n mu lu ai. Rai tim, 2022 ning October shata hta A Nang Pa mare gawk nu kaw galaw ai Wunpawng Mungdan Shanglawt Hpung (KIO) masat nhtoi poi lamang hpe nbung li bawm wa jahkrat ai hpang daw de gaw, Hpakant ginra hta gasat gala lam ni law wa nna, 2022 ning laning mi laman gasat poi (71) lang byin lai wa ai hte Jinghpaw mung kata na gasat poi law dik ai ginwang daw rai nga ai hpe Kachinwaves a shaning shagu na majan shi ga sawk dinglik ai lam hta mu chye lu nga ai.

2023 shaning htum wa maga hte 2024 ning hta gaw Hpakant ginra hta KIA maga kawn hpyen wa a dap shara zing ai gasat poi ni hpe mu lu wa nna, hpyen majan lam a matu ahkyak ai matut mahkai lam nkau mi hpe KIA kawn madu la lu ai hpe mu lu nga ai.

Hpakant de shang sa wa mai ai madung lam mahkrun ni gaw; Nawng Lut (Indaw Gyi) – Sezin lam, Nawng Lut (Indaw Gyi) – Gwi Hka lam hte Mu Gawng – Lawng Hkang lam (Ka Mai lam) ndai lam masum rai nga ai. Lam mahkrun masum hta na ,2024 January shata hta Gwi Hka mare balik dap hte ahkyak ai hpyen dap hpe KIA hte pawng hpawm dap ni kawn zing madu da lu sai majaw, Gwi Hka lam hpe gaw KIA ni hpyen majan lam a matu pat shingdang da lu sai rai nna, Lawng Hkang lam maga na ahkyak ai Nam Tin hpyen dap hpe mung February shata hta zing madu lu sai majaw, dai lam maga a daw chyen mi hpe mung KIA kawn jum tek da lu sai rai nga ai.

Nawng Lut (Indaw Gyi) – Sezin lam chyawm gaw 2022 ning August shata hta gasat poi kaba byin ngut ai hpang kawn, gumshem hpyen dap hte Sam Hkyeng Amyusha Hpyen Dap (SNA) ni dap shara jahkrat nga ai shara rai nga ai. Rai tim mung, Sezin hte ading tawk matut da ai Hawng Pa mare chyawm gaw KIA hte PDF ni shamu shamawt nga ai ginra rai nna, Hawng Pa hte matut da ai Ta Mahkan mare kaw na madung hpyen dap kawng hte balik dap hpe KIA hte pawng hpawng dap ni htim gasat nga ai rai nna, gasat poi matut manoi byin nga ai re. Ndai Ta Mahkan hpyen dap hpe mung zing madu ngut yang gaw, KIA kawn Sezin lam hpe mung hpyen majan a matu shingdang pat hkum da lu ai ninggam langai rai wa na hpe mu lu ai.

Gumshem hpyen dap up hkang da nga ai Hpakant, Seng Tawng zawn masha law ai Muklum hte mare kata ni hta na shagyit (gate) hpyen dap ni hpe pyi rawtmalan hpung ni chyahkring hkring sa gap gasat ai majaw, maning na October shata kaw nna gumshem hpyen dap a shagyit hpyen dap nkau mi dawm mat wa sai re.

Hpakant Myoma balik dap shawng kaw na shagyit, Hpakant muklum kata na Seng Bum mahkrai, Hpakant – Lawng Hkang lapran na Pan Tin mahkrai hte Seng Tawng mahkrai lahta na shagyit ni hta sha n-ga, Hpakant shang wa mahka na Le Pyin pawng hpawm shagyit ni hpe gumshem hpyen dap gaw 2023 ning October shata kawn dawm la kau wa ai hpe yu yu yang, Hpakant ginra gaw gumshem hpyen dap uphkang lu ai lam gau ngwi ngwi yawm mat wa nga ai hpe mu lu nga ai. Dai lam ni sha n-ga, dai ning na January 27 ya shani; Mu Gawng – Hpakant lam na, hpyen dap kawng langai hpe mung dawm la kau nna, Ka Mai zai ladat hpyen dap kawng de n-gun kahkyin pawng hpawm mat ai mabyin gaw: gumshem hpyen dap a hpyen n-gun yawm taw nga ai kum la hpe shadan dan nga ai.

Mungdan shara shagu hta grau sawng wa ai hpyen majan lam ni a majaw, gumshem hpyen dap n-gun yawm wa ai rai tim, sutmasa shang gumhpraw grai ra kadawn nga ai majaw, Hpakant ginra hpe gumshem hpyen dap hku nna loi loi hte tat sum n hkam na re hpe maram lu nga ai. Dai hta sha n-ga, Hpakant ginra gaw gumshem lai len hpe ninghkap shamu shamawt lam su rawt nga ai, Jinghpaw mung kaw na ginwang daw rai nga ai. Maga mi hta mung, rawtmalan wuhpung rai nga ai KIA gaw dai ning shaning nnan kaw nna, Jinghpaw mung jarit mayan ni hta hpyen shamu shamwt gasat poi ni grau hkrang shapraw wa ai lam ni hpe shing daw maram yu yu yang Hpakant ginra kaw gasat poi ni grau sawng wa mai ai ngu, sawn shapraw lu nga ai.

===

မြန်မာလိုဖတ်ရှုရန် Link:

https://fb.watch/qxoxVA2ct-/?mibextid=Nif5oz