KIO hte KIA Hpe Woi Awn Hpaw Hpang Lai Wa Sai Share Shagan Kahpu Kanau Marai Masum A Labau Kadun

5 February 2024 – Kachinwaves

မြန်မာလိုဖတ်ရန် link ဆောင်းပါးအဆုံးမှာ ပါရှိပါတယ်။

Wunpawng Mundan Shanglawt Hpung (KIO) hte Wunpawng Mungdan Shanglawt Hpyen Dap (KIA) hpe woi awn hpaw hpang lai wa sai; Ningbaw Kaba Du Daju Lahtaw Zau Seng hte kahpu kanau ni gaw aten n rai aprat n wai shi yang, hkrat sum mat wa ai share shagan hpu nau ni rai nga ma ai. Kahpu yan rai nga ai, Du Daju Lahtaw Zau Seng hte Du Up Daju Lahataw Zau Tu yan nau gaw, Thai mungdan Htam Ngawp bum sa wa ai lam hta sadi run ai Du Tu Seng (Tu Bung) woi awn ai hpung ni e gyam sat kau hkrum ai majaw, hkrat sum mat wa sai. Du Up Daju Lahtaw Zau Tu gaw 1975 ning August shata (6) ya shani hta gyam sat hkrum nna, kahpu Du Daju Lahtaw Zau Seng gaw 1975 ning August shata 10 ya shani gyam sat hkrum ai re.

• Ningbaw Kaba Du Daju Lahtaw Zau Seng

Ningbaw Kaba Du Daju Lahtaw Zau Seng gaw Sam mung Lashio muklum Ban Shawng mare na Rev. Balawng Du hte Jawng Sara Num Lahpai Nang Htang yan a kasha a lat rai nga ai. 1928 ning February shata (14) ya shani shangai ai shadang sha rai nga ai. La kasha marai (6) hte Num kasha marai (3), yawng rai yang shannau ni marai (9) rai nga ma ai. Du Daju Zau Seng hpe Zau Chyan ngu nna mung shaga ma ai. 1940 – 41 ning hta laika hpaji tsang 7 hte tsang 8 hpe sharin nga ai ten hpet-sit Japan ni shang wa ai majaw, Japan hpyen dap hta ga gale ai bung li hpe shang galaw yu nu ai. 1944 – 45 ning hta American hte British hpyen dap ni bai du shang wa nna hpet-sit Japan ni hting nut ra mat sai. Dai hpang Ringja (Rangers) dap hta magam lit gun hpai wa sai. British dap hta Du Up madang du hkra magam gun wa nna British hpung ni hting nut mat wa ai hpang gaw, jawng bai matut lung nna tsang (10) du hkra lung la nu ai.

1949 ning hta Du Jum Lahpai Naw Seng hte rau Karen National Defence Organisation (KNDO) hte gin run let Myen mung asuya hpe rawt malan lai wa sai. 1950 ning Du Jum Naw Seng miwa mung de shang mat wa ai hpang Du Daju Lahtaw Zau Seng gaw Karen mung de yu mat wa nna KNDO hta dap ba up wa galaw taw nga ai.

1957 ning hta Yangon dakkasu lung nga ai kanau Zau Tu hte rau dakkasu jawng ma ni hpe zinlum nna 1959 ning hta Lashio muklum de rawt lung wa nna Wunpawng Mungdan Shanglawt Hpung (KIO) hpe shawng nnan woi awn hpaw hpang wa sai.

Jinghpaw mung rawt malan hpung hpe hkrang shapraw hpaw hpang nna, 1965 ning December shata hta lak nak tam mahkawng na hte mungmasa mahkrun lam ginjang kaja tam na matu, Thai mungdan de rawt sa mat wa sai. 1970 ning April shata (4) ya shani hta Duwa Hkun Hpung hte Jan. Nang Htu yan a kasha Shy. Nang Bawk hte hkungran dinghku de sai re. Thai mungdan hta matut nna magam gun hpai nga ai ten 1975 ning August shata (10) ya shani, Thai mungdan Htam Ngawp bum lam hta gyam sat kau hkrum ai majaw, asak hkrat sum mat wa sai.

Du Daju Lahtaw Zau Seng gaw n tara dip up sha hkrum nga ai Jinghpaw Wunpawng chyurum baw sang amyu ni lawt lu na matu, rawtmalan hpung hpe shawng nnan woi awn hpaw hpang ai Ningbaw langai rai nga ai. Du Daju gaw myu tsaw myit, mung tsaw myit kaba ai wa rai nna nden marai rawng lit la daw dan galaw gwi ai ningbaw langai rai nga ai.

Dai hta sha n-ga Myen, Sam, English, Gala, Japan, Thai, Lahu, Karen amyu ga ni hpe chye shaga nna Chyurum Wunpawng bawsang amyu ni hta na Zaiwa, Lhaovo, hte Lachik ga hpan ni hpe mung chye shaga ai wa rai nga ai. Bai nna, daw hkrawng hpe lapu shatai lu ai hte hpyen ni hpe myi le le nna lam dam mat shangun ai lakle hpaji chye ai wa mung re. Ringja dap hta magam lit gun hpai nga ai ten hta Japan hpyen la marai (6) hpe chyahkrung lu rim ai majaw, Burma Gallantry Medal (BGM) masat shagrau dasik hpe shagrau hkam la lu nu ai.

• C.S Du Up Daju Lahtaw Zau Tu

Ningbaw Kaba Du Daju Lahtaw Zau Seng a kanau majing rai nna asak aprat ram ai hte jawng sara num rai nga ai kanu kaw tsang (2) du hkra laika sharin hkam la lai wa sai. Lahta tsang awng ngut ai ten du hkra Sam mung Kut Hkai ginwang daw Nam Hpak Ka hte Lashio muklum ni hta laika hpaji matut sharin hkam la sai. Yangon dakkasu hta (ISC) du hkra hpaji sharin hkam la sai. Dakkasu lung nga ai ten hta UTC (University Training Corps – တက္ကသိုလ်အရံတပ်ရင်း) hpyen wunkat hta mung sharin la nu ai. 1957 ning kaw nna mungmasa hpaji hpe hka ja let kahpu rai nga ai, Du Daju Zau Seng hte rau rawtmalan hpe woi awn hpang sa wa sai.

1961 ning March (7) ya shani hta Sam mung Lashio asuya gumhpraw dum hpe sa htim gasat la ai shaloi woi awn lai wa sai re. Myen asuya hpyen dap hte KIA shawng nnan gasat ai gasat poi hta woi awn lai wa sai. Dai hpang gasat poi manu mana hpe woi awn gasat lai wa sai. 1961 ning August shata hta Sam mung Ting Ni (သိန်းနီ) ginjaw kawn Jinghpaw mung de rawt sa wa nna Manmaw, Sadung, Mali N Mai Wa Lawng (Mali hte N Mai Hka mazup lahta), Sum Pra Bum, Putao gin ra ni de gahkyin zinlum lam, hpyen masa lam, uphkang lam ni hta woi awn lai wa sai rai nga ai. Du Up Daju lahtaw Zau Tu gaw India, Miwa ni hte hku hkau kyit hkai lam hta mung woi awn wa sai re. 1966 ning hta Law Wai Lu Awng hte dinghku de nna num kasha (2) shaprat sai. Dai hpang 1973 ning hta Labya Seng Tawng hte dinhku bai matut sai.

1973 ning June shata (16) ya shani hta KIA ginjaw shara kawn kahpu Ningbaw Kaba Lahtaw Zau Seng hte hkrum lu na matu, Thai mungdan de hkrunlam hkawm sa wa sai. Ningbaw Kaba hte hkrum zup nna rawtmalan hkrunlam shawng de matut galaw sa wa na lam yan ni hpe bawng ban jahkrup lai wa sai.

V.C.S Du Up Daju Lahtaw Zau Tu gaw 1969 ning hta shagrin ai KIO a Ninggawn Mungmsa Lam Yan hpe gyin shalat ai hta woi awn shang lawm ai re. Jinghpaw mung hte Jinghpaw mungshawa hpe asuya ni e n tara ai hku dip up sha ai npu kaw na lawt lu na matu, Wunpawng Mungdan Shanglawt Hpung (KIO) hpe Ningbaw Kaba Du Daju Lahtaw Zau Seng a (Ningbaw Malai) hku nna lit la lai wa sai re. Du Up Daju gaw marai rawng nna gwi gwi daw dan galaw gwi ai atsam rawng ai wa mung rai nga ai. Myu tsaw myit, mung tsaw myit na jing rawng katu ai wa rai nga ai. Hkum gawng atsam ningja n-gun rawng ai ningbaw hpu-awn langai rai nga ai.

• Lat Du Up Jum Lahtaw Zau Dan

Ningbaw Kaba Du Daju Lahtaw Zau Seng hte V.C.S Du Up Daju Lahtaw Zau Tu yan a kanau majing rai nga ai. Jawng sara num rai nga ai chyinghkai kanu kaw lawu tsang laika hpaji sharin hkam la nna, Sam mung Kut Hkai hte Lashio ni hta lahta tsang laika hpaji matut sharin hkam la ai hpang, Yangon dakkasu hta (BA) janmau gup la nu ai. Jawng lung nga ai ten UTC (University Training Corps – တက္ကသိုလ်အရံတပ်ရင်း) hpyen wunkat sharin ai hte jawng lung nga ai aten kaw nna, Wungpawng Mungdan Shanglawt Hpyen Dap hte matut mahkai galaw nna rawtmalan a matu gahkyin zinlum ai bung li ni hpe galaw nga ai ten asuya e rim zing hkrum ai majaw Lashio htawng hta sharen da hkrum sai re. Hpri tawng kadun langai hte htawng chying hka hpe shana tup nhtoi hkren ret baw jahten kau nna sharen da hkrum ai htawng kaw na hprawng lawt lu mat ai re.

1962 ning hta Wunpawng Mungdan Shanglawt Hpyen Dap (KIA) de du shang wa nna, (GSO-GENARAL STAFF OFFICER) magam lit gun hpai wa sai. 1964 ning hta Sam amyu shayi Srn. Nan Htwi Hkam hte hkungran dinghku de sai. Kasha shadang sha langai hte num kasha langai shangai shaprat sai.

1966 ning hta KIA masat (1) Dap Ba Up hte 1973 ning hta masat (4) Dap Ba Up lit ni hpe matut manoi gun hpai lai wa sai. 1975 ning March (1) ya shani Sam mung Ku Dawng, Mung Maw Man Hai mare hta communist ni hte gasat ai gasat poi hta myu hte mungdan a matu asak ap nawng mat wa sai.

Lat Du Up Jum Lahtaw Zau Dan gaw laika hpaji chye nna myu tsaw myit rawng katu ai prat ram ramma rai nga ai. Mungmasa, hpyen masa lam ni hta kung kyang ai wa rai nga ai. Kahpu yan hte maren hkum gawng ningja n-gun atsam rawng ai wa mung rai nga ai.

https://youtu.be/nafgAGW8Adk?si=4bn-GmEPj2vFsR_j

===

Mahta Shamyet Ai Laika;

ရှယ်လီဆိုင်း။ “ကျမနှင့် တော်လှန်ရေးခရီစဉ်”

===

မြန်မာလိုဖတ်ရှုရန် Link:

https://m.facebook.com/story.php?story_fbid=5729357787077286&id=504361519576965&mibextid=Nif5oz