N Dum Shami Ninggam Sharawt Hpyen Zai Ladat Shamawt Ai KIA Kaning Re Ai Lak Lai Galai Shai Lam Ni A Matu Matut N-gun Dat Sa Wa Na Kun?

– 9 January 2024 – Kachinwaves

အစီအစဉ်အသစ် ဖြစ်ပါတယ်။ မြန်မာလို ဖတ်ရှုရန် link ဆောင်းပါးအဆုံးမှာ ပါရှိပါတယ်။

Gumshem hpyen dap daru magam zing kau ai masum ning ngu na aten ladaw laman hta, 2023 ning gaw Jinghpaw mungdaw a hpyen masa shamu shamawt lam n-gun ja dik ai shaning rai nga ai. 2023 ning a shaning ka-ang hkup shata (6) laman, Jinghpaw mungdaw shara shagu hta gasat poi ni byin ai rai tim, lak lai padang dip lu ai lam gaw n nga ai re. Rai tim mung, hpyen zai ladat hpe n dum shami ninggam sharawt shamu shamawt nna, hpyen wa a dap shara ni hpe gasat padang dip la ai hte, shaning dingsa hpe shakram kau da ai zawn; shaning ningnan hpe mung padang dip ai hte hkap tau la ai KIA gaw, kaning re ai lak lai awng padang lam ni hpe matut shabyin sa wa na kun? Ngu ai hpe maju jung yu maram ra na shaning rai nga ai.

Lai mat wa sai shaning July shata hta, gumshem hpyen dap a hpyen hpung ni KIA ginjaw ginra Laiza maga shadut lung wa ai kaw nna, majan sat lawat gaw gau ngwi ngwi laja wa ai re. Myitkyina – Man Maw modo lam mayan ni hta hpyen n-gun shadut lung wa ai gumshem hpyen dap ni hte KIA hpyen hpung ni majan alang lang byin wa nna, July shata htum wa maga hta gaw hpyen shamu shamawt lam grau law wa ai aten rai nga ai.

Laiza ginra ni hta majan sat lawat kahtet wa nga ai ten, KIA gaw Hpakant maga de na hpyen wa a dap shara ni hpe htim gasat ai lam galaw nna, August shata 7 ya shani hta Kasen Bum (ကသိုဏ်းတောင်) hpyen dap hpe padang dip zing la lu ai hte lak nak, arung arai ni hpe mung zing madu la lu sai re.

Gumshem hpyen dap gaw shi hpe madi shadaw ai ni a Laiza hpe gasat zing kau ra ai ngu grang dakat shadut ai lam ni hpe n-gun la nna, majan masing hte gasat lung wa ai rai tim, lu tawn da ai hpyen dap ni hpe pyi tat sum kau ra nu ai. Majan masing hte shamu shamawt lung wa ai gumshem hpyen hpung ni yawng sum agrawp wa ai hpang, hpyen yen mungshawa ni shingbyi nga ai Mung Lai Hkyet hpyen yen dabang hpe bawm kapaw gasat ai lam gaw: gumshem hpyen dap a kaya pawt pawt let masin shakawp la ai lam rai nga ai. Mung Lai Hkyet hpyen yen mungshawa ni si sum machyi hkrum ai hpang KIA gaw, gumshem hpyen dap a dap shara ni hpe padang dip zing la lu ai gasat poi ni hpe shabyin dat sai re.

September 20 ya shani, Myitkyina – Sum Pra Bum modo lam Daru hka mahkrai makau kaw dung ai gumshem hpyen dap hpe, KIA hte Kagabu People`s Force (KPF) pawng hpawm hpung ni lawm nna sa htim gasat padang dip zing la lu sai.

October 18 ya shani Shwi Gu – Man Maw modo lam lapran na Nga Bat Ji (ငါးဘတ်ကြီး) mare hta dap shara jahkrat nga ai gumshem hpyen dap a Ta Wa Tai (တာဝါတိုင်) kawng na dap, October 19 ya shani hta gaw, Sam mung ding dung daw Mung Gu mare makau kaw na Ying La bum hpyen dap ni hpe, KIA hte pawng hpawm hpyen hpung ni htim gasat padang dip la lu sai re.

October 20 ya shani hta mung, N Mawk ginwang daw hte Wai Maw ginwang daw lamu ga jarit matu, Myitkyina – Man Maw modo lam kaw na gumshem hpyen dap a ahkyak ai dap shara langai rai nga ai, Lai Lum (Aung Ja) hpe padang dip zing la lu sai.

October 31 ya shani hta gaw, Myitkyina – Manmaw modo lam Gang Dau Yang mare kaw na dap hpe AA (Rakhaing) hte pawng hpawm hpyen hpung ni lawm nna, padang dip gasat la lu sai. Gang Dau Yang hpyen dap hpe tat sum kau ai hpang, gumshem hpyen dap gaw Laiza muklum makau Alen Bum de nbung li bawm wa jahkrat ai hta sha n-ga, muklum kata de mung lanak kaba ni hte gap bun ai lam ni galaw lai wa sai.

Rai tim KIA a hpyen shamu shamawt gasat ai lam gaw n hkring mat ai sha, gumshem hpyen dap ni hpe matut manoi gasat zing taw nga ai. November shata hta gaw masat (2) dap ba ginra rai nga ai, Danai ginwang daw, Ta Lu (တလူး) mare maga na gumshem hpyen dap, Mogaung ginwang daw na Saba Ji Kawng, masat 8 dap ba ginra, Monyin ginwang daw na Ba Lu (ဘီလူး) mare, Shwi Gu ginwang daw, Myo Hla mare makau kaw na Shwi Nying Shan (ရွှေငြိမ်းချမ်း) hpyen dap ni hpe matut manoi gasat zing la wa sai re. Dai hta sha n-ga, Sam mung ding dung daw, Kut Hkai ginwang daw, Man Hpa kaw dap jung ai gumshem hpyen dap hpe mung, November 17 ya shani gasat padang dip la sai re.

2023 ning hpang jahtum December shata du hkra majan sat lawat ni gaw yawm wa ai lam n nga ai. December 13 ya shani KIA masat 8 dap ba gaiwang kata rai nna, Jinghpaw mung hte Sagaing ginra jarit mayan kaw na Maw Lu (မော်လူး) mare hpe padang dip la ai gasat poi hta mung shang lawm sai. Dai zing la lu sai Maw Lu mare hta, NUG asuya gaw uphkang lam hpe hkrang shapraw galaw nga sai hpe chye lu ai.

December 15 ya shani hta gaw Myitkyina ginwang daw, Da Law mare hte Wai Maw ginwang daw, Baw Sa Di mare kaw na gumshem pyi tu tsit hpyen dap ni hpe, KIA hte pawng hpawm dap ni htim gasat zing la lu sai. Da Law mare hte makau grup yin shara ni hpe KIA kawn, matut shara la hkang zing nga ding yang rai nga ai lam, shawng lam shiga na chye lu ai ni hte ginra masha ni kaw na chye lu ai.

December 20 ya shani gaw Sam mung ding dung daw, Kut Hkai ginwang daw, Nam Hkai hka mahkrai shagyit hte December 30 ya shani hta gaw Nam Hpak Ka mare makau kaw na, Hk. L. Y (123) dap ni hpe sa htim gasat padang dip la ai lam hte, 2023 ning hpe jahtum gin chyum dat la manu ai.

Mungdan daru magam zing ngut ai hpang, gumshem hpyen dap gaw lai mat sai shaning ni hte n bung ai sha, Jinghpaw mungdaw hta mung hpyen dap shara ni hpe tat sum kau ra ai hta sha n-ga; November 21 ya shani hta gaw shaning na na dap jung nga lai wa sai, N Jang Yang ginwang daw kata kaw na hpyen dap shara masum hpe sa htim gasat hkrum ai lam n nga ai rai tim, tsep kawp dawm la kau manu ai. Dai zawn sha Machyang Baw ginwang daw, N Hka Ga mare hta shaning hku nna dap jung nga lai wa sai, gumshem hpyen dap hpe mung, htim gasat hkrum ai lam n nga ai rai tim, December 19 ya shani dawm la kau manu ai.

KIA gaw Jinghpaw mungdaw kata hta sha n-ga Sagaing ginra hta na, mare, muklum ni rai nga ai, Kaw Lin (ကောလင်း) hte Hkam Pat (ခါမ်းပါတ်) shara ni hpe htim gasat padang dip la ai gasat poi ni hta mung, pawng hpawm shang lawm lai wa sai. Kaw Lin muklum hpe November 3 ya shani, Hkam Pat mare kaba hpe November 7 ya shani padang dip zing la lu sai re. Dai hpang November 8 ya shani kaw nna gaw, Hti Jai muklum shagrawt majan hpe hpang dat sai.

Lai mat sai shaning hta hpyen wa a dap shara ni htim gasat zing la ai majan ni shabyin ai hte mare, muklum ni hpe htim gasat ai shagrawt majan poi ni hta shang lawm nga ai KIA gaw, 2024 ning January praw 1 ya shani nan; Sam mung ding dung daw, Mung Myit ginwang daw, Man Bat kahtawng makau kaw na gumshem hpyen dap hpe padang dip la ai hte, shaning nnan hpe hkap tau la dat sai.

KIO tingyang up, KIC ningbaw kaba Du Daju Jum Nban La a shaning nnan shakram mungga hta mung, “2024 ning hta lak lai galai shai ai lam byin pru wa mai ai ngu maram lu ai.” nga nna lawm nga ai. Shaning htum wa maga de mung hpyen wa a dap shara ni hpe matut manoi padang dip zing la ai zawn, shining nnan hpe mung padang dip ai gasat poi hte ninghpaw shakram dat ai KIA; kaning re ai lak lai galai shai lam ni a matu n-gun dat sa wa na ngu ai hpe, yu maram ra na shaning rai nga ai.

===

မြန်မာလိုဖတ်ရန် Link:

https://fb.watch/psH7stO1qO/?mibextid=Nif5oz

===