Wandap Kata Ahkyak Ai Hpunjum, Dinghku Kata Ahkyak Ai Num Kawn Mungdan Kata Ahkyak Ai Kanu Num De

:

–

Wandap kaw wan grung nga na, ja nga na matu a hkyak dik htum gaw hpunjum rai nga ai. Hpunjum ngu ai gaw, lai sai ten na Wunpawng sha ni a nga sa lai len hta nta madu wa dung ai wandap hta madung mu lu nga ai re. Galang lang shat shadu wandap hta wan si mat yang hpunjum kaba nga ai wandap kaw na wan n-ga hte wan htawt wut la ai re. Bai nna nta masha ni yawng yi sa ra ai shaloi rai tim, yi kaw na nta de bai wa yang wan wut n yak na matu greng ai hpunjum shing nrai, greng ai wan n-ga ni hpe dap hte ka-up lup tawn da nna shana de yi na wa yang, dai up tawn da ai wan-up wan hte wan bai wut la nna shadu lu shadu sha lai wa sai re. Dai hta sha n-ga, nta ting hpe jahtoi ya shalum ya nga ai re. Dai majaw hpunjum akri n rawng ai, hpun jahkraw chyangawp rai yang, wandap gaw chyahkring sha wan grung nna bai krawp mat ai re. Nau n hkraw ai, madi katsing ai hpunjum ni rai yang mung wandap gaw wan grung yak nna wan hkut law, wan n sa gaw kya re ai majaw hpa shadu timung n hkut hkraw, kashung nna wan kra na mung wanhkut a majaw wan kra n pyaw nga ai re.

Dai hpe yu yang, “Wan kanu gaw hpunjum, dinghku kanu gaw num” ngu ai ga malai gaw wandap a matu hpunjum ahkyak madung rai nga ai zawn, anhte Wunpawng myusha ni a nga pra masa lam hta hkan nna, dinghku num ni hpe wandap kata na hpunjum a ahkyak ai lam hte ga shadawn jaw tawn ai lam rai nga ai. Dinghku langai a hpunjum gaw dai dinghku a kanu num rai nga ai. Dinghku langai ngang grin na, dinghku lum na, dinghku kata myit hkrum myitra rai na, mayu, dama, hpunau ni yawng hpe zimlum nna, hpyenhpyen papa nga pra lu na matu, dai dinghku a dinghku num gaw ahkyak madung rai nga ai nga nna, ndai ga malai hpe kasha num kasha ni hpe sharin achyin shadum jahprang ai ten ni hta madung jai lang ai nga ai re.

Raitim, ndai ga malai hpe masha nkau mi gaw amyu shayi num ni a lit gaw dinghku shalum na matu madung re hku sha chye na hkam la nga ma ai. Amyusha lam, mungdan mungmasa lam ni hte kaga shawa wuhpung wuhpawng hte seng ai, magam bungli ni hta mung madung ahkyak nga ai hku n myit n sawn tawn da nga ma ai.

Daini na prat masa, byin da masa ni hta hkan nna, ndai ga malai hpe lachyum hpyan ai, chye na ai lam, sawn shapraw ai lam hpe bai dinglik yu mai nga ai. Anhte a wuhpung wuhpawng hta, amyu shayi num ni gaw, dinghku ngu ai madin hpe lai di nna, hpaji lam, hkamja lam, sut hpaga lam, mungmasa lam ni hta shanglawm, woi awn, daw jau apnawng nga ai ni law law rai nga sai. Dinghku hpe hkrai shalum ai ni n re sha, amyu mungdan hpe shalum lu, jahtoi lu ai kanu num, hpunjum ni mung rai nga ai hpe mu mada lu nga sai.

Dinghku gaw mungdan langai a kaji dik htum ai dawchyen (cell) langai rai nga ai. Dai majaw mungdan langai amyu langai a kaji dik ai (cell) dinghku kaw kanu num ni ahkyak ai lam hpe chye na ai zawn, mungdan langai ngwi pyaw na lam hta mung, amyu shayi kanu num ni a shanglawm, woi awn ai lam ni gaw: wandap kata na hpunjum, dinghku kata na num ni ahkyak ai zawn sha ahkyak nga ai lam hpe chye na ra ai prat masa rai nga sai law.