Kanu Bung Jaw Jaw Yang Kasha Mung Bung Jaw Jaw Ai

:

:

–

Bung jaw jaw ai ngu ai gaw, amyu shayi num ni baw kara hpe gyit majaw tawn da ai hpe ngu ai re. Kanu Bung Jaw Jaw Yang, Kasha Mung Bung Jaw Jaw Ai; ga malai a lachyum gaw Kanu galaw ai lai sat lai sa hpe kasha (num kasha) ni mung dai zawn hkan galaw ai lam re. Ndai ga malai gaw kashu kasha ni Kanu kaw na kasi kaja lu la mai ai zawn, n kaja ai kasi ni hpe mung lu la chye ai hpe shadum da nga ai. Raitim num kasha/la kasha, kadai mi rai rai, kashu kasha ni “Ai” n rai yang, Kanu a majaw re ngu mara tam, mara shangun ai ten ni hta grau nna jai lang chye ma ai.

Kanu a arawn alai, tsun shaga ai ga, nga sat nga sa lam ni, myit sawn ai lam ni, sharin achyin ai lam ni gaw, kasha ni kaw dandawng wa ai lachyum re.

Dai re ai majaw, masha nkau mi gaw, ndai ga malai hta mahta nna, kashu kasha ni maka n kap, myit n su yang Kanu myit n su, maka n kap ai majaw, Kanu a majaw re ngu mara shagun ai, asawng ai, tsun jaw, tsun jahpyak ai lam ni mung nga nga ai re.

Rai timung, dinghku kata hta kashu kasha ni, myit n su, shaga n madat re ai hpe Kanu ni hpe hkrai mara shagun ai gaw n jaw nga ai. Maga mi de, “Kawa n-gang hpye yang kasha mung n-gang hpye ai” ngu ai ga malai mung nga nga ai re. Kawa ni mung kashu kasha ni hpe kasi kaja madun dan ra ai lam hpe shadum da ai ga malai mung rai nga ai.

Tatut sak hkrung lam hta Kanu Kawa grai kaja, grai myit-su ai raitimung, makau grup-yin manaw manang, prat masa ni a majaw hten mat ai, za mat ai ni mung law law rai nga ai. Kanu/Kawa ni a mara hkrai mung n rai nga ai.

Tsun ga nga yang, kashu kasha ni mai kaja ai kyang lai len myit jasat jasa ni hte galu kaba wa na matu Kanu yan Kawa lahkawng yan hpe tsun shadum da ai ga malai yan rai nga ai. Kanu ni a ahkyak ai lam hpe htawng madun dan ai zawn, Kawa ni mung lit nga ai hpe malap n mai nga ai.

Ndai ga malai hpe yu yang, anhte Wunpawng myusha ni a htunghking, dinghku, shinggyim nga pra wuhpung wuhpawng kata hta amyu shayi num ni, grau nna gaw Kanu num ni mung woi awn kasi tai na shara kaw nga nga ai hpe mu lu nga ai.

Dai re ai majaw, kaja ai, hkrak ai, sari hte hpring ai wuhpung wuhpawng hpe gawgap mayu yang, dai wuhpung wuhpung kaw nga ai, amyu shayi Kanu num ni hpe ahkyak shatai, manu shadan, hkungga tsawra nna shanhte woi awn kasi kaja tai ai Kanu num ni tai lu na matu madi shadaw, pawm ya, shara jaw na matu ra ahkyak nga ai masa mung rai nga ai law.