Sadi Run Ai Du Seng Tu

–

Wunpawng Mungdan Shanglawt Hpung (KIO) hte Wunpawng Mungdan Shanglawt Hpyen Dap (KIA) hpe woi awn hpaw hpang lai wa sai, Share Shagan kahpu kanau yan rai nga ai; Ningbaw Kaba Du Daju lahtaw Zau Seng, Kanau VCS Du Up Daju Lahtaw Zau Tu hte Amumadu Salang Kaba Pungshwi Zau Seng ni gyam sat kau hkrum ai lam hpe shawng na Jinghpaw Lamang ni hta e tang madun mat wa sai re. Ndai bat hta gaw sadi run nna, dai ningbaw ningla ni hpe gyam sat kau ai, Du Seng Tu (Tu Bung) a lam hpe sawk tam hti lu ai laika hti hpe mahta nna, tang madun mat wa na nngai.

Du Seng Tu (Tu Bung) gaw, Laiza Muklum makau, Na Lung mare na rai nga ai. KIO/KIA hta magam garai n-gun shi yang shi gaw, 1972 ning hta Yangon Dakkasu kaw jawng lung ngut ai hpang, Myenmung Socialist Pati (M.S.L) asuya a kyin-yu (Spy) bungli hpe sharin hkaja la wu ai. Dai ngut ai hpang, Myitkyina hta e modo gawn hkang magam bungli galaw ai re. Dai hpang, KIO/KIA de shang ai. Du Wunkat lung la nna Lat Du kaw na Du arawng aya hpe shalun hkamla nu ai.

Du arawng aya lung ai hte shi gaw V.C.S Du Up Daju Lahtaw Zau Tu a asak sin magam bungli gun hpai lai wa ai re. Dai hpang KIO/KIA gan shanu nga ai, Thai Mungdan Htam Ngawp bum camp dabang hta amu gunhpai taw ai shaloi, Dap kata na hpyen gyi hpyen ma ni hpe kahkyin ahpyawp la nna, Hpri Gang Ramma Hpung ngu shawng nnan sadi run magam hpe hpang sa wa ai lam; Du Kaba Labya Naw Din ka da ai, Dingda Ginwang Ginjaw, Masat (4) Dap Ba, KIO/KIA rawt malan hkunlam Labau laika buk hta mu hti lu ai re.

Dai zawn sadi run na Wuhpung hpaw ai hpang, Du Up Daju Lahtaw Zau Tu a ta ka laika hte ta masat (sign) htu ai ni hpe bung pre hkra shaman la ai. Dai zawn ta masat masu galaw nna Chiang Mai Gumhpraw Dum kaw na Bath gumhpraw sen masum e mun mali (340,000) lagu masu shaw la hpang wa ai. Du Seng Tu woi awn let sadi run ai labau ni hpe Wunpawng Mungdan Shanglawt Asuya laika sharin jawng a sharin shara langai rai nga ai Sr. La Nan mung tsun dan ai re.

Du Seng Tu a akyang sat lawat hte seng nna mung shi gaw ya na zawn tsun ai, “Anhte myusha shada le i, grau nna tinang hta kaba ai ni hpe dai hku galaw kau yang gaw, anhte maga na jahkrum bawng ban da ni nga re majaw, shi hpa baw ni lu galaw na ngu ai yawng hkra nga chyalu re majaw i shi kaw ndai ningbaw shara de du wa chyalu ngu ai, dai hku ding re myit marin na galaw ai le i. Shi mahtang ningbaw galaw mayu ai. Ding re shi ntsa kaw grau grau na shi hta chye chyang wa ai ni hpe n nga shangun mayu ai, htawm hpang de rai timung, anhte ding re ai lam ni gaw ndai anhte myit san seng ai lam ni n nga yang gaw, myit marin ai ni myit magaw myit ni rawng yang gaw, ding-re manghkang ni byin wa chyalu re. Dai majaw, anhte shawng kaw byin lai wa sai, ding re ni hpe kasi kaja la let le i, htawm de hpang de anhte shada wuhpung wuhpawng kata kaw dai hku zwn re ni n byin hkra, ndai shawng de byi lai wa ai ningbaw ninglaw shawng na ndai ni hpe kasi la na she anhte sakhkrung hkawm sa shawng lam de, jawt jat wa yang kaja ai ngu mu mada ai.”

Hpang jahtum gaw Du Seng Tu hte sadi run ai Hpri Gang Ramma hpung ni Myen Mung de bai hprawng sa wa yang, Thai Balik (pyada) ni rim kau ai hkrum nna, Chaing Mai htawng hta sharen da ai kaw na KIO/KIA a lata hta bai ap kau hkrum ai hte Wunpawng Mungdan Shanglawt Hpung a hpyen tara hte maren je yang daw dan si ari jaw kau hkrum ai hpe labau laika buk ni hta mu lu ai re.