Mungkan Nga-rai Hte Bung Ai Chya Hpyen Bungli A Mahkam

.

–

Prat dep ladat hpaji ni lani hte lani rawt jat wan ga ai zawn, masu hkalem sha ai tara n lang ai gumhpraw tam sha ai wuhpung ni mung, prat dep ladat hpaji ni hpe jai lang nna gumhpraw tam bungli galaw nga ma ai re. Dai hta nang ngai yawng ngu na daram na ga taw nga ai, Chya hpyan ngu ai a lam hpe ngai Ah Pan hku nna sang lang dan mat na nngai.

Chya Hpyan ngu ai gaw Miwa ga Zhapian hpe tsun ai re. Zhapian hpe ga gale yu yang masu hkalem ai, gumhpraw masu ai ng anna, lachyum rawng nga ai.

Gumhpraw hpe masu hkalem la ai bungli re hte maren, Sinna mungdan na asak 40 ning lahta gumhpraw lu ai masha ni hte magam gun usa ni hpe hku hkau kanawn masu nna, gumhpraw sen kaba masu hkalem la lu na matu shakut bungli re. Nkau mi gaw ya na Facebook, Telegram hta mu lu ai game hpan ni hte gumhpraw masu ai bungli ni hpan ni mung, ndai Chya Hpyan bungli hta lawm nga ai.

Chya Hpyan bungli hpe; bungli hpung hpan masum garan da nna online pinra ni hpe jai lang ai ladat hpaji ni hte masu hkalem sha ai re lam chye lu ai.

Ladat hpaji (technical) hte seng ai hpung ni gaw amyu shayi sha tsawm tsawm re ai sumla ni hte online nta (account) hpaw ya ai. Finding ngu ai tam sawk hpung ni gaw, hkalem la na masha ni a gmail (email), fung nambat dai zawn re ai matut mahkai hkringdat ni hpe sawk sagawn ya ai. Bai nna, Chatting ngu ai masu hkalem jahta la na hpung ni gaw tinang hkalem la na masha wa, tinang hpe kam hpa wa hkra masu hkalem la ai ndai lam ni rai nga nna, Chya Hpyan bungli a lam hpe chye na tawn da ai Thai mungdan jarit Tachileik kaw na mungmasha langai tsun ai re.

Ndai Chya Hpyan bungli hta galaw na matu shata shabrai law law jaw ai hku nna bungli tam yak ai hte shabrai gumhpraw law law n lu ai mungdan hkan na asak aprat ram ai shayi shadang ni hpe masu hkalem la ai re hpe chye lu ai.

Dai majaw nkau mi gaw yakhkak lam a majaw ndai bungli hpe galaw ai ni nga ai zawn, nkau mi gaw masu hkalem hkrum nna ndai bungli hpe shang galaw ra mat ai ni mung nga nga ai hpe chye lu ai.

Dai majaw, ndai Chya Hpyan bungli gaw mungkan hta tara n shang ai gumhpraw tam lam rai nga ai. Chya Hpyan bungli ni hpe tara upadi ka-up lam n nga ai Myanmar mungdan zawn re ai mungdan ni hta madung shara jahkrat galaw nga ma ai hpe mung chye lu ai.

Ndai Chya Hpyan bungli kaw bungli shang hkrup ai hte gaw mungkan ga na ngarai hkrat ai zawn re nga nna, mahkrum madup nga ai ni tsun ai kaw na chye lu ai. Dai zawn bungli masha ni hpe uphkang ai ni gaw Miwa ni rai nna, bungli hta ga shaga shut ai, fung lagu lang ai, bungli hte n seng ai tsun shaga hkrup ai shaloi, myihprap wan hte madi zing-ri ai, si wa na daram gayat zing-ri ai, dawng kru daram sha kaba ai gawk kaji hta shingdang sharawng tawn da ai lam ni a majaw, kadai n chye ai asak si sum mat ai ni pyi nga ai lam hpe chye lu ai. Dai hta sha n-ga hkam sharang n lu ai majaw, tinang hkrai sat si ai mabyin ni mung byin nga ai hpe chye lu ai.

Chya Hpyan bungli shaga ai hte seng nna ndai sumroi hpe ka ai ngai Ah Pan nan mung 2021 ning hta hkrum kadup ga ai hku re. Kaning re ai i nga yang; manager re nga nna shi hkum shi tsun ai marai langai mi gaw, Miwa ga n chye tim English ga chye ai rai yang, shata shabrai lap sen 20 jan yawm dik jaw ai nga nna Facebook messenger hku matut mahkai shaga wa ai hpe hkrum katut ga ni ai. Bai nna, galaw ra na bungli gaw, company a stock shares ni hpe sinna mungdan na masha ni mari mayu arang bang wa hkra hkalem ra ai lam tsun wa ai re.

Ndai Chya Hpyan bungli hta Myanmar mungdan masha ni sha n rai, India, Cambodia, Vietnam, Lao mungdan masha ni mung masu hkalem hkrum nna n tara ai hku “shingma ntsa mam ting” zing-ring yam sha hkrum nga ai lam hpe shiga ni hta mung law law wa tang madun dan nga sai re.