ဗန်းမော်မြို့နယ် ကောင်ဂျာယန် ကာကင်းစခန်းကို KIA က သိမ်းပိုက်

–

ကချင်ပြည်နယ်၊ ဗန်းမော်မြို့နယ် ကောင်ဂျာယန် ကာကင်းစခန်းကို ယနေ့သြဂုတ်လ ၂၀ ရက်နေ့ ညနေပိုင်းတွင် ကချင်လွတ်မြောက်ရေးတပ် KIA နှင့် ပူးပေါင်းတပ်ဖွဲ့တို့က သိမ်းပိုက်လိုက်ပြီး နယ်မြေရှင်းလင်းရေးများ လုပ်ဆောင်နေကြောင်း KIO ၏ သတင်းနှင့် ပြန်ကြားရေးဌာနက သတင်းထုတ်ပြန်ထားသည်။

ကောင်ဂျာယန်တပ်စခန်းသည် မန်စီမြို့ စောင့်တပ် ခမရ (၃၁၉) နှင့် ခလရ (၆၀၁) တို့၏ ကာကင်းစခန်းတစ်ခုဖြစ်ကြောင်း သိရသည်။ အဆိုပါ ကောင်ဂျာယန်တပ်စခန်းမှ စစ်ကောင်စီတပ်သားများသည် မန်စီတပ်ရင်းများထံသို့ ဆုတ်ခွာပူးပေါင်းသွားကြောင်း KIO သတင်းဌာန၏ဖော်ပြချက်အရ သိရသည်။

အလားတူ သြဂုတ်လ ၁၉ ရက်နေ့တွင်လည်း ဗန်းမော်မြို့လုံခြုံရေးနှင့် မိုးမောက်မြို့စောင့်တပ်ဖြစ်သည့် ခမရ (၄၃၇) တပ်ရင်းကို KIA နှင့် ပူးပေါင်းတပ်တို့က တိုက်ခိုက်သိမ်းပိုက်နိုင်ခဲ့ပြီး နယ်မြေရှင်းလင်းရေးများလုပ်ဆောင်ခဲ့ကြောင်း သိရသည်။