မြစ်ကြီးနားတွင် ဆေးခန်းမှ ပြန်လာသော အမျိုးသမီးတစ်ဦး လုယက်ခံရ၊ ဘောလုံးကစားနေသည့် လူငယ် ၃ ဦးလည်း သေနတ်ထောက် ဖမ်းဆီးခံရသည်ဟု ဆို

10 May 2024 – Kachinwaves

ကချင်ပြည်နယ်၊ မြစ်ကြီးနားမြို့ စီတာပူရပ်ကွက် နောင်ရာပါ ဘောလုံးကွင်ပြင်အနီးတွင် ယနေ့ညနေ ၅ နာရီခန့်၌ ဆေးခန်းမှပြန်လာသော အမျိုးသမီးတစ်ဦး လုယက်ခံရကြောင်း သိရသည်။

ဆေးခန်းမှပြန်လာသော ၎င်းအမျိုးသမီးအား Green Bird စားသောက်ဆိုင်အနီးရှိ လမ်းခုလပ်တွင် Mask အနက်ရောင် တပ်ထားသည့် အမျိုးသား ၃ ဦးက လုယက်ခဲ့ခြင်းဖြစ်ပြီး လက်ဆွဲအိတ်အတွင်းမှ ဆေးစာအုပ် ဖုန်းနှင့် ငွေသားများ လုယက်ခံသွားရကြောင်း သိရသည်။

လုယက်ခံရသောအမျိုးသမီးလည်း လက်ဆွဲအိတ် ဆွဲလုခံရစဉ် ဆိုင်ကယ်ပေါ်မှာ ပြုတ်ကျ၍ နံရိုးအနည်းငယ် ထိခိုက်သွားကြောင်းလည်း သိရသည်။

အလားတူ မြစ်ကြီးနားမြို့ တပ်ကုန်းရပ်ကွက်တွင်လည်း ယနေ့ ညနေ ၆ နာရီခန့်က ဖူဆယ်ဘောလုံး ကစားနေသော လူငယ် ၃ ဦးကို အမျိုးသား ၄ ဦးက သေနတ်ထောက်၍ ဖမ်းခေါ်သွားကြောင်း သိရသည်။

မြစ်ကြီးနားမြို့တွင် ယခုရက်ပိုင်းအတွင်း လုယက်မှုများပြားလာပြီး လုယက်မှုအတွင်း ခေါင်းဖြတ်အသတ်ခံရသည်အထိ ဆိုးရွားလာကြောင်းဒေသခံများက ပြောသည်။