မြစ်ကြီးနားမြို့မှာ ဆိုင်ကယ်စီးနေတဲ့ ဇနီးမောင်နှံနှစ်ဦး ပစ်သတ်ခံရ

4 April 2024 – Kachinwaves

မြစ်ကြီးနားမြို့မှာ ဒီမနက် ၅ နာရီဝန်းကျင်က သေနတ်နဲ့ပစ်ခတ်ခံရလို့ ဇနီးမောင်နှံနှစ်ဦးသေဆုံးတဲ့ ဖြစ်စဉ်ဖြစ်ခဲ့ကြောင်း သိရပါတယ်။

အထုပ်အပိုးတွေနဲ့ ဆိုင်ကယ်စီးနင်းလာတဲ့ ဇနီးမောင်နှံနှစ်ဦးကို အမည်မသိသေနတ်သမားတွေက ပစ်ခတ်သွားလို့ အမျိုးသားဖြစ်သူဟာ အခင်းဖြစ်နေရာမှာ ပွဲချင်းပြီးသေဆုံးသွားပြီး အမျိုးသမီးဖြစ်သူကတော့ ဆေးရုံရောက်ပြီးနောက် မနက် ၈ နာရီလောက်မှာ သေဆုံးသွားခဲ့တယ်လို့ လူမှုကူညီရေးအသင်းနဲ့နီးစပ်သူတစ်ဦးထံက သိရပါတယ်။

“အမျိုးသားက ပွဲချင်းပြီး၊ အမျိုးသမီးက ဆေးရုံထိ စကားပြောနိုင်သေးတယ်။ ဆေးရုံရောက်လို့ ခွဲစိတ်ဆောင်ကို ပို့ပြီးမှဆုံးတာ”

အမျိုးသားဖြစ်သူရဲ့ ဘယ်ဘက်ပါးနဲ့ လည်ချောင်းပြွန်တို့မှာ သေနတ်ဒဏ်ရာ ၂ ချက်တွေ့ရပြီး၊ အမျိုးသမီးဖြစ်သူရဲ့ ဘယ်ဘက်ရင်သားမှာ ၁ ချက်၊ ရင်အုံမှာ ၃ ချက် သေနတ်ဒဏ်ရာတွေ တွေ့ရှိရတယ်လို့ ဆိုပါတယ်။

အမျိုးသမီးမသေဆုံးမီက သူတို့ဇနီးမောင်နှံဟာ စီတာပူရပ်ကွက်မှာပဲ နေထိုင်တယ်လို့ ပြောသွားခဲ့ကြောင်းနဲ့ သေဆုံးသူနှစ်ယောက်ဟာ အသက် ၄၀ နှစ်ဝန်းကျင်အရွယ်တွေဖြစ်ကြတယ်လို့ သတင်းရင်းမြစ်က ဆိုပါတယ်။