မြစ်ကြီးနားမြို့ လေယာဥ်ကွင်းအနီးတစ်ဝိုက် လက်နက်ကြီးပေါက်ကွဲသံများ ကြားခဲ့ရသည်ဟုဆို

8 March 2024 – Kachinwaves

ကချင်ပြည်နယ်၊ မြစ်ကြီးနားမြို့ရှိ လေယာဥ်ကွင်းအနီးတစ်ဝိုက်တွင် ယနေ့ည ၈ နာရီခွဲခန့်၌ ပြင်းထန်သော လက်နက်ကြီးပေါက်ကွဲသံများ ကြားရကြောင်း ဒေသခံတစ်ဦးက ပြောပြသည်။

“ပေါက်ကွဲတာ လေယာဥ်ကွင်းဘက် ဟုတ်တယ်။ ၃ ချက်တောင်မြည်တာ။ နောက်ဆုံးအချက်ဆို အကျယ်ကြီးပဲ ကျွန်မတို့အိမ်တွေတောင် တုန်ခါသွားတာ။” ဟု ပြောပြသည်။

မြစ်ကြီးနားလေယာဥ်ကွင်းသည် ယမန်နေ့ မတ်လ ၇ ရက်နေ့ နံနက်ပိုင်းတွင်လည်း ရှော့တိုက်ဒုန်းများဖြင့် ပစ်ခတ်ခံခဲ့ရပြီး ယနေ့ညတွင်လည်း ထပ်မံတိုက်ခိုက်ခံရခြင်း ဖြစ်သည်။

အလားတူ မတ်လ ၇ ရက်နေ့က ကချင်ပြည်နယ် ဗန်းမော်မြို့ရှိ လေယာဥ်ကွင်းလည်း ပစ်ခတ်ခံခဲ့ရပြီး ဗန်းမော်မြို့၏ လေကြောင်းခရီးစဥ်များ ရက်အကန့်အသတ်မရှိ ပိတ်ပင်ထားကြောင်း သိရသည်။