ရှမ်းမြောက် မဘိမ်းမြို့ကို KIA နှင့် PDF တို့ သိမ်းပြီ

21 January 2024 – Kachinwaves

ရှမ်းပြည်မြောက်ပိုင်း၊ မဘိမ်းမြို့ကို KIA နှင့် တော်လှန်ရေးပူးပေါင်းတပ်ဖွဲ့များ ယနေ့နံနက်ပိုင်းတွင် သိမ်းပိုက်ရရှိလိုက်ပြီဖြစ်ကြောင်း သိရသည်။

မဘိမ်းမြို့သိမ်းစစ်ဆင်ရေးကို ယမန်နေ့နံနက် ၅ နာရီဝန်းကျင်ကစပြီး တော်လှန်ရေးပူးပေါင်းတပ်ဖွဲ့များ တိုက်ပွဲဆင်နွှဲခဲ့ပြီးနောက် ယနေ့နံနက်အစောပိုင်းတွင်း ရရှိခဲ့ကြောင်း တိုက်ပွဲတွင်ပါဝင်သည့် တော်လှန်ရေးတပ်ဖွဲ့ဝင်တစ်ဦးက ဆိုသည်။

“မဘိမ်းမြို့မှာက စစ်တပ်စခန်းကုန်းနဲ့ ရဲစခန်းကုန်းပဲရှိတယ်။ မနေ့က စစ်တပ်ကုန်းကိုသိမ်းတယ်။ ရဲစခန်းပဲကျန်တာက ခုရသွားပြီ။ အားလုံးဘေးကင်းရာကို ဆုတ်နေတယ်။ လေယာဉ်လာမှာကြောင့်”

ရဲစခန်းမှာ မဘိမ်းမြို့အတွင်းတွင်ရှိပြီး စစ်တပ်ကုန်းမှာ ကုန်းမခံကျေးရွာထိပ်တွင် တည်ရှိကြောင်းသိရသည်။

အဆိုပါမြို့သိမ်းတိုက်ပွဲတွင် KIA၊ ရွှေကူ PDF တို့ ပူးပေါင်းတိုက်ခိုက်ခဲ့ကြောင်း သိရသည်။

တော်လှန်ရေးတပ်များသိမ်းယူနိုင်ခဲ့သည့် မဘိမ်းမြို့မှာ လက်ရှိမြို့သိမ်းတိုက်ပွဲဖြစ်ပွါးနေသည့် မိုးမိတ်မြို့နယ်နှင့်လည်း ထိစပ်နေသည်။