Mung Maden Ni A Jebat Lam Ngu Masat Hkrum Ai “Federal” Ndai Galang Gara Hku Hparan Na?

2 January 2024 – Kachinwaves

အစီအစဉ်အသစ် ဖြစ်ပါတယ်။

မြန်မာလို ဖတ်ရှုရန် link ဆောင်းပါးအဆုံးမှာ ပါရှိပါတယ်။

Munghpawm mungdan rudi amyu ni a federal ra sharawng ai lam hpe maigan mungdan ni a jebat ai lam re ngu n tsen n hten ai hte, munghpawm kaw na garan pru na lam, mungdan daw hka wa na lam re ngu hkam la tsun shaga ai ni hta gumshem hpyen dap hpung ni sha n rai; mungmasa pati ningbaw ni mung lawm lai wa sai re. Dai ni na mungmasa hkrun lam hta mung, Federal (munghpawm jet jet) hpe myit hkrum lu na kun ngu ai gaw, nau n na ai aten ladaw hta ta tut hparan la ra na, mungmasa mang hkang rai nga ai.

Myen mung awmdawm shanglawt lu ngut ai ten na parliament demokresi prat hta Hp.S.P.L (ဖက်ဆစ်ဆန့်ကျင် ရေးပြည်သူ့လွတ်မြောက်ရေးအဖွဲ့ချုပ်) a pati ningbaw yan rai nga ai, U Nu, U Ba Swi hte P.M.Ny.T (ပြည်ထောင်စု မြန်မာနိုင်ငံ အမျိုးသားညီညွတ်ရေး တပ်ပေါင်းစု) pati ningbaw rai nga ai Tahkin Shit Mawng ni mung, federal ra sharawmg ai lam hpe maigan mungdan ni e jebat hkrum ai mabyin re ngu n tsen n hten lai wa sai ni rai ma ai.

1962 ning March shata 1 ya shana galaw ai Mungdaw Hkrum Ra Hpung (ပြည်နယ်များ ညီညွတ်ရေး အဖွဲ့) kawn tang madun ai “munghpawm Jet Jet” (ပြည်ထောင်စု စစ်စစ်မူ) a ntsa P.M.Ny.T pati ningbaw Takhin Shit Mawng bawng ban ai shaloi, munghpawm rudi amyu ni federal ra sharawng tang madun wa ai lam gaw, “American mung maden wa e jebat hkrum ai lam” re ngu nna tang madun bawng ban lai wa sai hpe mu lu nga ai.

“Karen lap mi Myen lap mi, Sam lap mi Myen lap mi ngu shawu ai nsen chyam bra wa nna, ga gaprang na, daw hka garan na nsen ni gaw gasu wa ai re. Mung maden ni a matu gaw “si htan myi hpraw galau magang – sara ra magang rai nga ai.” nga nna Tahkin Shit Mawng tang madun lai wa sai sumtang hta lawm nga ai.

Dai hta sha n-ga “Myit sum nung la ai hpu nau amyu ni a matu anhte ni grai myit machyi nga ga ai” nga nna mung lawm nga ai.

Hp.S.P.L ningbaw U Ba Swi mung English mung maden ni a majaw, Myen amyu sha ni mung lawm nga ai munghpawm rudi amyu sha ni anhte shada da daw hka mat ai hpang, Pang Lung Mung Bawng Zuphpawng kaw shawng nnan bai hkrum zup lu ai nga nna, bawng ban lai wa sai. Bai nna Sam mung Tawng Ji kaw galaw ai mung bawng zuphpawng kaw, mungdaw ningbaw ningla ni bawng ban ai mungdan gaw da tara upadi (constitution) hpe, “munghpawm jet jet” hkrang hte gram sharai na sumtang hpe n ra sharawng ai sha, gaw da tara upadi hpe gram sharai na malai, dinghku masha shada da bawng ban hting ram la ai ladat hku rai yang mai kaja na re nga nna, tang madun bawng ban wa sai re.

“Mung maden (Colony) a sai sum prat a majaw, jinghku majing rai nga ai anhte ni gaw garan gin hka da hkrum mat ai. Anhte jinghku majing ni rai nga ga ai rai tim, awmdawm shawnglawt lu ai hpang she bai hkrum zup lu ai shaloi gaw, chyasam amyu ni zawn zawn byin nga ga ai. Ndai zawn munghpawm mungdan ning nan gaw de nna, bai pawng hpawm ai hta shada da myit shut sawn shut kau ai lam ni nga chye ai gaw mara rai nna, lak lai ai lam n rai nga ai. Rai tim mung, myit hpraw san ai hte myit shut sawn shut kau ai lam ni hpe bai hparan jasan la mai nga ai” nga nna bawng ban lai wa nu ai.

Mung maden ni a sai sum prat a majaw ru di amyu shada da daw hka garan kau hkrum ai lam re ngu nna, U Ba Swi tsun ai zawn kaga Myen amyu sha ningbaw ni mung tsun shaga lang ai lam ni na wa ai shaloi, munghpawm rudi amyu ni gaw Myen hkaw hkam ni a npu e nga pra lai wa ai amyu ni re ngu nna, chye na shangun nga ai. Dai majaw munghpawm mungdan a manghkang gaw, “Federal” n byin ai manghkang n re sha, maigan mung maden ni a sai sumprat dawk hkrum ai manghkang sha re ngu nna chye na hta la ai lam gaw: labau hte seng nna ding lun hkat na manghkang ni hpe grau law shangun nga ai.

Duwa San Hta Sin gaw Wunpawng Amyu sha Du Magam ni gaw Myen hkaw hkam ni a uphkang npu hta n nga lai wa ai lam Dimokresi N Htang (ဒီမိုကရေစီပြောင်းပြန်) ngu ai laika buk hta ka tawn da nga ai.

“Kachin Du Magam ni gaw Myen hkaw hkam ni hte (mungmasa hpyen masa) jinghku hku sha hku hkau lai wa ai. Hpyen masa lam hta garum ai jinghku hku nna sha, grau nna hku hkau lai wa ai. Daru magam kaba ai Myen hkaw hkam nkau ni a shing kang gaw Mali Hka nu hka lam hku rai yang lahta de Man Maw ginwang daw, Kawng Tung (ကောင်းတုံ) mare du hkra rai nna, kawng lam hku rai yang Monyin, Mogaung du hkra sha, ka up sha lai wa sai.” nga nna Jinghpaw mungdaw hkring mang galaw lai wa sai Duwa San Hta Sin ka da nga ai.

Sam-Myen (ရှမ်းမဗာ) ni hpe Agyi Salang (မြို့စား) shatsam da ai rai tim, hkaw hkam galai nna daru magam shing kang n kaba ai hkam hkam ni a lak htak hta gaw shing kang ka up lu ai lam n nga ai; nga nna ka da nga ai.

Munghpawm rudi amyu ni Federal ra sharawng ai lam hpe U Nu mung maigan mungdan ni a jebat ai lam re ngu: n tsen n hten lai wa sai wa rai nga ai. 1961 ning March shata 8 ya shani Sam mungdaw hkring mang ni hte hkrum ai shaloi U Nu tsun ai lam hpe Tamai Hkam Zawba Tsat Htun E (သာမိုင်းခမ်း စော်ဘွား စဝ်ထွန်းအေး) Tawng Ji mung bawng zuphpawng hta tang madun bawng ban ai shaloi, lawu na hte maren lawm nga ai.

“ ‘hkring mi naw, Sam mungdaw a gaw da tara u padi gaw maigan jebat ai lam gaw san ai i?’ nga nna san ai. Shing nga san wa ai shaloi ngai gaw galang ta (Big shock) mau mat ai lam galang byin ai. Dai majaw ‘hpa majaw kun hkring mang daju’ ngu nna ngai san dat ai. Kaga n re maigan jebat ai lam hte seng nna asan sha re kun ngu htaw htaw le le byin taw ai. ‘Maigan ni a jebat ai lam hte seng nna san nga ai kun?’ nga bai san wa ai. ‘N re hkring mang daju anhte gaw maigan ni a jebat ai lam n lawm ai asan sha re. Ndai bung li galaw na mung; hkring mang daju, asuya ni ahkang jaw ai majaw galaw ai rai nga ai’ ngủ nna bai sang lang tang madun dan ai re”

Maigan Mungdan Ni E Jebat Hkrum Ai Ni Ngu N’tsen Hkrum Ai Lam Gaw Yu Roi Ai Lam Re

Ahkaw ahkang lam hpe bawng ban shagu maigan mungdan ni a jebat hkrum ai lam re ngu n tsen n hten hkrum ai hte seng nna Duwa San Hta Sin gaw, shi tang madun bawng ban ai shaloi lawu na hte maren tsun jahpra lai wa sai.

“British lak htak ten kaw nna anhte ni gaw shi laika ni hti ga ai re. Laili laika ni hpe hti ga ai. Shi laika hpe shani shagu hti ai. Mung kan a mabyin masa shiga ni hte munghpawm mungdan a mabyin masa shiga ni hpe shani shagu, shi laika kaw hti lu nga ai. Anhte ni shani shagu yawng hpe chye taw nga ai. Dai hpe masha ni gaw htaw ra byin ai, aw ra byin ai, maigan ni e jebat hkrum ai ngu nna shadu taw nga ai gaw: anhte ni a myitchye myitchyang, anhte sha da ai shat, anhte lu ai hpa lap, anhte ni hti tawn da ai laili laika ni hpe yu roi ai lam re, ngu nna sha anhte hkam la ai.” nga nna Jinghpaw mungdaw dat kasa langai hku shanglawm ai Duwa San Hta Sin gaw Tawng Ji mung bawng zuphpawng hta tsun lai wa sai re.

Duwa Zau Lawn mung Federal ra sharawng ai lam gaw n bung ai myu sha lam (လူမျိုးရေး) hpe sai jasu sharawt ya taw ai lam n re ai zawn, Confederation hpe ra sharawng taw ai lam mung n re ai nga nna, bawng ban lai wa sai.

“Anhte ni ‘Federal’ ngu ai ‘Munghpawm jet jet’ gaw de na matu tang shawn taw ai gaw n bung ai amyu sha lam hpe sai jasu sharawt taw ai n rai. Confederation ngu ai grau tsaw ai munghpawm masa gaw de ga ngu shakut taw ai mung n rai nga ai. Amyu sha hkrum ra lam hpe kaja wa lu la na matu munghpawm jet jet hpe gaw de ai gaw, jaw kaja ai lam re ngu hkam la ai majaw tang madun bawng ban ai lam re.”

1962 ning February shata 24 ya shani Yangon Pyi lam (ပြည်လမ်း) kaw na nsen shapoi dap gawk nu hta galaw ai “Munghpawm jet jet hte seng ai bawng ban hpawng” hta Sam mung ningbaw, Hkring Mang Tatu Maha Taye Tsi Tu Tsat Hkun Shu (ဝန်ကြီး သတိုးမဟာသရေစည်သူ စဝ်ခွန်းချို) tang madun bawng ban ai “Federal” masa hpe Jinghpaw dat kasa Duwa Zau Lawn kawn madi shadaw bawng ban mat wa ai re.

Lai wa sai shaning 60 ning jan hta Federal ra sharawng ai lam hpe mungdan daw hka wa na lam ngu dazik dawk nna mungdan daru magam zing kau ai majaw dai ni du hkra gumshem uphkang masa grin taw nga ai re. Ya ten na shamu shamawt nga ai rawt malan hpung tun kaba (နွေဦးတော်လှန်ရေး) hta gaw Federal “munghpawm jet jet” hte hkrum ra lam hpe lu la nna, munghpawm mungdan ning nan gaw de lu na kun? Kade nna ai aten ladaw hta seng ang ai ni yawng man hkrum hparan daw dan la ra na, koi yen n mai ai manghkang kaba rai nga ai.

===

Mahta Shamyet Shanat Ai Laika Ni

၂၀၁၆၊ ဆလိုင်းလျန်းမှုန်း၊ “ပြည်ထောင်စုစစ်စစ်မူ”

ဇန်ထားဆင်၊ ဒီမိုကရေစီပြောင်းပြန်

===