မန်တုံမြို့မှ စကစ မိသားစုများကို လေယာဉ်ဖြင့် ခေါ်ယူသွားပြီးနောက် TNLA နှင့် စစ်ကောင်စီတပ်တို့ တိုက်ပွဲဖြစ်ပွား

16 December 2023 – Kachinwaves

ရှမ်းပြည်နယ်မြောက်ပိုင်း မန်တုံမြို့ရှိ စစ်ကောင်စီတပ် မိသားစုဝင်များကို လေယာဉ်ဖြင့် ခေါ်ဆောင်သွားပြီးနောက် ယနေ့မွန်းလွဲပိုင်း ၃ နာရီမှစပြီး စစ်ကောင်စီတပ်နှင့် TNLA တို့ကြား တိုက်ပွဲပြင်းထန် လာကြောင်း ဒေသသတင်းရင်းမြစ်တစ်ဦးက ပြောသည်။

စစ်ကောင်စီသည် မန်တုံမြို့မှ ၎င်းတို့၏ မိသားစုဝင်များကို ဒီဇင်ဘာ ၁၄ ရက်နေ့နှင့် ၁၅ ရက်နေ့များတွင် လေယာဉ်ဖြင့် လာရောက်သယ်ဆောင်သွားသည်ဟု သတင်းရင်းမြစ်က ဆိုသည်။

“လွန်ခဲ့တဲ့ရက် အနည်းငယ်မှာတော့ စစ်ကောင်စီက သူ့တပ်ထဲပဲနေတာ ပစ်ခတ်တာတွေ မလုပ်သေးဘူး။ TNLA က မြို့တွင်းလာပြီး သွားလာနေထိုင်နေကြတယ်။ အခုဒီနေ့ စစ်ကောင်စီဘက်ကနေ စတင်ပစ်ခတ်တယ်။ လက်နက်ကြီး လက်နက်ငယ် လေယာဉ်တွေနဲ့ ပစ်ခတ်တယ်။”ဟု ဒေသခံတစ်ဦးက ဆိုသည်။

ညီနောင်မဟာမိတ်သုံးဖွဲ့နှင့် စစ်ကောင်စီကြား တွေ့ဆုံမှုရှိကြောင်း ပြောနေသော်လည်း ရှမ်းမြောက်ပိုင်းတွင် တိုက်ပွဲများဆက်လက် ပြင်းထန်နေပြီး စစ်ခေါင်းဆောင်နှစ်ဦးကလည်း လားရှိုးမြို့သို့ ယခုရက်ပိုင်းအတွင်း ရှေ့ဆင့်နောက်ဆင့် သွားလာနေသည်။