မြစ်ကြီးနားမြို့တွင် ရုပ်ရှင်ကြည့်ပြီးထွက်လာသည့်ကားနှင့် ဆိုင်ကယ် မတော်တဆ ယာဉ်တိုက်မှုဖြစ်

25 November 2023 – Kachinwaves

မြစ်ကြီးနားမြို့ ဧရာရုပ်ရှင်ရုံရှေ့တွင် ယနေ့ညနေ ၅ နာရီခန့်၌ ရုပ်ရှင်အပြီး ထွက်လာသောကားနှင့် အမျိုးသားတစ်ဦး မောင်းလာသော ဆိုင်ကယ် မတော်တဆ ချိတ်မိရာမှ ယာဉ်တိုက်မှုဖြစ်၍ ဆိုင်ကယ်မောင်းလာသည့် အမျိုးသား ထိခိုက်ဒဏ်ရာများ ရရှိသွားကြောင်း သိရသည်။

”ကားနဲ့ ဆိုင်ကယ် ချိတ်မိပြီး ဆိုင်ကယ်လှဲသွားတော့ ကားဘီးနဲ့ ကြိတ်ခံလိုက်ရတာနဲ့တူတယ်။ ကောင်လေးက ဆိုင်ကယ်လည်းထိ လူလည်းထိသွားတယ်။ ခြေချောင်းတွေ အကြိတ်ခံလိုက်ရလို့ ထင်တယ်၊ ဘယ်ဘက်ခြေချောင်း ထိပ်တွေရစရာမရှိဘူး။ လက်သန်းတစ်ဖက်လည်း ကျိုးသွားတယ်။

တခြားနေရာတွေလည်း တော်တော်ထိသွားတယ်။’’ဟု ဖြစ်စဥ်ကို မြင်တွေ့လိုက်သူ မျက်မြင်တစ်ဦးက ပြောသည်။

ဧရာရုပ်ရှင်ရုံသည် ယခင်က ခေတ္တပိတ်ထားခဲ့ပြီးနောက် ပြင်ဆင်မှုများပြုလုပ်၍ ပြန်လည်ဖွင့်လှစ်ထားသော ရုပ်ရှင်ရုံဖြစ်သည်။