ဗန်းမော်မြို့တွင် လက်နက်ကြီးပစ်ခတ်သံကြားနေရပြီး၊ ဒရုန်းပျံဝဲ

24 November 2023- Kachinwaves

ကချင်ပြည်နယ်၊ ဗန်းမော်မြို့တွင် ယမန်နေ့ည ၉ နာရီက လက်နက်ကြီး၊ လက်နက်ငယ် ပစ်ခတ်သံများ ကြားရသည်ဟု ဒေသခံများကဆိုသည်။

သေနတ်သံများ ဦးစွာထွက်ပေါ်ခဲ့ပြီးနောက် နာရီဝက်အကြာတွင် လက်နက်ကြီးပစ်ခတ်သံ ထွက်ပေါ်လာခြင်းဖြစ်ကြောင်း ဗန်းမော်မြို့တွင်နေထိုင်သည့် အမျိုးသားတစ်ဦးက ဆိုသည်။

“သေနတ်သံ အရင်ကြားရတာ။ နောက်ထပ် နာရီဝက်လောက်မှ လက်နက်ကြီးသံကြားရတာ။ ဘယ်ကလည်းတော့ မှန်းရခက်တယ်။ ဟိုဘက်က ကြားလိုက် ဒီဘက်က ကြားလိုက်နဲ့”

လက်နက်ကြီး ၁၀ လုံးနှင့်အထက် ပစ်ခတ်ခဲ့ခြင်းဖြစ်ပြီး ခွန်သာရပ်ကွက်တွင် ဒရုန်းပျံဝဲခဲ့ကြောင်းလည်း ဒေသခံထံမှ သိရသည်။

စစ်ကောင်စီတပ်ရှိသည့် နေရာနှစ်ခုမှ ပစ်ခတ်နေခြင်းဖြစ်မည်ဟု ဒေသခံများက ယူဆပြီး မည်သည့်နေရာမှ ပစ်ခတ်နေပြီး မည်သည့်နေရာတွင် ကျရောက်ပေါက်ကွဲသည်ကိုမူ တိတိကျကျ မသိရှိရသေးပါ။

နိုဝင်ဘာ ၁၂ ရက်နေ့ညကလည်း KIA၊ KPDF များ ဗန်းမော်မြို့ဘက် ကပ်လာသည်ဟုဆိုကာ ဗန်းမော်ဗျူဟာကုန်းမှ မန်ဖာရွာဟောင်းဘက်သို့ လက်နက်ကြီးပစ်ခတ်ခဲ့သေးသည်။