မနေ့ညက လိုင်ဇာအနီး စစ်ကောင်စီတပ်ရဲ့ ဗုံးနဲ့ လက်နက်ကြီးပစ်ခတ်မှုကြောင့် AA တပ်ဖွဲ့ဝင်တွေလည်း ထိခိုက်သေဆုံးမှုရှိ၊ KIO/KIA နဲ့အတူ တသွေးတည်း တသားတည်း ရှိကြောင်း ညီနောင်မဟာမိတ် (၃) ဖွဲ့ ထုတ်ပြန်

10 October 2023 – Kachinwaves

နိုင်ငံရေးနဲ့ စစ်ရေး အဘက်ဘက်မှာ ရှုံးနိမ့်နေပြီး ပြည်သူလူထုကို အငြိုးအတေး အာဃတကြီးစွာထားပြီး တရား လက်လွတ်သတ်ဖြတ်တဲ့ စစ်ကောင်စီရဲ့ လုပ်ရပ်ဟာ လူသားမျိုးနွယ်အပေါ် ပြစ်မှုကျူးလွန်ခြင်းနဲ့ စစ်ရာဇဝတ်မှုတွေကို ဗြောင်ကျကျ ကျူးလွန်ခြင်းဖြစ်တယ်လို့ ညီနောင် မဟာမိတ် (၃) ဖွဲ့ ထုတ်ပြန် လိုက်ပါတယ်။

မနေ့ညက စစ်ကောင်စီတပ်ရဲ့ လက်နက်ကြီး ပစ်ခတ်တိုက်ခိုက်မှုမှာ လိုင်ဇာရှိ ရက္ခိုင့်တပ်တော် (AA) တပ်စခန်းတစ်ခုထဲကျရောက်ခဲ့ပြီး တပ်ဖွဲ့ဝင် ၁ ဦးကျဆုံးကာ ၁၀ ဦး ဒဏ်ရာရရှိခဲ့ကြောင်းလည်း ထုတ်ပြန်ချက်မှာ ပါရှိပါတယ်။

ညီနောင်မဟာမိတ် (၃) ဖွဲ့ဟာ KIO/KIA နဲ့အတူ တစ်သွေးတည်း တစ်သားတည်း ရှိကြောင်းလည်း ထုတ်ပြန် ချက်မှာ ပါရှိပါတယ်။

မနေ့ည အောက်တိုဘာလ ၉ ရက်နေ့ညနက်ပိုင်း ၁၁ နာရီခွဲလောက်မှာ လိုင်ဇာမြို့နဲ့ ၂ မိုင်ဝန်းကျင်အကွာ အဝေးမှာရှိတဲ့ မုန်လိုင်ခက်ကျေးရွာရှိ စစ်ရှောင်စခန်းထဲလည်း ဗုံးကျရောက်ခဲ့ပြီး စစ်ရှောင်ပြည်သူ ၂၈ ဦး သေဆုံးခဲ့တာ ဖြစ်ပါတယ်။