ရခိုင်ပြည်နယ်မှ ဖားကန့်တွင် စီးပွါးလာရောက်ရှာသူ မြေစာပုံပိမိ၍ သေဆုံး

5 October 2023 – Kachinwaves

ဖားကန့်မြို့၊ မှော်စီစာကျေးရွာတွင် ရေမဆေးကျောက်ရှာသူ အမျိုးသားတစ်ဦး ယနေ့ညနေ ၄ နာရီဝန်းကျင် က မြေစာပိ၍သေဆုံးသွားကြောင်း သိရသည်။

ဒေသအခေါ် သာယာကုန်းကျောက်ကမ်းပါးတွင် ကျောက်ရှာဖွေရင်း မြေစာပုံပြိုကျခဲ့ခြင်းဖြစ်ကြောင်း ဖားကန့်ဒေသခံ အမျိုးသားတစ်ဦးက ဆိုသည်။

“ဒီနေ့ကျမှ စီးပွါးရေးအဆင်မပြေလို့ ငါကျောက်ထွက်ရှာမယ်ဆိုပြီး ကျောက်ရှာတဲ့အချိန်ကျမှ မြေစာက အပေါ်ကနေ လျှောကျပြီးမှ သူ့အပေါ်မှာ မြေစာ ပြိုကျတာပေါ့”

မြေစာပိခံရသူအမျိုးသားကို ကယ်ထုတ်နိုင်ခဲ့သော်လည်း လူမှုကူညီရေးအသင်းအဖွဲ့ အကူအညီဖြင့် ဆေးရုံ သို့ပို့ဆောင်စဉ် သေဆုံးခဲ့ကြောင်း သိရသည်။

သေဆုံးသူမှာ အသက် ၆၀ နှစ်ကျော်အရွယ် ဦးထက်အောင်ကျော်ဆိုသူဖြစ်ပြီး ရခိုင်ပြည်နယ်မှ ဖားကန့်တွင် စီးပွါးလာရောက်ရှာသူဖြစ်ကြောင်း သိရသည်။

ဇနီးနှင့် သားတစ်ဦးရှိပြီး လုံးခင်းကျေးရွာအုပ်စု၊ မှော်စီစာကျေးရွာ၊ ဖြူစင်ကုန်းတွင် နေထိုင်ကြောင်း သိရသည်။

သြဂုတ် ၁၃ ရက်နေ့ ကလည်း ဖားကန့်မြို့နယ်၊ မနကျေးရွာအနီးရှိ ကျောက်စိမ်းလုပ်ကွက် ကမ်းပါးပြိုကျပြီး လူပေါင်း ၃၀ ကျော် သေဆုံးခဲ့သည့် ဖြစ်စဉ်လည်း ရှိသည်။