ဖားကန့်တွင် လက်သည်မပေါ်သည့် အချဉ်ပေါင်းသည် ပစ်သတ်ခံရမှု ဖြစ်ပြန်
![](https://kachinwaves.com/wp-content/uploads/2023/09/323165018_1217520102522571_9093974477010400525_n-1024x678.jpg)
3 October 2023 – Kachinwaves
ဖားကန့်မြို့နယ်၊ လုံးခင်းကျေးရွာတွင် ယနေ့ မွန်းလွဲ ၃ နာရီဝန်းကျင်က အမျိုးသားတစ်ဦး သေနတ်ဖြင့် ပစ်သတ်ခံရကြောင်း သိရသည်။
လုံးခင်းကျေးရွာအုပ်စု၊ ကုဋေမှော်ကျေးရွာအဝင်တွင် ဆိုင်ကယ်ဖြင့် အချဉ်ပေါင်းလှည့်လည်ရောင်းသည့် အမျိုးသားတစ်ဦး ပစ်သတ်ခံရကြောင်း သိရသည်။
လုံးခင်းတွင် ယနေ့ သုံးနာရီဝန်းကျင်က သေနတ်ပစ်ခတ်သံ ကြားခဲ့ရသည်ဟု ဒေသခံများက ပြောဆိုခဲ့ပြီး နောက် အချဉ်ပေါင်းသည် ပစ်သတ်ခံရသည့်ဖြစ်စဉ်ဖြစ်ကြောင်း သိခဲ့ရခြင်းဖြစ်သည်။
သေဆုံးသူ၏ ရုပ်အလောင်းကို နယ်မြေခံပရဟိတအဖွဲ့က လာရောက်သယ်ဆောင်သွားကြောင်း သိရသည်။
ပစ်ခတ်မှုကို မည်သည့်အဖွဲ့အစည်းက ပြုလုပ်ခဲ့ကြောင်းကို Kachinwaves အနေဖြင့် အတည်ပြုနိုင်ခြင်း မရှိပါ။
စက်တင်ဘာ ၂၉ ရက်နေ့ကလည်း လုံးခင်းကျေးရွာအုပ်စု၊ ကထန်ကျေးရွာတွင် ရေခဲချောင်းရောင်းသည့် အမျိုးသားတစ်ဦး ပစ်သတ်ခံရသည့်ဖြစ်စဉ် ဖြစ်ပွားခဲ့ကြောင်းလည်း သိရသည်။