မိုးမောက်မြို့နယ်အတွင်း လှုပ်ရှားနေသည့် စစ်ကောင်စီစစ်ကြောင်းနှင့် KIA တိုက်ပွဲဖြစ်ပြီး၊ စစ်ကောင်စီတပ် အထိနာ

30 September 2023 – Kachinwaves

မိုးမောက်မြို့နယ် နွမ်လန်နှင့် ဝူထန်ယန်ကျေးရွာကြားတွင် စစ်ကောင်စီတပ် ခမရ ၄၃၇ တပ်ရင်း စစ်ကြောင်းတစ်ခုနှင့် KIA တပ်ရင်း ၂၅ တို့ ယနေ့ စက်တင်ဘာ ၃၀ ရက်နေ့၌ ထိတွေ့တိုက်ပွဲ ဖြစ်ပွားကြောင်း သိရသည်။

အလောဘွမ် (Alaw Bum) နှင့် တောင်ကြောဆက်နေသည့် ရှန်ထုံဘွမ် (Shan Htung Bum) မှဆင်းလာသော စစ်ကောင်စီတပ်နှင့် တိုက်ပွဲဖြစ်ပွား၍ စစ်ကောင်စီဘက်က အထိနာသွားကြောင်း KIA သတင်းရင်းမြစ်အရ သိရသည်။ အရှင်ဖမ်းမိသူများလည်းရှိကြောင်း KIA ရှေ့တန်းသတင်းနှင့် နီးစပ်သည့်သတင်းရင်းမြစ်ထံမှလည်း သိရသည်။

ရှန်ထုံဘွမ်သည် စစ်ကောင်စီတပ်နှင့် KIA တပ်တို့ အနီးကပ်စခန်းချနေသည့် နေရာဖြစ်၍ နှစ်ဖက်စစ်ရေး သတိထားရသည့် စခန်းဖြစ်ကြောင်း သိရသည်။

ယနေ့ တိုက်ပွဲဖြစ်ပွားသည့်နေရာသည် KIA ဗဟိုဌာနချုပ် တပ်မဟာ ၅ လိုင်ဇာနယ်မြေအတွင်း ကျရောက် ကြောင်း သိရသည်။ စစ်ကောင်စီတပ်က ဇူလိုင်လမှစပြီး ထိုးစစ်ဆင်လာသည့်အတွက် နှစ်ဖက်တိုက်ပွဲ ဆက်တိုက်ဖြစ်ပွားလာသည်မှာ ၃ လပြည့်တော့မည် ဖြစ်သည်။