Features

ပြည်တွင်းစစ်ဒဏ်သင့်သော မြို့တစ်မြို့။

maran gam 7 years ago 1 min read

ဇူလိုင် ၁၈

အင်လွန်း

ဒါ..ချိပ်..ဆမ်.. အို့..။ ဒါ..ချိပ်..ဆမ်.. အို့..။ တောင်ကျမိုးရေကြောင့် တောင်တက်လမ်း ကမ်းပါးပြိုပြီး ပိတ်မိနေသော နေရာကိုဖြတ်နိုင်ဖို့ လော်ဝေါ်စကားဖြင့် အချင်းချင်း ‘တစ်၊နှစ်၊သုံး’ဟု ငြာသံပေးပြီး ဆိုင်ကယ်ကို ဝိုင်းမနေကြသည့် ဒေသခံသုံးယောက်၏ အသံဖြစ်ပါသည်။ တောင်တက်လမ်းအဆုံးတွင် တောင်ထိပ်ပေါ်က မြို့ရောက်ပါပြီ။

ဒေသခံများနှင့် တာဝန်အရရောက်ရှိလာသော အစိုးရဝန်ထမ်းများကလွဲလျှင် လူအရောက်အပေါက် နည်းလှသည့် ကချင်ပြည်နယ်မှ ဆော့လော်မြို့ ဖြစ်ပါသည်။ ဆော့လော်မြို့နယ်ကို သိကြသော်လည်း မြို့၏ပကတိ အခြေအနေကို လူသိနည်းလှပါသည်။ ဒီမြို့တွင်ထူးရှားသည်မှာ ကားမတွေ့ရ။ ကတ္တရားခင်းထားသည့်လမ်း တစ်ကွက်မှမရှိပါ။ မိတစ်ချက်၊ မမိတစ်ချက် CDMA SIM card ဖုန်လှိုင်းတော့ရှိသည်။ တရုတ်နယ်စပ်နှင့် မြစ်ကြီးနားမြို့မှ တနိုင်တပိုင် သယ်ဆောင်လာသော ကုန်ခြောက် အနည်းအကျဉ်းရောင်းသည့် အိမ်ဆိုင်သေးသေးလေးများမှအပ ဈေးမရှိပါ။ လက်ဖက်ရည်ဆိုင် မရှိ။ ခေါက်ဆွဲဆိုင်တောင် မရှိပါ။ သို့သော် မြို့နယ်အဖြစ် နိုင်ငံတော်အစိုးရမှ သတ်မှတ်ထားသည်မှာ နှစ်ပေါင်း လေးဆယ်ကျော်ခဲ့ပါပြီ။ ၂၀၁၄ ခုနှစ် သန်ခေါင်စာရင်းအရ လူဦးရေ (၆၅၁၈)ရှိသော မြို့နယ်တစ်မြို့နယ်ဖြစ်ပါသည်။ မြို့အဖြစ် ဖြစ်တည်လာပုံကလည်း ကမ္ဘာ့နှစ်ပေါင်းအကြာဆုံး ပြည်တွင်းစစ်များတွင် စာရင်းဝင် မြန်မာနိုင်ငံ၏ ပြည်တွင်းစစ်သမိုင်းနှင့် ဆက်စပ်နေပါသည်။

ဆော့လော်မြို့ ဖြစ်လာပုံ တစေ့တစောင်း။

(နောင်တွင် NDA-K ခေါင်းဆောင်များဖြစ်လာသည့်) KIA အရာရှိ ဇခုန်တိန့်ယိန်း (Zahkung Ting Ying)နှင့် လရော က်ဇယ်လွမ်း (Layawk Zelum) ဦးဆောင်သော ကေအိုင်အေ စစ်သားများ ဗကပ (ဗမာပြည်ကွန်မြူနစ်ပါတီ)နှင့် ပူးပေါင်းသွားခြင်း မတိုင်ခင်၊ ၁၉၆၃ မှ ၁၉၆၈ ခုနှစ်အထိ KIA တပ်စခန်းချနေထိုင်ခဲ့သည့် ဒေသဖြစ်ကြောင်း အသက်၇၄နှစ်အရွယ် ဒေသခံဖြစ်သူ ဦးခေါင်လွမ်းက ပြောပြသည်။

ထိုသို့ KIA စစ်သားများ ဘက်ပြောင်းသွားပြီးနောက်တွင် မြန်မာအစိုးရတပ်က လာရောက် အခြေချခဲ့သည်။ အစိုးရတပ် စခန်းချနေထိုင်းပြီးနောက် အခြားအစိုးရဌာနဆိုင်ရာ ဝန်ထမ်းများလည်း လုံခြုံရေးအရ တပ်ကိုအမှီအခိုပြု နေထိုင်ခဲ့ရာမှ ယခုလက်ရှိ ဆော့လော်မြို့နေရာတွင် လူနေများလာ၍ ဆော့လော်မြို့ ဖြစ်လာရခြင်းဖြစ်သည်။ မူလဆော့လော်ကို အောက်ဆော့လော်ဟု ပြန်ပြောင်းခေါ်ပြီး ယနေ့အချိန်ထိ ရွာလေးတစ်ရွာအဖြစ် တည်ရှိနေပါသည်။

ရဲစခန်းတည်ထားသည့်ကုန်းကို လော်ဝေါ်စကားဖြင့် ‘ဝစ်ဘန်းဒမ်း’ဟုခေါ်ပြီး အခုမြို့တည်ထားသော တောင်ကို ‘ဒဂုတ်ဘုတ်’ဟု ခေါ်သည်ဟု မြို့ပတ်လမ်းလျှောက်နေချိန်တွင် ဘာသာရေးဆရာတစ်ဦးက ပြောပြသည်။ ‘ဝစ်ဘန်းဒမ်း’သည် ရေအိုင်ဟု အဓိပ္ပါယ်ရပြီး ‘ဒဂုတ်ဘုတ်’သည် ဒဂုတ်တောင်ဟု ပြောနိုင်ကြောင်း ရှင်းပြသည်။

လက်ရှိ ရဲစခန်းတည်ရှိသော ‘ဝစ်ဘန်းဒမ်း’ ကုန်းတွင် ရှေ့ယခင်က ရေအိုင် တကယ်ရှိခဲ့သည့် နေရာဖြစ်ကြောင်း ဒေသခံများက ပြောပြကြသည်။ ရဲစခန်းကုန်းတွင် ရေအိုင်ပုံစံချိုင့်ကိုမြေဖို့ပြီး ဘော်လီဘောကွင်း လုပ်ထားသည်ဟု အသက်ငါးဆယ်ကျော် နယ်ခံရဲတပ်ကြပ်ကြီးက ပြောပြသည်။

ဆော့လော်မြို့၏ မြင်ကွင်း။

ဆော့လော်မြို့သို့ စဝင်လိုက်လျှင် နွမ်းစုတ်စုတ် ဆေးရုံကို ဘယ်ဘက်အခြမ်း၌ တွေ့ရသည်။ ညာဘက်ခြမ်းတွင် ဝစ်ဘန်းဒမ်းကုန်း၌ တည်ဆောက်ထားသော ရဲစခန်းကိုတွေ့ရသည်။ တောင်စောင်းကမ်းပါးကို မြေညှိထားသည့် ဘောလုံးကွင်း ကျဉ်းကျဉ်းလေးကို ဆေးရုံဝင်းကျော်ပြီးလျှင် တွေ့ရမှာဖြစ်ပါသည်။ ခနော်နီခနော်နဲ့ မြို့လမ်းမအတိုင်း ဆက်လျှောက်သွားလျှင် ပြည်ထောင်စု ကြံ့ခိုင်းဖွံ့နှင့်ဖြိုးရေး ပါတီအလံ ထောင်ထားသည့် လွှတ်တော် ကိုယ်စားလှယ်ရုံးနှင့် မျက်နှာချင်းဆိုင်ဘက်တွင် NLD ပါတီနှင့် လော်ဝေါ်အမျိုးသား စည်းလုံးညီညွတ်ရေးနှင့် ဖွံ့ဖြိုးရေးပါတီ ဆိုင်းဘုတ်များကို တစ်ဆက်တစ်စပ် တွေ့ရပါသည်။ မြို့လမ်းမအတိုင်း ဆက်လျှောက်သွားလျှင် ဆော့လော် အထက်တန်းကျောင်းသို့ ရောက်ရှိသွားပါသည်။ ဆော့လော်မြို့နယ်၏ တစ်ခုတည်းသော အထက်တန်းကျောင်းဖြစ်ကြောင်း သိရသည်။

အလားအလာ မကောင်းသေးသော ပညာရေး။

၂၀၁၅ – ၂၀၁၆ ပညာသင်နှစ်တွင် ဆယ်တန်းဖြေဆိုသူ အယောက်၂၀ကျော်ထဲက တစ်ယောက်မှ မအောင်မြင်ခဲ့သည့် ကချင်ပြည်နယ်က ကျောင်းတစ်ကျောင်းဖြစ်သည်။ ၂၀၁၇ ဇွန်လတွင်ထွက်ရှိသည့် ဆယ်တန်းအောင်စာရင်းတွင် ဆော့လော်ကျောင်းမှ ဖြေဆိုသူ သုံးဆယ်ဝန်းကျင်ထဲက (၄)ယောက် အောင်မြင်ခဲ့သည်။ ၎င်း၎ယောက်ထဲမှ ၂ယောက်သည် အပြင်ဖြေများဖြစ်ကြောင်း ဆယ်တန်းဖြေဆိုကျရှုံးခဲ့သူ မိန်းကလေးတစ်ယောက်က ပြောသည်။

မြို့နယ်တစ်မြို့နယ်၏ အထက်တန်းကျောင်း ဖြစ်သော်လည်း စာစစ်ဌာနမရပဲ ချီဖွေစာစစ်ဌာနမှာပဲ သွားရောက် ဖြေဆိုရသည်။ အတန်းတင်စာမေးပွဲ ဖြေဆိုခါနီးတွင် ဆော့လော် အထက်တန်းကျောင်းမှ ဆယ်တန်းကျောင်းသူ ကျောင်းသားများသည် ချီဖွေမြို့သို့ သွားရောက်ပြီး သက်ဆိုင်ရာမှ စီမံပေးသည့် အဆောင်တွင် စုပေါင်းနေထိုင်ကြရကြောင်း သိရသည်။

ဆော့လော်မြို့၏ ပညာရေးအခြေအနေ ဆိုးရွားနေရခြင်းသည် ဖွံ့ဖြိုးမှုနှိမ့်ကျနေပြီး လမ်းပန်းဆက်သွယ်ရေး ခက်ခဲနေခြင်းနှင့်လည်း သက်ဆိုင်နေသည်ဟု ဒေသခံများက သုံးသပ်ကြပါသည်။

“ကျွန်တော်တို့က ကိုယ့်သားသမီးတွေ ဒီထက်မက ပညာရေး မြင့်မားအောင်ကျတော့ ဒါက နိုင်ငံတော်ကော၊ အဖက်ဖက်က ဒီအဖွဲ့အစည်းတွေကော၊ ဒီလူလူချင်း စာနာစိတ်နဲ့ပေါ့နော် ဒီကျွန်တော်တို့ ဆော့လော်မြို့နယ်မှာရှိတဲ့ ပြည်သူလူထုတွေ၊ ကျောင်းသားမိဘတွေ၊ ပြီးတော့မှ မြို့နယ်တစ်ခုလုံးအတွက်ပေါ့၊ စဉ်းစားပြီးတော့မှ သနားငဲ့ညှာပြီးတော့မှ လမ်းပန်းဆက်သွယ်ရေး ဖွံ့ဖြိုးရေးလုပ်ငန်း အရင်လုပ်ပြီးတော့မှ ဒုတိယအနေနဲ့ကျတော့ ဆော့လော်မြို့မှာ (တာဝန်)ကျလာမယ့် ဝန်ထမ်းတွေ ကျောင်းဆရာဆရာမတွေကလည်း အပြောင်းအရွှေ့များတယ်။ ခဏလေး တစ်နှစ်လောက် လာနေပြီးတော့မှာ ပြောင်းသွားတဲ့အခါကျတော့၊ ဒါက သိပ်အဆင်မပြေဘူး။ အဲ့မှာ ပိုပြီးတော့မှ နှောင့်နှေးမှုရှိတယ်။ ပြီးတော့ ဝါရင့်ဆရာဆရာမတွေ သိပ်မရောက်လာကြဘူး။ ဆိုတဲ့ဟာ ကျနော်ကတော့ အဲ့လိုမြင်တာပေါ့”ဟု ဒေသခံ ကျောင်းသားမိဘ ဦးလွမ်းဟောင်းက သူ၏အတွေ့အကြုံကိုအခြေခံပြီး ပြောပါသည်။

ချီဖွေ – ဆော့လော် လမ်းနှစ်သွယ်နှင့် ဆက်နွယ်နေသော ဒေသခံများ၏ ဘဝများ။

ကချင်ပြည်နယ် ချီဖွေမြို့နှင့် ဆော့လော်မြို့ကို ဆက်သွယ်ထားသည့် လမ်းနှစ်သွယ်ရှိနေသော်လည်း (၃၄)မိုင်သာဝေးသည့် အနီးဆုံးလမ်းသည် သွားလာခွင့်မရှိပဲ ပိတ်ပင်ထားပါသည်။ ၎င်း(၃၄)မိုင်ကို ပြန်လည်ဖွင့်ပေးဖို့ အစီအစဉ်ရှိမရှိ မေးခွန်းကို လွှတ်တော်၌ ဒူးလေးပါတီက ပြည်သူ့လွှတ်တော် ကိုယ်စားလှယ် ဦးလာမာလေး မေးခဲ့ရာ နယ်မြေလုံခြုံရေး အခြေအနေအရ မလုပ်ပေးနိုင်သေးကြောင်း ဆောက်လုပ်ရေး ဝန်ကြီးဌာနမှ ဖြေကြားသွားသည်ဟု ၎င်းကဆိုသည်။

ဒေသခံများက တောင်သုံးလုံးလမ်းဟု လူသိများသော လက်ရှိသွားနေသည့်လမ်းသည် ၇၄မိုင်ကျော်ခန့်ဝေးပြီး ချီဖွေမြို့နယ်နှင့် သက်ဆိုင်ကြောင်း သိရသည်။ အဆိုပါလမ်းကို ပြုပြင်ပေးရေးအတွက် ချီဖွေမြို့နယ် ပြည်သူ့လွှတ်တော် ကိုယ်စားလှယ်က အဆိုတင်ထားကြောင်း ၎င်းနှင့်တွေ့ဆုံစဉ်ပြောပြသည်ဟု ဦးလာမာလေးက ပြောပါသည်။

တောင်ကုန်းတောင်တန်းများပေါ် ဖောက်လုပ်ထားသည့် လမ်းဖြစ်သဖြင့် တက်ပြီးလျှင်ဆင်း၊ ဆင်းပြီးလျှင်တက် သွားရသော လမ်းဖြစ်သည်။ မိုးများသည့်ဒေသဖြစ်ပြီး မိုးရွာလျှင် တောင်ကျရေများ တိုက်စားမှုကြောင့် လမ်းလယ်များ၌ပင် ရေမြောင်းပုံသဏ္ဌာန်ဖြစ်လာကာ လမ်းကနှစ်ခြမ်းကွဲ ပျက်စီးနေသည့် နေရာများတွေ့ရသည်။ လမ်းပန်းဆက်သွယ်ရေး ခက်ခဲခြင်းကြောင့် ပညာရေးသာမက စားဝတ်နေရေး ခက်ခဲစေသည့် အကျိုးဆက်များကို ဒေသခံများ ကြုံတွေ့နေရပါသည်။

“အခုဓါတ်ဆီက ကျွန်နော်တို့ဒီမှာ တစ်ဂါလံကို တစ်သောင်းကျော်၊ တစ်သောင်းနှစ်ထောင် အဲလောက်မှာရှိတယ်။ ဟိုမြစ်ကြီးနားမှာ 125 (ဆိုင်ကယ်) တစ်စီးက နှစ်ထောင်ငါးရာ၊ အများဆုံး သုံးထောင်ဆိုရင် ပြည့်တယ်။ ဒီမှာ ကျွန်နော်တို့ တစ်သောင်းဖိုးထည့်တာ မပြည့်နိုင်သေးဘူး။”ဟု ဆော့လော်မြို့၏ ကုန်ဈေးနှုန်း ဈေးကြီးနေသည့်အကြောင်းကို ဦးလွမ်းဟောင်းက နှိုင်းယှဉ်ပြောပြသည်။

ဆန်ဈေးကိုလည်း ၎င်းကဆက်ပြီးနှိုင်းယှဉ်ပြသည်မှာ “ပြီးတော့ ဆန်ကလည်း ဟိုမှာက သုံးသောင်းဆိုရင် ဒီမှာက အနည်းဆုံး ခုနှစ်သောင်း၊ ခြောက်သောင်းခုနှစ်သောင်း ပေးရတာ”ဟု ဆိုပါသည်။ တခါတလေ လွှတ်တော်ကိုယ်စားလှယ်များ သယ်ယူလာပြီး ရောင်းချပေးသည့်အချိန်တော့ ဈေးသက်သာကြောင်း ၎င်းက ဆိုပါသည်။

ဒေသခံများအနေဖြင့် မြစ်ကြီးနားနှင့် ဝိုင်းမော်ဘက်မှဆန်ကို လွတ်လွတ်လပ်လပ် သယ်ယူခွင့်လည်း မရှိကြောင်း ဦးလာမာလေးက ဆိုပါသည်။ တောင်ယာထွက်စပါးကို အဓိကအားထားနေရသည့် ဒေသဖြစ်၍ မိုးများပြီး တောင်ယာမီးရှို့ရန် အဆင်မပြေသောနှစ်များတွင် ပိုမိုခက်ခဲရသည်ဟု ဒေသခံများက ပြောပြကြပါသည်။

ဆော့လော်မြို့သို့ ဆန်သယ်ယူနိုင်ရေးအတွက် နယ်လုံဝန်ကြီးနှင့် တိုင်းမှူး၏ ထောက်ခံချက်လိုအပ်ပြီး၊ အိတ်ငါးဆယ်မှ တစ်ရာကြားသယ်ယူနိုင်ကြောင်း၊ ဆန်းစပါးသယ်ယူရေး ခက်ခဲသည့်အတွက် ဒေသခံများသည် ဒေသထွက်သစ်ခွပန်းများ ရှာဖွေပြီး တရုတ်နယ်စပ်ဘက်မှာဆန်နှင့် သွားရောက်လဲလှယ် စားသောက်ရသည့် အချိန်လည်းရှိသည်ဟု ဦးလာမာလေးက ပြောဆိုသည်။

“အိတ်ငါးဆယ်၊တစ်ရာတော့ ခွင့်ပြုပေးတယ်ပေါ့။ ဒါပေမဲ့ ကျွန်တော်တို့လည်း ဘယ်နှစ်ကြိမ်လောက် လုပ်ပေးနိုင်မလဲ။ ဖြစ်နိုင်ရင်တော့ ပြည်သူတွေစားဖို့ လေး၊ငါး၊ဆယ်အိတ် တနိုင်တပိုင်လေးဆိုရင်တော့ ခွင့်ပြုပေးစေချင်တယ်။”ဟု ၎င်းကဆိုသည်။

ထမင်းအသက်ခုနှစ်ရက် ရေအသက်တစ်မနက်ဆိုသည့် စကားပုံအတိုင်း ဆော့လော်မြို့သည် ဆန်ဈေးသာ ဈေးတက်နေသည်မဟုတ် လက်ရှိမြို့သူမြို့သားများ သောက်သုံးနေသည့်ရေ သွယ်ယူထားသော ရေကန်ရှိရာနေရာလည်း KIA ရှေ့တန်းစခန်းများ၏ ထိန်းချုပ်မှုအောက်တွင် ကျရောက်နေသည်ဟု ဒေသခံများက ပြောပြကြသည်။ အဆိုပါရေကန်သည် ၁၇နှစ်ကြာ အပစ်အခတ်ရပ်စဲရေး ကာလတွင် ဆောက်လုပ်ခဲ့သည့် ရေကန်ဖြစ်ကြောင်း သိရသည်။

အစစအရာရာ ခက်ခဲနေသေးပြီး မျက်နှာပြင်ညီညာသည့် မြေတစ်ကွက်မှ မရှိသည့် တောင်ကုန်းပေါ်က ဆော့လော်မြို့၏ ဖြစ်တည်လာပုံအစ၌လည်း ပြည်တွင်းစစ်နှင့် ဆက်နွယ်ခဲ့သည်။ လက်ရှိအခြေအနေ၌လည်း ပြည်တွင်းစစ်၏အရိပ်သည် ဆော့လော်မြို့နယ် ဖွံ့ဖြိုးတိုးတက်ရေး အလားအလာကို လွှမ်းမိုးထားဆဲဖြစ်ပါသည်။