ကသာမှာ စစ်​ကောင်စီ ရိက္ခာတင် စက်​လှေကို မြို့လှ PDF တိုက် ၊ စက်​လှေနှစ်စီးလုံးနစ်မြုပ်

ကချင်ပြည်နယ် ရွှေကူမြို့မှ ကသာဘက်သို့ စုန်ဆင်းလာသည့် စစ်ကောင်စီ ရိက္ခာတင်စက်လှေနှစ်စီးကို မြို့လှPDF က ယနေ့ နံနက် ၁၁ နာရီခန့်တွင် တိုက်ခိုက်ခဲ့ပြီး စစ်​ကောင်စီစက်လှေနှစ်စီး နစ်မြုပ်သွားကြောင်း မြို့လှPDFမှ တာဝန်ရှိသူတဦးက ပြောသည်။

ရွှေကူမြို့နယ်အုပ်ချီရွာမှ ကသာမြို့ မြို့လှရွာဖက်သို့ စက်လှေမထွက်ခင် စစ်ကောင်စီတပ်မှ ကောက်ကွေ့ချောင်းရိုးတစ်လျှောက်လက်နက်ကြီးများဖြင့် ရမ်းသမ်း ပစ်ခတ်ခဲ့ပြီး တိုက်ခိုက်ခံရသည့်နောက်တွင်လည်း အုပ်ချီရွာက စစ်​ကောင်စီက လက်နက်ကြီးများ အဆက်မပြတ် ပစ်ခတ်ခဲ့ကြောင်း မြို့လှPFDမှ တဦးက ပြောသည်။

“အတန်ကြာပစ်ခတ်ပြီးတော့ သူတို့ စိတ်ချရလောက်ပြီထင်မှ စက်လှေထွက်ခွာတာပါ၊ စက်လှေမှောက်ပြီးသွားတော့လည်း နာရီဝက်ခန့်ကြာ အလားတူ ပစ်ခတ်နေပါသေးတယ်”ဟု မြို့လှ PDFမှ တဦးကပြောသည်။

စစ်ကောင်စီစက်လှေနှစ်စီးကို H-22 mm လက်လုပ်ရှေ့ထွက်မိုင်း ၅ လုံး၊ ရေမြုပ်မိုင်း ၁ လုံးဖြင့် မြို့လှPDFမှပစ်ခတ်ဖောက်ခွဲခဲ့သည်ဖြစ်​ကြောင်းလည်း ဆိုသည်။

ဧပြီလ ၃ ရက်နေ့ ရွှေကူမြို့နယ် ကျောက်ကြီးကျေးရွာအနီးတွင် စစ်ကောင်စီရိက္ခာတင် စက်လှေ လေးစီး ပစ်ခတ်ခံခဲ့ရပြီး စက်လှေတစီး နစ်မြုပ်ခဲ့သည်။