ဗန်း‌မော်မြို့တွင် ပေါက်ကွဲမှု ၃ကြိမ်ဖြစ်၊ စစ်ကောင်စီရဲများအပြင် အရပ်သား ထိခိုက်မှုရှိ

ကချင်ပြည်နယ် ဗန်းမော်မြို့အတွင်း ညောင်ပင်ရပ်ရပ်ကွက်တွင် ယနေ့နံနက် မိုင်း ၃ကြိမ်ပေါက်ကွဲမှုဖြစ်ပွားခဲ့ကာ စစ်​ကောင်စီရဲတစ်ဦးနှင့်အရပ်သားအမျိုးသမီးတစ်ဦး သေဆုံးခဲ့ကြောင်း သတင်းရရှိသည်။

အရပ်သားများဖြစ်ကြသည့် အမျိုးသားနှစ်ဦး၊ အမျိုးသမီးတစ်ဦးလည်း ထိခိုက်ဒဏ်ရာရရှိခဲ့ပြီး အခြားစစ်​ကောင်စီရဲတစ်ဦးလည်း ဒဏ်ရာရရှိခဲ့​ကြောင်း​ဒေသခံတစ်ဦးကဆိုသည်။

ညောင်ပင်ရပ် ရပ်ကွက်ရှိ သူနာပြုသင်တန်းကျောင်း၌ နံနက် ၁၀ နာရီခွဲခန့်တွင် စစ်ကောင်စီစစ်ကားဖြတ်လာသည့်အချိန် ချိန်ကိုက်ဗုံး ပေါက်ကွဲစဥ် ​သေဆုံးဒဏ်ရာရရှိခဲ့ခြင်း ဖြစ်သည်ဟု ဆိုသည်။

“အမျိုးသမီးတစ်ယောက် ပွဲချင်းပြီး ဆုံးတယ်၊ တစ်ယောက်က အရိုးဆောင်မှာ ဆေးရုံတင်ထားရပြီး ဘယ်ဘက်လက်မောင်းနဲ့ ပေါင်တစ်ခြမ်း ထိသွားတယ်၊ ယောကျာ်းလေး နှစ်ယောက်ကိုတော့ မသိဘူး”ဟု ဒေသခံတစ်ဦးက ပြောသည်။

မိုင်းပေါက်ကွဲမှုကြောင့် ထိခိုက်သေဆုံးခဲ့သည့် အမျိုးသမီးမှာ အသက် ၃၅နှစ်ရှိပြီဖြစ်ကြောင်း သိရသည်။

ဗန်းမော်မြို့ ​ညောင်ပင်ရပ် ရပ်ကွက် ဟန်းတဲဧည့်ရိပ်သာတွင် နံနက် ၈နာရီခန့်တွင်တစ်ကြိမ် ပေါက်ကွဲခဲ့ပြီး မြို့လယ်ခေါင်ရှိ နာရီစင်အနီး၌ နံနက် ၁၀ ခန့်တွင်တစ်ကြိမ်၊ ၁၀ နာရီ​ကျော်အချိန်တွင် သူနာပြုသင်တန်းကျောင်း၌တစ်ကြိမ် စုစု​ပေါင်း ၃ ကြိမ်​ ပေါက်ကွဲခဲ့သည်ဟု ဆိုသည်။

ဖေဖော်ဝါရီလ ၇ ရက်နေ့တွင်လည်း ဗန်းမော်မြို့ စစ်ကောင်စီ စည်ပင်သာယာရုံးတွင် ပေါက်ကွဲမှု ဖြစ်ပွားခဲ့သည်။