Gumshem Hpyen Dap Galaw Ai Smart Card Gaw Mungshawa Ni hpe Shayak Sha Ai Lam Sha Re

. . –

Myen mungdan hta Smart Card ngu ai hpe galaw lang na matu gumshem hpyen dap daru magam an n zing shi ai ten kaw na asuya ni myit hpang wa sai lam rai nga ai. Dai smart card ngu ai hpe hkrang shapraw jai lang na matu yaw shada ai lam hta mungchying masat lakmat masu ni, kahtap ai lam ni n byin na matu re nga nna tsun lai wa sai re. Raitim Myen mung hta Smart Card hte E-government galaw na matu mayak naw nga ai nga nna, dai ten na seng ang ai asuya salang ni tsun ai hpe chye lu ai.

Raitimung, mungdan ting hta internet hte fung matut mahkai lam ni hpe pat kau nna, mungdan daru magam zing lai wa sai gumshem hpyen dap gaw, ya du hkra smart card hte e-government hkrang shapraw na nga nna tsun nga ding yang rai nga ai.

Ya ten mungdansha ni a matu maigan de hkawm sa hkawm wa galaw na rai yang, mayak langai byin shangun taw nga ai Smart Card ngu ai gaw hpa rai ta?

UID hte OWIC card ngu ai ndai hpan hkawng hpe loi daw Smart card ngu tsun lang ma ai re.

Inglik hku Unique Identification (UID) ngu ai mungchying masat pa hpan mi gaw computer jak hte matut nna kyem zing da ai sakse masat pa hpe Smart Card ngu tsun lang nga ai.

Gumshem hpyen dap mungdan daru magam n zing shi ai ten hta maigan de pru shang hkawm sa ai shaloi Passport ngu ai; maigan pru/shang laika buk hte hkawm sa mai ai. Raitim ya yang gaw, UID smart card n lawm yang Myen mungdan kaw na maigan de pru/shang na ahkaw ahkang n jaw ai zawn, dai smart card hte passport laika buk lu tim pru hkawm sa na yak nga ai re lam chye lu ai.

Bai nna maigan de bungli galaw na matu sa ai masha ni a matu ra ai smart card hpan mi gaw, OWIC (Overseas Worker Identification Card) ngu ai rai nga ai. Ndai smart card ni hpe seng ang ai rung ni hta sa galaw ai shaloi mungchying masat laika pa kaw na matsing masat ni hte tup hkrak bung ra ai majaw, bung n bung atsawm jep chyoi la ra nga ai re.

Tara n lang ai uphkang masa ni a majaw, mungdansha ni gaw ndai smart card ni hpe aloi ali n-galaw la lu ai mayak lam ni nga nga ai re. Dai majaw, seng ang ai ni hpe mayun gumhpraw jaw nna, galaw la ra ai mabyin ni nga wa ai zawn, lapran kaw gumhpraw la nna galaw sha ai lapran masha ni mung nga wa ai. Dai majaw, gumshem hpyen dap galaw shakut nga ai smart card kaw mung shawoi na mungchying masat laika pa zawn sha, matsing masat chyashut ni naw byin pru nga ai hpe galaw ga ai masha ni tsun dan ai kaw na chye lu ai. Dai zawn smart card kaw mung matsing masat ni naw shut nga ai majaw, maigan pru/shang ai hkrunlam hta mayak mahkak ni byin wa chye ai nga nna galaw ga ai masha wa matut tsun ai re.

Ndai smart card ni hpe galaw ai shaloi tara shang ma ra ai gaw, lap hkying masum jan sha raitim, galaw la na matu na ai, la ra ai hte kaga mayak ni mung naw nga ai majaw, mayun gumhpraw jaw nna galaw la ai shaloi gaw, lap sen lahkawng hta n-ga ma ra ai lam hpe chye lu ai.

Ya ten hta Jinghpaw mung kaw internet ni yawng jahten pat da hkrum nna, fung matut mahkai mung yak hkak nga ai majaw, ndai smart card hte maigan pru/shang laika buk passport ni hpe mungdaw kata galaw la lu na lam n mai byin taw ai aten re.

Gumshem hpyen kongsi ni chyawm gaw, e-government hkrang shapraw galaw na matu matut atsun nga ai hte maigan pru/shang na matu mi rai rai, mungdan kata nga na mi rai rai mungdansha ni yawng gaw, smart card galaw ra ai nga nna matsun aming jahkrat da ai re.

Ndai smart card hpe hkrang shapraw galaw mayu ai hpyen kongsi a yaw shada lam gaw, shi hpe ninghkap nga ai mungmasha ni hpe shagyip shagyeng jep jen mayu ai yaw shada lam a majaw mung re nga nna, mungmasa masam maram ai ni gaw shiga dap ni hta madi madun tsun da ma ai re.