MDY-PDF က စဉ့်ကူးမြို့နယ်က စစ်ကောင်စီတပ်စခန်း ၁၁ ခုထိ သိမ်းပိုက်ထား
![](https://kachinwaves.com/wp-content/uploads/2024/07/450206153_886479040182654_2186355068992137055_n-1024x576.jpg)
9 July 2024 – Kachinwaves
မန္တလေးတိုင်း၊ စဉ့်ကူးမြို့နယ် စစ်ဆင်ရေးမှာ မန္တလေး PDF တပ်ဖွဲ့တွေက တပ်စခန်း ၁၁ ခု သိမ်းပိုက်ထားနိုင်ပြီး စစ်ဆင်ရေးအတွင်း သပိတ်ကျင်းမြို့နယ်မှာ တပ်စွဲထားတဲ့ စစ်ကောင်စီတပ် ဒုတပ်ရင်းမှူး ဒုတိယဗိုလ်မှူးကြီး လှိုင်ထွန်းအောင် (OTC) အပါအဝင် (၁၅) ဦးကို အရှင်ဖမ်းမိခဲ့သလို အလင်းဝင်လာသူ ပျူစောထီးအဖွဲ့ဝင်တွေလည်း ရှိခဲ့တယ်လို့ မနေ့က ဇူလိုင် ၈ ရက်နေ့မှာ MDY-PDF က ထုတ်ပြန်ပါတယ်။
ဇူလိုင်လ ၃ ရက်နေ့မှာ စဉ့်ကူးနယ်အတွင်းရှိ ဒိုးနွယ်ရွာ တပ်စခန်း၊ နမ့်ဟပ်ရွာ တပ်စခန်း၊ မာလဲဆည် ရှင်းလင်းဆောင် တပ်စခန်း၊ ရွှေမာလဲစေတီ တပ်စခန်း၊ ရွာတော်လေးတပ်စခန်းနဲ့ နွယ်ရုံရဲစခန်း စတဲ့စခန်း ၆ ခုကို MDY-PDF က အပြီးသတ်သိမ်းထားနိုင်ခဲ့ပြီး စစ်သုံ့ပန်း (၁၃) ဦးနဲ့ လက်နက်ခဲယမ်းမျိုးစုံ ၄၀ ကျော် သိမ်းဆည်းရမိတယ်လို့ ထုတ်ပြန်ချက်မှာပါရှိပါတယ်။
မနေ့က ဇူလိုင်လ ၈ ရက်နေ့မှာတော့ စဉ့်ကူးမြို့နယ်မှာရှိတဲ့ ရွှေပြည်ရဲစခန်း၊ လက်ပံလှရဲစခန်း၊ ကျည်တောက်ပေါက် တပ်စခန်း၊ ကန်တောင် တပ်စခန်းနဲ့ ပင်လယ်ကြီး တပ်စခန်းတို့ကို ထပ်မံသိမ်းပိုက်နိုင်ခဲ့တယ်လို့ MDY-PDF က ထုတ်ပြန်လိုက်ပြီး၊ စဉ့်ကူးစစ်ဆင်ရေးအတွင်းမှာ တပ်စခန်း (၁၁) ခုကို သိမ်းပိုက်ထားနိုင်တယ်လို့ ဆိုပါတယ်။
ဒါ့အပြင် စဉ့်ကူးစစ်ဆင်ရေးမှာ စစ်ကောင်စီတပ်က လေကြောင်းနဲ့ ပစ်ချပေးခဲ့တဲ့ လက်နက်ခဲယမ်းအထုပ်တွေလည်း ရရှိခဲ့ပြီး၊ တိုက်ပွဲအတွင်း လက်နက်ခဲယမ်း အများအပြား သိမ်းဆည်းရမိခဲ့တယ်လို့ MDY-PDF ရဲ့ ထုတ်ပြန်ချက်မှာ ပါရှိပါတယ်။
ဇွန်လ ၂၅ ရက်နေ့မှာ ပြန်စလိုက်တဲ့ ၁၀၂၇ ဒုတိယပိုင်း စစ်ဆင်ရေးမှာ MDY-PDF က မတ္တရာမြို့နယ်အတွင်း စစ်ဆင်ရေးမှာလည်း စစ်ကောင်စီရဲ့ စခန်းသာတပ်စခန်း၊ ကျောက်မဏ္ဍပ်တပ်စခန်း၊ စပါးကျည်တောင်တပ်စခန်း၊ ကျောက်ကြမ်းတောင်တပ်စခန်း၊ ငွေပုထိုးတပ်စခန်း၊ ရှင်မတောင်တပ်စခန်း၊ နဂါးပတ်တပ်စခန်း၊ နွားခြံကုန်းတပ်စခန်း၊ ဝန်တင်ကုန်းတပ်စခန်း၊ လက်သန်းတောင်တပ်စခန်း၊ ခြေတော်ရာတပ်စခန်း၊ ကိုရင်လေးတောင်တပ်စခန်း၊ ကင်းရွာတပ်စခန်း၊ ဆည်တော်လမ်းခွဲရှိတပ်စခန်း၊ ရေနံ့သာတိုးဂိတ်၊ ရေနံ့သာရဲစခန်းနဲ့ ပတ်လည်အင်း တပ်စခန်းတွေ အပါအဝင် စစ်ကောင်စီတပ်စခန်း စုစုပေါင်း ၁၇ ခုကို အပြီးသတ် သိမ်းယူထားနိုင်ခဲ့တယ်လို့ သိရပါတယ်။
တိုက်ပွဲဖြစ်ပွားနေတဲ့ မန္တလေးတိုင်းထဲက မိုးကုတ်၊ မတ္တရာနဲ့ စဉ့်ကူးမြို့နယ်တွေမှာ စစ်ဆင်ရေး ၁၄ ရက်တာအတွင်း အရပ်သား ၁၁ ဦးထက်မနည်း သေဆုံးကာ ၂၅ ဦးထက်မနည်း ထိခိုက်ဒဏ်ရာရရှိခဲ့ကြောင်းလည်း သိရပါတယ်။