ကျွန်းလှမြို့နယ်ထဲက NUG စာသင် ကျောင်းတစ်ကျောင်းအား စစ်ကောင်စီက လေယာဉ်ဗုံးကြဲခဲ့

စစ်ကိုင်းတိုင်း၊ ကျွန်းလှမြို့နယ်ထဲက NUG စာသင်ကျောင်းတစ်ကျောင်းအား စစ်ကောင်စီတပ်က လေကြောင်းနှင့် တိုက်ခိုက်ခဲ့သည့်အတွက် စာသင်ကျောင်းဆောင်များ ပျက်စီးပြီး ဝက်တစ်ကောင် သေဆုံးခဲ့ကြောင်း ဒေသခံများက ပြောသည်။

ယနေ့ ဇွန်လ (၁၅) ရက် မွန်းတည့် ၁၂ အချိန်ခန့်တွင် ကျွန်းလှမြို့နယ်၊ ရွာကုန်းကြီးရွာက NUG စာသင်ကျောင်းတစ်ကျောင်းကို တံတားဦးမှတက်လာသည့် Jet Fighter ၂ စင်းဖြင့် ပေါင် ၅၀၀ ဗုံး ၄ လုံး ကြဲချခဲ့ရာ စာသင်ကျောင်းအနောက်ဘက် ၂ လုံးနှင့် မြောက်ဘက် ၂ လုံးသို့ ကျရောက်ခဲ့ပြီး ၁ လုံးက မကွဲဘဲ ကျန်ရှိနေကြောင်း ဒေသခံအမျိုးသမီးတစ်ဦးက ပြောသည်။

“ဘာတိုက်ပွဲ၊ ဘာစစ်ကြောင်းမှ မရှိဘူးပါဘူး။ တမင်ကို စာသင်ကျောင်းကို လာကြဲတာပါ။ ကျောင်းအနောက်ဘက် ၂ လုံးနဲ့ မြောက်ဘက်ကို ၂ လုံးကျတာ။ ၁ လုံးကတော့ မပေါက်ကွဲခဲ့ဘူး။ ကျောင်းဆင်းပြီး ၁၅ မိနစ်လောက်မှာ လာကြဲတာပေါ့။ ကျောင်းဆင်းချိန်နဲ့ ညားလိုက်လို့ ကလေးတွေရော ဆရာ၊ ဆရာမတွေရော မထိတာ။ ကျောင်းကတော့ ပျက်စီးသွားတာပေါ့။”ဟု ဆိုသည်။

အဆိုပါ စာသင်ကျောင်းကို NUG အစိုးရက ဖွင့်လှစ်ထားပြီး KG တန်းမှ Grade-12 အထိဖွင့်ထားကြောင်း သိရပါသည်။

ရွာကုန်းကြီးရွာသည် အိမ်ခြေ ၃၀၀ ကျော်ခန့်ရှိပြီး၊ ၎င်းရွာမှ ပြည်သူ ၁ ထောင်ခန့်က ရွာတွင်မနေရဲတော့ပဲ တိမ်းရှောင်နေကြကြောင်း သိရသည်။