မြစ်ကြီးနား မန်ခိန်ရပ်ကွက်လမ်းတွင် လုယက်ခဲ့သည့် အမျိုးသားတစ်ဦးကို ရပ်ကွက်ပြည်သူများက ဝိုင်းဝန်းဖမ်းဆီးခဲ့

8 April 2024 – Kachinwaves

ကချင်ပြည်နယ်၊ မြစ်ကြီးနားမြို့ မန်ခိန်ရပ်ကွက်တွင် ဆိုင်ကယ်စီးနေသည့် အမျိုးသမီး၏ လက်ဆွဲအိတ်အား လုယက်ခဲ့သူအမျိုးသားကို အနီးအနားရှိ ပြည်သူများက ဝိုင်းဝန်းဖမ်းဆီးခဲ့ကြောင်း သိရသည်။

ယနေ့ ဧပြီလ ၈ ရက်နေ့က လူမှုကွန်ရက် (Facebook) ပေါ် ပျံ့နှံ့ခဲ့သည့် ဖြစ်စဥ်တွင် မန်ခိန်ရပ်ကွက်အတွင်း ဆိုင်ကယ်မောင်းနှင်လာသော အမျိုးသမီးတစ်ဦး၏ လက်ဆွဲအိတ်ကို အနောက်မှ ဆိုင်ကယ်ဖြင့် ကပ်လိုက်လာသည့် အမျိုးသားတစ်ဦးက ဆွဲလုခြင်းဖြစ်ကြောင်း သိရသည်။

လက်ဆွဲအိတ်လုယူခံရသည့် အမျိုးသမီးက အိတ်ကိုမလွတ်ဘဲ ပြန်လည်ဆွဲဆောင့်လိုက်သည့်အတွက် လုယက်သူအမျိုးသား ဆိုင်ကယ်မှောက်ပြီး လမ်းဘေးသို့ ထိုးကျသွားစဉ် အနီးအနားရှိ ပြည်သူများက ဝိုင်းဝန်းဖမ်းဆီးခဲ့ခြင်း ဖြစ်သည်။

လုယက်ခဲ့သူ အမျိုးသားသည် မူးယစ်ဆေးဝါးသုံးစွဲသူဖြစ်ကြောင်း ဖမ်းဆီးခံရစဉ်ဖြေကြားခဲ့သည်ကို တွေ့ရသည်။

မြစ်ကြီးနားမြို့တွင် အာဏာသိမ်းပြီးနောက်ပိုင်း မူးယစ်ဆေးဝါးသုံးစွဲမှုများ အလွန်များပြားလာကာ လုယက်မှုများလည်း မကြာခဏဖြစ်ပေါ်လျှက်ရှိသည်။