မိုးညှင်းတွင် ကျွဲရှာထွက်သည့် သားအမိ လက်နက်ကြီးထိ၍ ပြင်းထန်ဒဏ်ရာရ

6 December 2023 – Kachinwaves

မိုးညှင်းမြို့၊ ထန်းတပင်ကျေးရွာတွင် လက်နက်ကြီးပေါက်ကွဲမှုကြောင့် မိသားစုတစ််စုမှ အသက်မပြည့်သေးသည့် ကလေးနှစ်ဦးနှင့် မိခင်တစ်ဦး ထိခိုက်ဒဏ်ရာရခဲ့ကြောင်း သိရသည်။

မိုးညှင်းမြို့အရှေ့မြောက်ဘက်၊ ထန်းတပင်ကျေးရွာတွင် ကျွဲရှာသွားသည့် မိသားစုတစ်စုမှ ကလေးနှစ်ဦးနှင့် မိခင်တစ်ဦး ထိခိုက်ဒဏ်ရာရခဲ့သည်ဟု မိုးညှင်းဒေသခံ အမျိုးသားတစ်ဦးက ဆိုသည်။

“သားအမိလေးယောက်က ကျွဲရှာ ထန်းတပင်ရွာဘက်ကိုသွားတာ။ အပေါ်ကနေ လမ်းလျှောက်သွားနေတဲ့ ကလေးနှစ်ဦးကြားထဲ ပြုတ်ကျတယ်လို့ သိရတယ်ဗျ”

အသက် ၁၀ နှစ်အောက် ကလေးငယ်နှစ်ဦးမှာ ခြေထောက်များတွင် ထိခိုက်ဒဏ်ရာများ ရရှိခဲ့ပြီး ၎င်းတို့အနက်တစ်ဦးမှာ စိုးရိမ်ရသည့်အခြေအနေရှိကြောင်း ၎င်းကဆိုသည်။

“ကလးနှစ်ဦးလုံး ခြေထောက်ထိထားတယ်။ ဖြတ်ရလောက်မယ့် အခြေအနေ တစ်ဦးကကျောနောက်ထိပြီး အူတွေပါထွက်ပြီးအသည်ပါထိထားတယ်။”

မိခင်မှာမစိုးရိမ်ရဒဏ်ရာရရှိခဲ့ပြီး အခြားကလေးငယ်တစ်ဦးမှာ ထိခိုက်မှုမရှိကြောင်း သိရသည်။

ယနေ့နံနက် လက်နက်ကြီးပစ်ခတ်မှုကို မည်သည့်အဖွဲ့ကပြုလုပ်ခဲ့သည်ကို မသိရှိရသေးသော်လည်း ယမန်နေ့ညပိုင်းကမူ စစ်ကောင်စီဘက်မှ လက်နက်ကြီးပစ်ခတ်သံနှစ်ချက်ကို ကြားရကြောင်း မိုးညှင်းဒေသခံထံမှသိရသည်။

စက်တင်ဘာ ၅ ရက်နေ့ကလည်း စစ်ကောင်စီတပ်၏ လက်နက်ကြီး ပစ်ခတ်မှုကြောင့် ထန်းတစ်ပင်ကျေးရွာမှ အမျိုးသမီးတစ်ဦး လက်နက်ကြီးစ ထိမှန်ဒဏ်ရာရရှိခဲ့သည်။