စစ်ကောင်စီတပ်၏ လက်နက်ကြီးရမ်းသမ်း ပစ်ခတ်မှုကြောင့် မြိုင်မြို့နယ် နှောပင်ကျေးရွာအုပ်စုမှ ပြည်သူများ သေဆုံး ဒဏ်ရာရ

29 October 2023 – Kachinwaves

မကွေးတိုင်း မြိုင်မြို့နယ် နှောပင်ကျေးရွာအုပ်စု ကင်းရွာအား ဖန်းကန်ကျေးရွာမှ စစ်ကောင်စီတပ်က လက်နက်ကြီးဖြင့် ယနေ့မွန်းလွဲ ၁ နာရီခန့်တွင် တိုက်ပွဲဖြစ်ပွားခြင်းမရှိဘဲ ရမ်းသမ်းပစ်ခတ်ခဲ့၍ ကျေးရွာပြည်သူများ ဒဏ်ရာရရှိသူနှင့် သေဆုံးသူများ ရှိကြောင်း ကနဦး သတင်းရရှိသည်။

ဖန်းကန်ကျေးရွာရှိ စစ်ကောင်စီတပ်၏ ယနေ့ လက်နက်ကြီးပစ်ခတ်မှုကြောင့် ကင်းရွာမှ အမျိုးသားတစ်ဦး၊ အမျိုးသမီးတစ်ဦး သေဆုံးပြီး သေဆုံးသူအမျိုးသား၏ ကလေး (၄)နှစ်အရွယ် လက်တစ်ဖက်ပြတ်သွားကြောင်း သတင်းရင်းမြစ်က ဆိုသည်။ သေဆုံးသွားသူအမျိုးသမီး၏ ဆိတ်လေးကောင်လည်း လက်နက်ကြီးကြောင့် သေသွားသည်ဟု သိရသည်။

ကန်ရပ်ကြီးကျေးရွာမှ ကိုရင် ၂ ပါးလည်း စစ်ကောင်စီတပ်၏ လက်နက်ကြီး ပစ်ခတ်မှုကြောင့် တနေ့တည်းတချိန်တည်းတွင်ပင် ပျံလွန်တော်မူခဲ့ပြီး အခြားပြည်သူ ၈ ဦး ဒဏ်ရာရခဲ့ကြောင်း ဒေသသတင်းရင်းမြစ်တစ်ဦးက Kachinwaves ကိုပြောသည်။

သတင်းနှင့်ပတ်သက်၍ ဆက်လက်စုံစမ်း‌ဆဲဖြစ်သည်။