ဖားကန့်တွင် ရွှေဆိုင်တစ်ခု ဓါးပြတိုက်ခံရ

6 October 2023 – Kachinwaves

ဖားကန့်မြို့၊ လုံးခင်းကျေးရွာတွင် ယမန်နေ့မွန်းလွဲ ၂ နာရီက မိုးရတနာရွှေဆိုင် ဓားပြတိုက်ခံခဲ့ရကြောင်း သိရသည်။

လုံးခင်းကျေးရွာအလယ် လူစည်ကားသည့် နေရာတွင်ဖွင့်လှစ်ထားသော မိုးရတနာရွှေပန်းတိမ်ဆိုင်၌ လူလတ်ပိုင်းအရွယ်ရှိမည် ထင်ရသည့် အမျိုးသားလေးဦး ဝင်ရောက်ဓားပြတိုက်သွားခြင်းဖြစ်ကြောင်း ဖားကန့်ဒေသခံ အမျိုးသားတစ်ဦးက ဆိုသည်။

“ဓားပြလာတိုက်တဲ့သူက လူငယ်၊ လူလတ်ပိုင်းပေါ့နော်၊ လေးဦးဟာဆိုင်ကယ်နှစ်စီးနဲ့ ဆိုင်ထဲဝင်ရောက်လာ ပြီးမှ တရှိန်ထိုးဆိုင်ထဲဝင်ရောက်လာပြီးမှ ဆိုင်ဝန်ထမ်းတွေကိုသူက ခြိမ်းခြောက်ပြီးမှ ရှိသမျှရွှေတွေကို ဓားပြတိုက်တာ”

ဓားပြတိုက်သူတို့၏ မျက်နှာတွင် နှာခေါင်းစည်း (မက်စ်)တပ်ဆင်ထားသည့်အတွက် မျက်နှာပုံပန်းသွင်ပြင် ကို မသိရှိရကြောင်းနှင့် ဓားပြတိုက်ပြီးနောက် ၎င်းတို့လေးဦးမှာ လုံးခင်းကျေးရွာလမ်းမကြီးအတိုင်းပင် ထွက်ခွာသွားကြောင်း သိရသည်။

ရွှေထည်နှင့် ကျောက်မျက်ရတနာများကို ယူဆောင်သွားသည့်အတွက် ပန်းထိမ်ဆိုင်ပိုင်ရှင်မှာ ငွေကျပ်သိန်း ခြောက်ထောင်ဝန်းကျင် ဆုံးရှုံးခဲ့ရကြောင်း သိရသည်။

အဆိုပါဓားပြတိုက်မှုအပြင် ယမန်နေ့က ဖားကန့်မြို့နယ်၊ ဖားပြင်ကျေးရွာနှင့် မမုံကျေးရွာများတွင်လည်း အမျိုးသားနှစ်ဦး ပစ်သတ်ခံရသည့်ဖြစ်စဉ်လည်း ရှိခဲ့သည်။