ဖားကန့်မြို့တွင် KTV မန်နေဂျာ အမျိုးသားတစ်ဦး ပစ်သတ်ခံရ

18 August 2023 – Kachinwaves

ကချင်ပြည်နယ်၊ ဖားကန့်မြို့လုံးခင်းကျေးရွာ၌ ဖွင့်လှစ်ထားသည့် Green City KTV မှမန်နေဂျာအမျိုးသားကို ယမန်နေ့ည ၉ နာရီခန့်တွင် အမည်မသိလက်နက်ကိုင်နှစ်ဦးက သေနတ်ဖြင့်ပစ်ခတ်ရာ အဆိုပါအမျိုးသား သေဆုံးခဲ့ကြောင်း သိရသည်။

သေဆုံးသူ၏ ရင်ဘတ်နှင့် ဦးခေါင်းများ၌ ကျည်ပေါက်ထွက်ဒဏ်ရာများရှိပြီး မည်သည့်အကြောင်း အရင်း ကြောင့် ပစ်ခတ်သည်ကိုမူ မသိရှိရကြောင်း အလောင်းသယ်ဆောင်ရာတွင် ပါဝင်ခဲ့သည့် အမျိုးသားတစ်ဦး က ပြောသည်။

“လူငယ်နှစ်ယောက်က ဆိုင်ကယ်နဲ့လာပြီးပစ်သွားတယ်လို့ ကြားတာ။ ဖြစ်စဉ်အကုန်လုံးကို အစအဆုံး မသိရဘူး”ဟု ပြောသည်။

ယခုပစ်ခတ်မှုကို မည်သည့်အဖွဲ့အစည်း၏ လက်ချက်ဖြစ်သည်ကို စုံစမ်းသိရှိနိုင်ခြင်း မရှိသေးပါ။

သေဆုံး သူမှာ အသက် ၄၅ နှစ်အရွယ် ကိုကျော်ထွန်းအောင်ဆိုသူဖြစ်ပြီး ၎င်း၏ရုပ်အလောင်းကို လူမှုကူညီရေးအသင်းက ဖားကန့်ပြည်သူ့ဆေးရုံကြီးသို့ ပို့ဆောင်ခဲ့ကြောင်း သိရသည်။

ယမန်နေ့ကလည်း ဖားကန့်မြို့၊ ယူမာရပ်ကွက်တွင် အမည်မသိအမျိုးသားနှစ်ဦး သေနတ်ဒဏ်ရာများဖြင့် သေဆုံးနေသည့်ဖြစ်စဉ်လည်း ရှိခဲ့သည်။