ကချင်ပြည်နယ်က NLD ၏ လွှတ်တော်ကိုယ်စားလှယ်နှစ်ဦး နေအိမ် ချိပ်ပိတ်ခံရပြန်

29 June 2022 – Kachinwaves

မြစ်ကြီးနားမြို့နှင့် ဖားကန့်မြို့ရှိ NLD ပါတီ လွှတ်​တော်ကိုယ်စားလှယ် နှစ်ဦး​၏ နေအိမ်များကို ယ​နေ့ ဇွန်လ ၂၉ ရက်​နေ့တွင် စစ်​ကောင်စီက အကြမ်းဖက် တိုက်ဖျက်​ရေး ဥပ​ဒေဖြင့် ချိပ်ပိတ်လိုက်ကြောင်း သိရသည်။

မြစ်ကြီးနားမြို့ စစီတာပူရပ်ကွက်ရှိ အမျိုသားလွှတ်​တော်ကိုယ်စားလှယ် ဦးအင်ထုံးခါး​နော်ဆမ် နှင့် ဖားကန့်မြို့ ရှ​ရော်ခကျေးရွာ ပြည်သူ့လွှတ်​တော် ​ကိုယ်စားလှယ် ဦး​အောင်ဟိန်းမင်းတို့၏ နေအိမ်များကို စစ်ကောင်စီက ချိပ်ပိတ်လိုက်ခြင်း ဖြစ်သည်။

နေအိမ်ချိပ်ပိတ်ခံရမှုနှင့် ပတ်သက်၍ ပြည်သူ့လွှတ်​တော်ကိုယ်စားလှယ် ဦး​အောင်ဟိန်းမင်းက ယခုလို ပြောသည်။

“ဟုတ်တယ် ဒီမနက် အ​စောပိုင်းမှာ သူတို့ အင်အားအများအပြားနဲ့ ​ရောက်လာတယ်။ အရပ်၀တ်နဲ့​ကော ယူနီ​ဖောင်းနဲ့​ကော အိမ်စီးကား​တွေနဲ့​ရောက်လာပြီး​တော့ ချိပ်ပိတ်သွားတာ”ဟု ပြောသည်။

စစ်​ကောင်စီ၏ လုပ်ရိုးလုပ်စဥ် ဖြစ်ပြီး ကြိုတင် မျှော်လင့်ထားသည့် ကိစ္စဖြစ်၍ ချိပ်ပိတ်ခံရသည်ကို ဘာခံစားချက်မှ မရှိကြောင်း ဦး​အောင်ဟိန်းမင်းက ဆက်​ပြောသည်။

ကာယကံရှင်များ ဖြစ်ကြသည့် လွှတ်​​တော်ကိုယ်စား ၂ဦးစလုံးသည် လွတ်မြောက်‌နယ်မြေသို့ တိမ်းရှောင်‌နေပြီး အာဏာရှင်ဆန့်ကျင်ရေးတွင် ပါဝင်‌နေကြသူများ ဖြစ်သည်။