Gumhpraw Manu Hkrat Ai (Inflation) Ngu Ai Gaw Hpa Rai Ta?

. –

Anhte ni chyahkring hkring na nga ai Ingalik hte Myen ga hku Inflation ငွေကြေးဖောင်းပွမှု gumhpraw manu hkrat ai ngu ai gaw hpa rai ta?

Gumhpraw manu hkrat ai ngu ai gaw, gunrai manu ni hte ဝန်ဆောင်ခ ngu ai shabri shabrai (service) manu ni rawt wa ai majaw, gunrai kachyi mi hpe sha gumhpraw law law jaw nna, mari ra wa ai hpe tsun ai re.

Kaning re ai ten hta Inflation gumhpraw manu hkrat ai lam byin chye a ta?

Mari mayu ai shadang (ဝယ်လိုအား) law wa ai majaw, byin wa ai lam. Ga shadawn, shang gumhpraw kaja ai majaw, gumhpraw lu jai ai masha ni law wa yang, gunrai mari mayu ai shadang tsaw wa nna, gunrai ni a manu ni mung hkan rawt wa ai shaloi, gumhpraw manu hkrat ai ငွေကြေးဖောင်းပွမှု byin chye nga ai.

Bai nna, gunrai galaw shapraw ai jak-rung ni hta rang bang ra ai, ayin arang ni grau law wa ai majaw, galaw shapraw da ai gunrai ni hpe manu sharawt nna dut ra wa ai shaloi mung, gumhpraw manu hkrat ai lam ငွေကြေးဖောင်းပွမှု byin chye nga ai.

Mungdan langai hta ndai zawn inflation gumhpraw manu hkrat wa ai hpe, gumhpraw dum ginjaw (ဗဟိုဘဏ်) hte mungdan asuya ni hku nna, polisi jahkrat hparan ra ai re. Raitim, ya yang Myanmar mungdan hta gumshem hpyen dap gaw, laba ka-up daru magam zing nga ai re majaw, mungmasa, hpyen masa n ru n ra byin nga nna, gumhpraw manu hkrat ai lam hpe hparan jasan n lu byin nga ai re.

Gumhpraw manu hkrat ai lam gaw aten ladaw langai laman hta sha byin chye ai rai tim, Myanmar mungdan hta gaw gumshem hpyen dap mungdan daru magam zing kau ai ten kaw na ya du hkra jahkring da n lu ai masa rai nga ai.

Gashadawn yu ga nga yang, 2021 ning shawng daw shaloi lap 1000 mi hte udi hkum 8 lu mari ai raitim, ya gaw udi langai mi lap 500 du nga sai re. Ndai gaw, Myanmar mungdan hta gumhpraw manu ding yang hkrat ai lam dan dawng nga ai sakse rai nga ai.