Shayi Sha Gaw Mungdan Makyit Sumri

https://youtu.be/kCbN1EqxQwE?si=qw19F9xJHJ7y3ssE

:

–

Wunpawng myusha, Zaiwa ga malai langai rai nga ai, “Byi Zaw Gi, Ming Twi Hkying” Jinghpaw ga hku, “Shayi Sha Gaw Mungdan Makyit Sumri” ngu ai lachyum re. Lai sai ten na gumchying gumsa uphkang masa hta gumchying gumsa du ni; lamu ga a majaw shing nrai du magam sari sadang makawp ai hte kaga lam amyu myu ni a majaw, gasat gala lam ni law law nga lai wa sai re. Ndai zawn re ai, n pri n nem ai masa ni hpe lai di lu na matu, hparan hting-ram ai lam hta du kasha (shayi numsha) ni hpe shada jaw hkat, la hkat nna mayu, dama makyit sumri shangang la ai lam hte manghkang hpe hparan hting-ram ai ladat ni galaw lai wa sai re. Dai majaw shayi numsha ngu ai gaw, “mungdan makyit sumri” ngu ai ga malai pru wa ai rai nga ai.

Ndai zawn gumchying gumsa du shada n hkrum n ra gasat ahkawk hkat ai kaw na, mayu dama jinghku bai tai let, shada makawp maga hkat ai masa byin lu na matu, shayi numsha ni gaw shawa akyu a matu mahkrai tai ya ai hku: kaja ai zawn rai timung, dai num kasha a myitra hkamsha lam ni hpe sawn shalawm ya ai lam n nga ai sha, Kanu Kawa ni a matsun kata kaw hkan shadik shatup nang ra ai masa mung rai nga ai. Dai majaw, shayi numsha gaw tinang n tsaw n ra tim, myi sai n htuk tim matsun kata kaw dinghku shang ra mat nna, myiprwi si lagu mayut let, nga pra ra ai lailen gaw lai mat wa sai re.

Lai mat wa sai re ngu tim, daini na prat hta mung, du kasha shada n rai tim, Kanu Kawa nkau mi gaw, sutgan lu su ai, hpaji grau kung ai, arawng aya lu ai ni hte tinang a kasha numsha ni hpe atik anang jaw sha, hkungran dinghku de ya ai lam ni mung naw nga nga ai re.

Dai majaw, gumchying gumsa du ni shada num jaw num la hkat nna hting-ram simsa lam tam ai gaw, mungmasa, hpyen masa lam hpe yaw shada ai rai tim, dai ni na Kanu Kawa nkau ni a yaw shada ai lam chyawm gaw: sutgan arawng aya hpe myit marin nna kasha shayi numsha ni hpe, tinang nga pyaw lam a matu arang shatai ai zawn mung byin wa nga ai hpe mu mada lu ai.

Gumchying gumsa du ni a lai ladat hpe dai ni na prat a mungmasa, hpyenmasa hku nna bai sawn dinglik jahtuk yu yang, gumchying gumsa du ni gaw shayi numsha ni hpe, shanhte a mungsang masa zailadat hkrang shapraw ai lam hta jailang ai hku rai nga ai hpe mu lu ai. Dai hpe yu yang amyushayi ni gaw, mungdan simsa lam lu na matu lai mat wa sai prat masa kaw nna apnawng machyi hkam, arang bang lai wa sai ni rai nga ai hpe mu lu ai. Rai tim lai sai gumchying gumsa ten na lai ladat gaw; amyu shayi ni madu myitra ai hku n mai galaw grit nem ai masa, shinggyim sari sadang hkrat sum hkam nna jailang hkam sha ra ai ladat sha rai nga ai.

Raitim, dai hpe dai ni na rawt jat nga sai prat masa, shinggyim ahkaw ahkang hpe manu shadan chye nga sai mungkan prinra hta, tinang a , , lam ni grau awngdang lu na matu, sari sadang nga nga hte hkungga masat shagrau hkrum let magam lit ni hpe woi awn gunhpai lu ai: mungsang datkasa, shayi numsha ningbaw ningla ni law law byin tai wa lu na matu, zailadat shaw, sawn shachyaw let hkrang shapraw la mai ai lam rai nga ai law. Chyeju kaba sai.