Num La Shut Yang Prat Tup hte Num Wa Shut Yang Prat Tup

:

–

Lai wa sai ten hta anhte Wunpawng myusha ni gaw, mam, n-gu hte kaga sihtu simai ni lu na matu yi hkyen nna kanbau bungli hpe madung galaw ai re. Dai zawn yi hkyen ai ten hta galang lang yi shara yaw shut, lata shut ai shing nrai du hkra ladaw aten dep n lu galaw kau ai shaning ni nga chye nga ai. Dai zawn re ai shaning ni hta mam lu ging ai ram n lu ai lam ni byin chye nga ai. Lai sai ten hta Wunpawng sha ni gaw, yi ngu ai hpe shara mi kaw laning mi sha galaw nna hpang shaning kaga shara nam maling kaw yi hkyen shara bai yaw ai. Matut manoi galaw yang, namhpun hkyet wa nna mam pru shadang n law wa ai majaw, laning mi shara langai htawt nna galaw sha ai ladat re. Namhpun rawng ai nam maling shara ni hta sha npun yi ngu nna hpang shaning ni hta bai galaw sha chye ma ai. Raitim masum ning hta gaw n jan ai hku re. Dai majaw lai sai ten hta gaw, jahku ning hpring ai shaloi she mi na yi maling shara de galang mi bai gayin du nna galaw sha ai lam chye lu ai.

Maga mi de, Wunpawng myusha ni mayaw htinggaw de ai htunghking hta num langai sha la mai ai masa n rai tim, galang mi hkrung-ran la sai madu jan hpe jahka kau ai htunglai n nga ai daram re. Dai ni na Hkristan dinghku de ai htung tara hta mung, madu jan madu wa langai hte sha dinghku de na ahkang lu nga ai. Dai majaw, “ , .” ngu ai ga malai pru wa ai masa rai nga ai.

Lahta e tsun ai ga malai gaw, anhte Wunpawng myusha ni a galaw lu galaw sha ai magam bungli hte htunghking hta mahta nna prut pru wa ai, ga malai ni re. Yi hkyen shut ai gaw laning mi sha re, num la shut yang prat tup hkam sha ra na re majaw, num la n shut na matu la ni hpe shadum sharin ai shaloi madung jai lang ai, ga malai langai rai nga ai hpe mu mada lu ai.

Ndai moi na ga malai hta gaw, “Num la shut yang” ngu ai gasi gaw “La” ni sadi maja lu na matu shadum ai sha rai nna, dinghku langai a gam maka n kaja wa yang “Num” ni hpe hkrai mara jaw ai manawng nsam pru nga ai. Raitimung dai ni na prat masa a tatut sakhkrung lam hta gaw la kasha ni num la shut ai sha n re, num kasha ni num wa shut ai mabyin ni mung law nga ai. Dai zawn re ai mabyin ni hta “Num” jan hkam sha ra ai ni law law rai nga ai.

Dai majaw, “ , ” ngu tsun na zawn re ai mabyin ni mung law law rai nga ai.

Ya prat na Wunpawng sha ni a galaw lu galaw sha lam ni mung, nam maling langai hpe yi laning mi sha galaw nna hkyen sha ai ladat n rai, yi hkyen ngut yang kaga akyu rawng ai namsi namsaw hpun kawa ni hkai shatut nna, lamu ga ni hpe galaw madu la chye ai ladat rai nga sai.

Dai majaw tsun mayu ai gaw, prat masa hta hkan nna galaw lu galaw sha lam ni mung rawt jat galai shai wa sai majaw, lai sai ten na ga malai ni a myit jasat hte ka-up galup da hkrum ai ni n re sha, num la, madu jan madu wa, ngu ai lam ni mung ta tut tinang a byinda masa hta hkan nna mu mada hting-ram la chye ra nga saga ai.