ABSDF အမှတ် (၂) စစ်ကြောင်းထံသို့ စစ်ကောင်စီတပ်သားတစ်ဦး လက်နက်နှင့် အလင်းဝင်

11 April 2024 – Kachinwaves

မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF) ၏ ရှမ်းမြောက်ဒေသ အခြေစိုက် အမှတ် (၂) စစ်ကြောင်းထံသို့ စစ်ကောင်စီတပ်သားတစ်ဦး မတ်လ ၃၀ ရက်နေ့က လက်နက်နှင့် အလင်းဝင်လာခဲ့ကြောင်း ယမန်နေ့က သတင်းထုတ်ပြန်ခဲ့သည်။

အလင်းဝင်ရောက်လာသူ စစ်ကောင်စီတပ်သားသည် ပခုက္ကူအခြေစိုက် တပ်မ (၁၀၁) လက်အောက်ခံ ခလရ (၂၃၅) မှဖြစ်ပြီး ၎င်းတာဝန်ကျရာ ရှမ်းပြည်နယ်မြောက်ပိုင်း မိုးမိတ်မြို့နယ်တွင် လှုပ်ရှားသည့် ခလရ (၃၄၈) တပ်ရင်းမှ အလင်းဝင်ရောက်လာခြင်းဖြစ်သည်ဟု ABSDF ၏ အမှတ် (၂) စစ်ကြောင်း ပြန်ကြားရေးတာဝန်ခံ ရဲဘော်တစ်ဦးက ပြောသည်။

အလင်းဝင်ရောင်လာသည့် တပ်သားနှင့်အတူ MA-1 သေနတ် (၁) လက်နှင့် ကျည် (၁၂၀) ပါဝင်ပြီး ABSDF ဘက်မှ ဂုဏ်ပြုငွေများပေးအပ်ကာ လုံခြုံသည့်နေရာသို့ ပို့ဆောင်ပေးခဲ့ကြောင်းလည်း ပြောပါသည်။

ခလရ ၃၄၈ စစ်ကြောင်းသည် လမ်းသွားလမ်းလာပြည်သူများကို အနိုင်ကျင့်ခြင်း၊ ဆဲဆိုခြင်း၊ ကိုယ်ထိလက်ရောက်ကျူးလွန်ခြင်းများ ပြုလုပ်သည်ဟု အဆိုပါအလင်းဝင်ရောင်လာသူ စစ်ကောင်စီတပ်သားက ထွက်ဆိုထားကြောင်း ထုတ်ပြန်ချက်၌ ပါရှိသည်။ ထို့အပြင် အထက်အရာရှိများနှင့် တခြားစစ်သားများက ၎င်းအား အနိုင်ကျင့်ခြင်း၊ ဆဲဆိုကြိမ်းမောင်းခြင်း၊ ထိုးကြိတ်ရိုက်နှက်ခြင်း၊ နှိမ့်ချခွဲခြားဆက်ဆံခြင်းများကြောင့် ABSDF ထံသို့ အလင်းဝင်ရောက်လာခြင်းဖြစ်သည်ဟု ABSDF ၏ ထုတ်ပြန်ချက်တွင် ပါဝင်သည်။

ABSDF ၏ အမှတ် (၂) စစ်ကြောင်းသည် ရှမ်းပြည်နယ်မြောက်ပိုင်း မိုးမိတ်မြို့နယ်၊ နောင်ချိုမြို့နယ်၊ မိုးကုတ်မြို့နယ်၊ နန့်ခမ်းမြို့နယ် စသည့် မန္တလေးတိုင်းနှင့် ရှမ်းမြောက်‌ဒေသများတွင် လှုပ်ရှားလျှက်ရှိပြီး စစ်ကောင်စီ တော်လှန်တိုက်ပွဲဝင်နေ‌သည့်အဖွဲ့ဖြစ်ကြောင်း သိရသည်။