နေအိမ်တည့်တည့် လက်နက်ကျရောက်ပေါက်ကွဲတာကြောင့် နှစ်ဦး ဒဏ်ရာရ၊ တစ်ဦးသေဆုံး

25 March 2024 – Kachinwaves

မိုးမောက်မြို့နယ်၊ မင်းဂျမ်းကျေးရွာမှာ ဒီမနက်အစောပိုင်းက လက်နက်ကြီးပေါက်ကွဲမှုကြောင့် အရပ်သားတစ်ဦးသေဆုံးပြီး နှစ်ဦး ဒဏ်ရရတဲ့ဖြစ်စဉ် ဖြစ်ပွါးခဲ့ကြောင်း သိရပါတယ်။

ကျေးရွာထဲကို လက်နက်ကြီးတွေ ကျရောက်လာတဲ့အချိန် ထွက်ပြေးဖို့ကြိုးစားခဲ့ပေမယ့် အိမ်ထဲတည့်တည့် ကျရောက်လာတာကြောင့် ထိခိုက်ခဲ့တာဖြစ်တယ်လို့ မိုးမောက်မြို့က စစ်ရှောင်တစ်ဦးက ဆိုပါတယ်။

“အသံကြားတော့ အိမ်ကနေပြေးဆင်းမလို့ ထွက်နေတုန်းပဲရှိသေးတယ်။ အိမ်ခေါင်မိုးပေါ် လက်နက်ကြီးက ကျလာတာနဲ့ ထိသွားတာ”

လက်နက်ကြီးပေါက်ကွဲမှုကြောင့် မိသားစုတစ်စုထဲက ဆယ်နှစ်အောက် ယောကျ်ားလေးတစ်ဦးနဲ့ ဆယ်နှစ်ကျော်အရွယ် မိန်းကလေးငယ်တစ်ဦး လက်နက်ကြီးစ ပြတ်ရှဒဏ်ရာတွေရခဲ့ပြီး အသက် ၃၀ နှစ်အရွယ် အမျိူးသားတစ်ဦးကတော့ ဦးနှောက်ပွင့်ထွက်ဒဏ်ရာနဲ့ ပွဲချင်းပြီးသေဆုံးခဲ့တယ်လို့ ဆိုပါတယ်။

မတ်လ ၂၁ ရက်ကလည်း မိုးမောက်မြို့နယ် ဟင်းသာရွာမှာ လက်နက်ကြီး ကျရောက်ပေါက်ကွဲခဲ့လို့ မင်းဂျမ်းကနေ လာရောက်စစ်ရှောင်နေတဲ့ အမျိုးသမီးနှစ်ဦးသေဆုံးပြီး ငါးဦးဒဏ်ရာရခဲ့ပါသေးတယ်။