ကျင်စန်းကျော့ကားဂိတ်အတွင်းသို့ လက်နက်ကြီးကျရောက်ပြီး ကုန်တင်ကားများ မီးလောင်ပျက်စီး

23 November 2023 – Kachinwaves

ရှမ်းပြည်မြောက်ပိုင်း၊ မူဆယ်မြို့တွင် စစ်ကောင်စီနှင့် MNDAA တို့ အပြန်အလှန် လက်နက်ကြီးပစ်ခတ်မှုဖြစ်ပွားနေပြီး စစ်တပ်ဘက်မှ ပစ်ခတ်သည့်လက်နက်ကြီးကြောင့် ကုန်တင်ကားများမီးလောင်နေကြောင်း သိရသည်။

တရုတ် – မြန်မာ နယ်စပ်မျဉ်းတစ်လျှောက်တွင်ရှိနေသည့် စစ်ကောင်စီတပ်ဖွဲ့ဝင်များကို MNDAA အဖွဲ့က ဒရုန်းဖြင့်လိုက်လံဗုံးချ တိုက်ခိုက်သည့်အတွက် မူဆယ် ၁၀၅ မိုင် စစ်ကောင်စီစခန်းကုန်းမှ လက်နက်ကြီးများဖြင့် ပြန်လည်ပစ်ခတ်ခဲ့ရာ နယ်စပ်အနီးရှိ ကျင်စန်းကျော့ကားဂိတ်အတွင်းသို့ ကျရောက်ရာမှ မီးလောင်မှု ဖြစ်ပွားခဲ့ခြင်းဖြစ်ကြောင်း ဒေသခံထံမှ သိရှိရသည်။

နံနက် ၉ နာရီဝန်းကျင်မှစပြီး မီးလောင်မှုဖြစ်ပွားခဲ့ပြီး ကားအစီးရေ နှစ်ဆယ်ထက်မနည်း မီးလောင်ပျက်စီးနိုင်ကြောင်း သိရှိရသည်။

မီးလောင်မှုဖြစ်ပွားနေသည့် ကျင်စန်းကျော့ဂိတ်မှာ တရုတ်နိုင်ငံ ဝမ်တိန်မြို့နှင့် ထိစပ်နေသည့် တရုတ် – မြန်မာနယ်စပ်၊ မြန်မာဘက်အခြမ်းတွင်ရှိပြီး ယင်းဂိတ်တွင် ရပ်နားထားသည့် ကုန်တင်ကားအစီးပေါင်း ၁၀၀ ကျော်ရှိကြောင်း သိရသည်။