Jinghpaw Ga Hku: Hku Hkau Shakawn Mying, Tsawra Shakawn Mying, Hkungga Shakawn Mying Ni Hpe Tsun Shaga Lang Ai Htunghking

–

Mungkan ting na n bung ai masha amyu ni hta nta masha shada da, shing n rai manaw manang shada da langai hte langai kanawn mazum ai lam grau nna mahkri shawn hku hkau lu na matu, mying majing hpe shaga na malai; hku hkau ai mying lama ma hpe shaga ai htung lai ni nga ai re. Anhte Wunpawngsha ni hta gaw, dai zawn hkungga tsaw ra masat ai, shakawn mying ni laksan nga nga mali ai re. Ndai gaw moi Ji woi Ji wa prat kaw nna shaga jai lang wa ai shakawn hkungga tsaw ra ai lam hpe madun dan ai htung lai kaja langai rai nga mali ai. Dai hku shaga jai lang ai hta Jinghpaw ga hku “la” ni hpe shaga ai shakawn tsaw ra mying ni hte “num” ni hpe shaga ai shakawn tsawra mying ni hpe laksan masat da nga ai re.

Raitim dai ni na prat hta gaw Jinghpaw ni nan, ndai shada hku hkau tsawra shakawn shaga hkat ai mying ni hpe jaw ang ai hku n chye tsun shaga ai ni law wa nga ai hpe maram mu lu nga ai. Dai majaw ndai bat hta gaw Jinghpaw ni a hku hkau tsawra shakawn mying ni hpe shada daw ang ai hta hkan nna tsun shaga lang ai htung lai len ni hpe ngai Ah Pan hku nna tang madun mat wa na nngai.

() ()

:

Ma Gam hpe Ah Gam

Ma Naw Hpe Ah Naw shing n rai Naw Naw

Ma La hpe Ah La shing nrai Ah Doi

Ma Tu hpe Ah Tu shing nrai Tu Tu

Ma Tang hpe Ah Tang shing nrai Ah Gun

Ma Yaw hpe Ah Yaw shing nrai Ah Htung ngu nna tinang grau manu dum ai hku mai shaga nga ai.

Ndai hku n rai tim mung, shi a mying kaw na shaga manu ai gasi langai ngai hpe shaga mai nga ai. Malawng maga gaw mying a jahtum na gasi hpe shaga ai htung lai rai nga mali ai.

Num kasha ni hpe gaw Kaw, Lu, Roi ndai masat da ai mying ni hpe shaga lang ai lam nga ai rai tim law malawng gaw, mying kaw lawm ai grau manu ai gasi langai ngai hpe mahta shaga ai hpe grau mu lu nga ai.

() () /

:

Ma Gam rai yang, Ah Hpu shing nrai Ah Ba ngu shaga ai. Ginra nkau ni hta gaw Hpu Ba shing nrai Hpu Krang ngu shaga ai.

Ma Naw rai yang, Hpu Bawk shing n rai Hpu Ji

Ma La rai yang, Hpu Doi

Ma Tu rai yang, Hpu Lum shing nrai ginra nkau ni hta Pan Tu

Ma Tang rai yang, Hpu Gun shing nrai ginra nkau ni hta Pan Tang

Ma Yaw rai yang, Hpu Htung

Ma Hka rai yang gaw kaji dik hpungdim re majaw Hpu Dim ngu nna shaga ai re.

:

Ma Kaw rai yang, Ah Shawng ginra nkau ni hta Ah Ba, Ba Kaw

Ma Lu rai yang, Ah Bawk shing nrai Ji Lu

Ma Roi rai yang, Ah Ji shing nrai Ji Roi

Ma Htu rai yang, Ah Lum

Ma Kai rai yang, Ah Htang

Ma Hka hte Ma Pri ni gaw kaji dik hpungdim ni re majaw Dim Hka, Dim Pri ngu shaga ai re.

Tinang gaw “la” rai rai, “num” mi rai rai, la marai langai ngai hpe Wunpawng htungking hku nna Katsa daw ang ai rai yang shaga lang ai hkungga shakawn mying ni:

Ma Gam rai yang, Tsa Ba shing nrai Tsa Krang

Ma Naw rai yang, Tsa Bawk shing n rai Tsa Ji

Ma La rai yang, Tsa Doi

Ma Tu rai yang, Tsa Lum shing nrai ginra nkau ni hta Tsa Pan

Ma Tang rai yang, Tsa Gun shing nrai ginra nkau ni hta Tsa Pan

Ma Yaw rai yang, Tsa Htung

Ma Hka rai yang gaw kaji dik hpungdim re majaw Tsa Dim ngu nna shaga ai re.

Tinang gaw “la” rai rai, “num” mi rai rai, num marai langai ngai hpe Wunpawng htungking hku nna Kani daw ang ai rai yang, shaga lang ai hkungga shakawn mying ni:

Ma Kaw rai yang, Ni Ba

Ma Lu rai yang, Ni Bawk

Ma Roi rai yang, Ni Ji

Ma Htu rai yang, Ni Lum

Ma Kai rai yang, Ni Htang

Ma Hka hte Ma Pri kaji dik yan hpe rai yang gaw Ni Dim ngu shaga nga ai.

Tinang gaw “la” rai rai, “num” mi rai rai, la marai langai ngai hpe Wunpawng htungking hku nna Kagu daw ang ai rai yang shaga lang ai Hkungga Shakawn mying ni:

Ma Gam rai yang, Ah Gu Ba shing nrai Ah Gu Krang

Ma Naw rai yang, Ah Gu Bawk

Ma La rai yang, Ah Gu Doi

Ma Tu rai yang, Ah Gu Lum

Ma Tang rai yang, Ah Gu Gun

Ma Yaw rai yang, Ah Gu Yaw ngu nna shaga mai nga ai.

Tinang gaw “la” rai rai, “num” mi rai rai, num marai langai ngai hpe Wunpawng htungking hku nna Kamoi daw ang ai rai yang, shaga lang ai Hkungga Shakawn mying ni:

Ma Kaw rai yang, Moi Shawng shing nrai Moi Ba

Ma Lu rai yang, Moi Bawk

Ma Roi rai yang, Moi Ji

Ma Htu rai yang, Moi Lum

Ma Kai rai yang, Moi Htang

Ma Hka hte Ma Pri ni gaw kaji dik hpungdim ni re majaw Moi Dim ngu shaga ai re.

Dinghku shang sai num ni hpe chyawm gaw shi a ning-rum ningtau wa hku hkan nna shaga ai lam mung nga ai. Ga shadaw; ning-rum ningtau madu wa Ma Gam rai taw yang num jan gaw, Ma Lu shing nrai Ma Roi rai tim madu wa hku hkan nna Ni Ba, Moi Ba ngu shaga ai lam mung nga ai.

Lahta kaw tsun sang lang dan ai zawn sha, Wunpawng htunghking hku Kanu, Kawa daw ang ai “la” shing nrai “num” ni hpe mung Gam rai yang Wa Ba, Naw rai yang Wa Bawk, Kaw rai yang Nu Ba, Lu rai yang Nu Bawk ngu nna shaga jai lang ai htungking lai len rai nga mali ai.

Ndai tang madun mat wa ai lam ni hta ra rawng ai lam ni, n hkum tsup shi ai lam ni naw nga na re. Jahkum shatsup hpaji jaw la na hpe myit mada let tang madun dat nngai. Yu n-gun jaw taw nga ai mungchying sha ni yawng hpe chyeju kaba sai.

Lai sai bat na lamang yu madat na link:

https://www.facebook.com/kachinwavesnews/videos/8664718370310309/?__cft__[0]=AZUsO4rx67JmlQcH3iQfH5eQukcX88TWaO7NOcSAo56wzjlujLxgYM7X3dB-Q6tCP99ATPt9z60LOql_4nKQmT9pudCrbp1S80tUnKmeTkVp-rPjdF1v9rgvX4pog9BnGO13FiSDXS57NnEJ4Gt6Zo7E4_r4MhWJGmFk4evBTT7vehYpqI08jcBm6vaaemc5SwCfq0jSkqUG5QI94k_tzbDF&__tn__=%2CO%2CP-R