ရွှေကူမြို့တွင်း ကင်းပုန်းချထားသည့် စစ်ကောင်စီတပ်၏ လက်နက်ကြီးပစ်ခတ်မှုကြောင့် ထိခိုက်ပျက်စီးမှုရှိ

30 December 2023 – Kachinwaves

ရွှေကူမြို့အတွင်း ကင်းပုန်းချထားသည့် စစ်ကောင်စီတပ်မှ ယမန်နေ့ညက လက်နက်ကြီး ပစ်ခတ်ခဲ့၍ ဘာသာရေး အဆောက်အအုံများဖြစ်သော ဘောဓိကျောင်းတိုက်နှင့် အောင်တော်မူဘုရားဝင်းများတွင် ကျရောက်ပေါက်ကွဲသည့်အပြင် လူနေအိမ်များတွင်လည်း ကျရောက်ပေါက်ကွဲခဲ့ကြောင်း သိရသည်။

အောင်တော်မူဘုရားဝင်း အုတ်နံရံထိခိုက်ပျက်စီးသွားပြီး လူနေအိမ်များတွင် ကျရောက်ပေါက်ကွဲမှုကြောင့် ပြည်သူထိခိုက်မှု ရှိသည်ဟု ရွှေကူဒေသခံတစ်ဦးက ပြောသည်။

“စစ်တပ်ကင်းပုန်းကနေ လက်နက်ကြီးရမ်းပစ်တာ ဘောဓိကျောင်းအနောက်ဖက် ကျတယ်။ အောင်တော်မူဘုရားနားမှာလည်း ကွဲတယ်။ အိမ်တွေထိတယ်။”ဟု ရွှေကူဒေသခံက ပြောသည်။

လက်နက်ကြီးကြောင့် ထိခိုက်ခံရသူများမှာ အမျိုးသားတစ်ဦးနှင့် အမျိုးသမီးဖြစ်ကြောင်း သိရသည်။

ထို့အပြင် လျှပ်စစ်ရုံးအောက်ဘက်ရှိ အထည်ဆိုင်တစ်ခုလည်း အိမ်ခေါင်မိုးပွင့်ထွက် ပျက်စီးသွားကြောင်း သတင်းရင်းမြစ်က ဆိုသည်။

စစ်ကောင်စီတပ်များက ရွှေကူမြို့တွင်းနေရာအချို့တွင် ကင်းပုန်ချထားပြီး လက်နက်ကြီးများ မကြာခဏ ပစ်ခတ်လေ့ရှိသည်။