ဝိုင်းမော်မြို့နယ်အတွင်းမှ စစ်ကောင်စီတပ်စခန်း ၈ ခုကို ယနေ့တစ်ရက်တည်း၌ သိမ်းပိုက်နိုင်ခဲ့

18 May 2024 – Kachinwaves

ယနေ့ မေ ၁၈ ရက်နေ့ တစ်ရက်တည်း၌ ဝိုင်းမော်မြို့နယ်မှ စစ်ကောင်စီတပ်စခန်း ၈ ခုကို KIA နှင့် ပူးပေါင်းတပ်ဖွဲ့တို့က သိမ်းပိုက်ရရှိခဲ့ကြောင်း သိရသည်။

သိမ်းပိုက်ရရှိခဲ့သည့် စစ်ကောင်စီတပ်စခန်များမှာ “ကဇူး၊ ခမရ (၃၂၁) ရဲ့ ပွိုင့်ကုန်း၊ အောင်မြေ – ၁၊ အောင်မြေ – ၂၊ ၉ မိုင်၊ အင်းလေး၊ အင်လုံခရွာနှင့် ဝထောင်ဘွမ်စခန်း”များ ဖြစ်ကြောင်း KIO ၏ သတင်းနှင့် ပြန်ကြားရေးဌာနက သတင်းထုတ်ပြန်ထားသည်။

စစ်ကောင်စီတပ်က ယနေ့ည ၉ နာရီခွဲအချိန်တွင် ၎င်းတို့လက်လွတ်လိုက်ရသော ကဇူးတပ်စခန်းနေရာ ဝန်းကျင်များသို့ လေယာဉ်ဗုံးကြဲခဲ့ကြောင်းလည်း သိရသည်။

ထို့အပြင် ဝိုင်းမော်မြို့နှင့် ဧရာဝတီမြစ်သာခြားသည့် မြစ်ကြီးနားမြို့ တွင်လည်း ယနေ့ည လက်နက်ကြီး လက်နက်ငယ် ပစ်ခတ်သံများ ဆူညံနေသည်ဟု မြို့ခံပြည်သူတို့က ပြောနေကြသည်။