Jinghpaw Ga Hku Shata Ninghtoi Ni Hpe Gara Hku Hti Lang Nga A Ta

https://youtu.be/Jab25Y6yIPE?si=xg1m0tRnzgdnj9Y2

. –

Lai wa sai bat na Jinghpaw lamang hta e Ladaw Shata ni mying lu wa ai hte seng nna sang lang dan mat wa sai hte maren, ndai bat hta mung Shata n’htoi ni hpe gara hku hti nna tsun shaga ai lam hpe matut tang madun mat wa na nngai.

Wunpawngsha ni lang ai shaning Shata ni hta n’htoi (29) ya rawng ai shata (6) hte n’htoi (30) ya rawng ai shata (6) rawng nga ai lam shawng na bat ni hta tang madun wa sai re. Ndai shata ni hta rawng ai n’htoi ni hpe hti masat ai lam hte seng nna Kachinland College Press kaw na shapraw da ai, “Jinghpaw Laika Lakchyoi” laika buk hpe mahta nna sha matut tang madun mat wa na nngai.

Shata mi a shawng nnan na n’htoi 1 hte 2 hpe gaw “prawji” ngu tsun ai. Bai shata praw 3 hte 4 ya shani ni hpe gaw “prawdan” nga tsun nhtawm, n’htoi 8 ya hpe gaw “ndan jinghpa kang” ngu shamying ai. Shata praw nhtoi 9 ya hpe gaw “tsap baw un” ngu nna 11 ni hpe gaw “tsap baw gum” ngu shamying tsun lang nga ai lam chye lu ai.

Shata mi a n’htoi 1 ya kaw na 10 ya du hkra hpe gaw praw 1, praw 2, praw 3, praw 4, praw 5, 6, 7, 8, 9, 10 ngu nna tsun ai hpe yawng chye chyalu rai na sai.

11 ya kaw na 15 ya du hkra hpe chyawm gaw, “hpung ang” ngu tsun ai re. Bai nna 14 ya hpe gaw “jan lai” ngu nhtawm 15 ya hpe gaw “shagawng” ngu nna n’htoi amying lu nga ai.

N’htoi 16 ya hpe mung, “ningja gan/chyahkyi sau” ngu shamying da ai sha n-ga n’htoi 17 hte 18 ya hpe mung “rumhpang 1” hte “rumhpang 2/hkyen matsat” ngu shamying ai lam hpe chye lu ga ai.

19 ya hpe gaw “rum jahku” ngu nna 20 ya shani hpe gaw “hkun lawm” shing nrai “rumhkoi” ngu tsun ai re. 21 ya kaw na 28 ya du hkra hpe gaw “shata si” ngu tsun ai. Shata mi a hpang jahtum shani n’htoi ang ai 29 ya shing nrai 30 ya shani hpe gaw, “tingmyit” nkau ni gaw “shata htum” ngu tsun ma ai lam hpe “Jinghpaw Laika Lakchyoi” laika buk hta mu lu nga ai.

Hpang na bat hta gaw bat langai ya kaw na sanit ya du hkra, bat mi na nhtoi mying ni hpe bai tang madun mat wa na nngai.

Chyeju kaba sai.